Read kapsiki Zhaŋe 20 Bible Online

Zhaŋe 20 - kapsiki bible

Zhaŋe 20

¹Masheke masheke vəa ŋkwa demase, mba ŋkwa zlərə zlərə ne, cape Mari, wəzha ta ka Magdala kalə kadzemɛa kwele ta Yɛsə. Newe ke ne, nahe pelɛ ketsəkwəmte geva seyi mɛa kwele.

²Tewətelɛwe nde le hwɛ kalə sha Simon Piyɛre le kwete wəndə nya ɗe Yɛsə za ma hwa mbeli nyi ketəkwə təkwə. Ma ke sha hɛ: «Nahe mbeli kekelemte Nde sleke ŋkwa same kwa kwele. Keɗepe n'yɛ tema tema veyi mbeli we.»

³Cape Piyɛre le kwete nde təkwə təkwə Yɛsə kalə kadzemɛa kwele.

⁴Tereŋe hɛ yitea hwɛ bake nci. Ama hwɛ ma kwete wəndə nya ketəkwə təkwə Yɛsə ke Piyɛre. Mpelɛa ŋkɛ ntsehe mɛa kwele ke Piyɛre.

⁵Vəkwə ŋkɛ, wəmbɛne ke sha ŋkwa kedzawa kwele ne, deke lekwesa yanakɛ ŋkɛ kwa te hɛɗi. Ama kese ŋkɛ dzawa we.

⁶Pɛkwe Simon Piyɛre hwe sebe ta ŋkɛ, shilimə ŋkɛ kwa kwele. Dəkwə ŋkɛ te zlave nyi te hɛɗi

⁷le zlave nya peɗekɛ ghəa Yɛsə mbeli le perə. Ashɛ te ŋkwa nya kwetɛŋe yɛ lekwesa shɛ le zlave we, te ŋa ŋkɛ ŋkwa kepeɗe peɗe.

⁸Pa kwete nde təkwə təkwə Yɛsə nya kese mɛa kwele mpelɛa dzawa kwelea shɛ perə. Ma kwa nakɛ ŋkɛ ne, pa yɛte.

⁹Nda tsetse ŋkɛ ne, kenaka mbeli nyi ketəkwə təkwə Yɛsə kafave ghena nya rafete mbeli mbe Ghena ta Shala we, ma kegezete geva: «Katesame Yɛsə hwa mbelia kwahɛɗi.»

¹⁰Ntəŋə mbeli nyi bake nyi ketəkwə təkwə Yɛsə kalə sha ghɛa nci.

¹¹Meghereŋe Mari mɛa kwele, kanehwene nde. Ma kwa nehwene nde ne, wəmbɛne ke sha ŋkwa nya kwa kwele.

¹²Dəkwə nde te ka ghwene ta Shala bake mbe lekwesa kwa tɛawetɛa. Mentishɛ hɛ te ŋkwa nya se geva ta Yɛsə, te ŋkwa nya se ghə kwete, te ŋkwa nya se seɗa kwete.

¹³Ma ke shɛ: «Male, yitea wa nehwene na wa?» Ma ke Mari zhɛnete: «Nahe mbeli kekelemte Nde sleke ŋkwa ta ɗa, keɗepe ŋkwa nya veyi hɛ te 'ya we.»

¹⁴Ma kwa gezemte ghena nya Mari ne, pa zhɛrete geva. Dəkwə nde te Yɛsə tagha. Ama keɗepe nde kaYɛsə we.

¹⁵Ma ke Yɛsə shɛ: «Va wa nehwene na wa male? Wa yazele na wa?» Ma zəzə Mari ne, kawəndə nya kewəza wəshi te ŋkwa shɛ nde geze nda ghena. Vatse geze nde: «Kenza nde gha nde kelete ne, wəndə ganyɛ ne, ncɛte ɗa ŋkwa nya veyi na te, yitea lə 'ya kakele gi.»

¹⁶Ma ke Yɛsə: «Mari!» Pa Mari zhɛrete geva, ma ke shɛ le ghena ta ka Ɛbrə: «Rabəwni», geze ta ŋkɛ, «Nde sleke ɗa».

¹⁷Ma ke Yɛsə sha Mari: «Kwaɗe ɗa ma na ma. Kenaka 'ya kadzeme sha Yiteyɛ ɗa we. Ama kwiɗi geze nda ke ka kesaka meyɛ ɗa, 'ya kadzeme sha Yiteyɛ ɗa, nya kaYite ŋayɛ, sha Shala ta ɗa, nya kaShala ta ŋayɛ.»

¹⁸Ntəŋə Mari lə kageze nda ke mbeli nyi ketəkwə təkwə Yɛsə, ma ke: «Nahe 'ya kenakɛ Nde sleke ŋkwa.» Pa nde ɓelate nda wəsə nya gezete nda ŋkɛ ke hɛ.

¹⁹Kwa tɛhwɛɗi vecia demasea shɛ, pa mbeli nyi ketəkwə təkwə Yɛsə tsenete geva te ŋkwa nya kwetɛŋenyɛ ki kwete ghɛ, pa hɛ ŋzleyite ŋkwa yitea ghəa nci le lakelɛ va ghazlənə va ka Zhəwif. Ma newe hɛ ne, vəkə Yɛsə hwa hɛ, ma ke sha hɛ: «Kwelɛŋe pe yɛ!»

²⁰Ma kwa gezemte ghena shɛ ŋkɛ, pa ncɛte nda dzeve ta ŋkɛ ke hɛ le slerepe ta ŋkɛ. Ntake hɛ kazlama kwele kwele va nya nakɛ Nde sleke ŋkwa hɛ.

²¹Zhɛne Yɛsə kageze nda ke hɛ zhɛkwa: «Kwelɛŋe pe yɛ. Kala nya ghweneke ɗa Yiteyɛ ɗa ne, tsagha ghwene ŋayɛ 'ya perə.»

²²Ma kwetere wəmbəa ghena nyi ne, vɛsə ke sha sefə kənəa hɛ, ma ke: «Kemave mə Sefəa Shala.

²³Ma mbeli nyi kelemte nda jaɗafa ta nci yɛ ke hɛ te wənə ne, nahe ŋkɛ kekelemte nda geva ke hɛ. Ma mbeli nyi keseyi yɛ mɛa wənə ne, tsagha shɛ keseyi geva hɛ.»

²⁴Tomas, nya heka mbeli kaKwalegha, kwete wəndəa mbeli nyi meŋe bakeghəmbe nyi ketəkwə təkwə Yɛsə shɛ tagha nda se ŋkɛ hwa hɛ we.

²⁵Ma ke kweci ka təkwə təkwə shɛ: «Nahe ghen'yɛ kenakɛ Nde sleke ŋkwa.» Ma ke Tomas sha hɛ: «Kenakɛma mevɛvi nyi mbe dzeve ta ŋkɛ 'ya, kekwaɗakɛma zhia kwesa 'ya le dzeve ta ɗa, keɗema 'ya kekwaɗakɛ zhi nya mbe slerepe ve ne, kayɛ 'ya we.»

²⁶Ma shikwə kwetɛŋe kadzeghe, nahe ka təkwə təkwə Yɛsə ketsenete geva zhɛkwa ki ghɛ. Hwa hɛ Tomas vəa ŋkwa shɛ. Ndagwara nahe hɛ keŋzleyite cɛ yitea ghəa nci le lakelɛ. Vəkə Yɛsə hwa hɛ, ma ke sha hɛ: «Kwelɛŋe pe yɛ.»

²⁷Ma ke gezete nda ke Tomas: «Hake dzeve ta ŋa, shɛ na mareve ŋa ɗa. Hake dzeve ta ŋa ɓiyitsa, pa na kwaɗakɛ ŋkwa megha nya mbe slerepe ta ɗa. Mba na kezhɛne ghəpə zhɛkwa, yɛhwe.»

²⁸Ma ke Tomas shɛ: «Nde sleke ŋkwa ta ɗa, Shala ta ɗa.»

²⁹Ma ke Yɛsə shɛ: «Va nya nakɛ ɗa na nda yɛhwe na wəka? Zlama ya va mbeli nyi keyɛhwe kaɗema hɛ kenakɛ.»

³⁰Kwele kwele menete kweci wəshi kencɛ wəshi Yɛsə kwa ntsə ta mbeli nyi ketəkwə təkwə, ama kerafete geva hɛ pɛtɛ mbe palepa nya we.

³¹Ma nyi kerafete geva ne, yitea yɛhwe yɛ Yɛsə ya kaMɛsi, gheŋkɛ Wəzege ta Shala. Ma keyɛhwe yɛ ne, katekemave mpi yɛ te sləa Yɛsə.