Read kapsiki Zhaŋe 2 Bible Online

Zhaŋe 2 - kapsiki bible

Zhaŋe 2

¹Ma te kwa maheke ta hɛ ne, pa makwa menete kwa Kana, te hɛɗia Galilɛ. Nahe meghekɛa Yɛsə kenza tagha.

²Nahe mbeli kehekake Yɛsə le mbeli nyi ketəkwə təkwə yitea makwa.

³Ma kwa kiɗi tɛ ne, ma ke meghekɛ sha Yɛsə: «Nahe tɛ kiɗi va hɛ.»

⁴Ma ke Yɛsə shɛ: «Male, wa yaɗe na va 'ya wa? Kenaka vəa ɗa kase we.»

⁵Tagha gɛ, ma ke meghekɛa Yɛsə sha ka mene slene: «Mene mə wəsə nya tegeze ŋayɛ ŋkɛ.»

⁶Weta ya ŋkwaŋe tagha, nyi beteyi ka Zhəwif kezha zhɛre ghəa nci wɛŋe kala nya gezete wəsə keshi. Wərə yayata weta shɛ kakelete gare litrə gwəmsə.

⁷Ma ke Yɛsə sha ka mene slene: «Pɛrekɛ mə weta nyi le yɛmə.» Pa hɛ pɛrekɛ hɛ paca paca.

⁸Tagha gɛ, ma ke Yɛsə sha hɛ: «Gəve mə tsetsenya ba'a keleghe nda mə ke wəndə nya te ghəa veghe.» Pa hɛ gəghe nda.

⁹Pa wəndə nya te ghəa veghe ndɛamakɛ yɛmə nya kezhɛrete geva katɛ. Keɗepe ŋkwa nya se tɛa shɛ ŋkɛ te we. Deke ka mene slene nyi kegəke yɛmə ka ɗepe. Pa wəndəa shɛ hekakɛ za makwa,

¹⁰ma ke shɛ: «Tɛ nya zeɗe yave mbeli ke mbeli kaba. Vəa ŋkwa nya nza mbeli keghwəyi ghwəyi ve nda nya keɗema zeɗekə mbeli ke mbeli. Ama gha ne, nahe na kesərəakɛ tɛ nya zeɗe pa tsetsenya.»

¹¹Nya ya kakwa ghate hwa wəsə meŋele nyi menete Yɛsə, kwa Kana te hɛɗia Galilɛ. Tsagha ncɛte zləvəa ŋkɛ Yɛsə, pa ka təkwə təkwə ŋkɛ yɛte ghena ta ŋkɛ.

¹²Kwetere wəmbəa ŋkɛ, ntəŋə Yɛsə kadzawa Kapɛrnawəm le meghekɛ, ka menəhɛnyɛ ba'a ka təkwə təkwə ŋkɛ. Pa hɛ hɛakɛ hɛ ɓɛhwɛ kwagha.

¹³Nahe gəsəkə Pake kenza takwa takwa, cape Yɛsə kadzeme Zhɛrəzalɛm.

¹⁴Pa ŋkɛ sləyi ka pamte sla, timɛti, yɛ gheɗepe, tsagha ka mbeɗe cɛdɛ mentishɛ te tabelea nci mbe ghɛa Shala.

¹⁵Pa Yɛsə menete kwərəpə le zewe ba'a ŋkamte hɛ shave mbe ghɛa Shala, tsagha timɛtia nci ba'a sla ta nci. Pa ŋkɛ betakɛ cɛdɛa ka mbeɗe cɛdɛ te hɛɗi ba'a tsetsəkwəate tabelea nci te ŋkwa.

¹⁶Ma ke sha ka pamte gheɗepe: «Fəmte mə wəshi nyi teke, zhɛrema ghɛa Yiteyɛ ɗa yɛ kashikwə ma!»

¹⁷Pa mbeli nyi ketəkwə təkwə Yɛsə zəzəte ghena nya kerafete geva mbe Ghena ta Shala, ma ke: «Kala ghwə tetere ɗa ɗe ta ghɛa ŋa.»

¹⁸Ma ke ka Zhəwif 'yɛwe va Yɛsə: «Ncɛte n'yɛ wəsə kencɛ wəsə kezha ɗepe n'yɛ hweŋkwa ya va gha kamene wəshi kala nyi?»

¹⁹Ma ke Yɛsə sha hɛ: «Ŋzlamte mə ghɛa Shala nya, kateŋa ŋkɛ 'ya mbe hɛ mahekene.»

²⁰Ma ke ka Zhəwif sha Yɛsə: «Va wəfaɗemsə ŋkwaŋeghəmbe menete mbeli kaŋa ghɛ nya, ama gha ne, kateŋa ŋkɛ na mbe hɛ mahekene pa na?»

²¹Ma ghɛa Shala nya geze Yɛsə ne, geva ta ŋkɛ.

²²Ma kwa same Yɛsə kwa kwele ne, pa mbeli nyi ketəkwə təkwə zəzəte nahe ŋkɛ kegezete ghena shɛ. Pa hɛ yɛte Ghena ta Shala ba'a ghena nyi gezete Yɛsə.

²³Ma kwa nza Yɛsə pelɛ Zhɛrəzalɛm, hwa gəsəkə Pake ne, kwele kwele mbeli nyi keyɛte ŋkɛ, va nya nakɛ wəshi meŋele nyi menete ŋkɛ hɛ.

²⁴Ama kevate ghə Yɛsə te hɛ, va nya ɗepe zəzə ta nci ŋkɛ we.

²⁵Kaɗe ŋkɛ kancɛ nda ghena mbeli te wəndə ŋelɛ we. Kwa nza ŋkɛ ne, nahe ŋkɛ le ghəa ŋkɛ keɗepe zəzə ta wəndə ŋelɛ.