Read kapsiki Zhaŋe 6 Bible Online

Zhaŋe 6 - kapsiki bible

Zhaŋe 6

¹Kwetere wəmbəa ŋkɛ, ntəŋə Yɛsə kajive kema ta ndərəa Galilɛ, nya heka mbeli kandərəa Tibɛriyade perə.

²Kwele kwele mbeli nyi kezele ŋkɛ va nya nakɛ wəshi meŋele nyi menete ŋkɛ hɛ laka mbe ka zereghwe.

³Tarame Yɛsə kwa ghəa kwete ghweme, ntishɛ ŋkɛ le mbeli nyi ketəkwə təkwə.

⁴Nahe gəsəkə Pake ta ka Zhəwif kenza takwa takwa.

⁵Newe ke Yɛsə ne, kwele kwele mbeli kase shɛ. Ma ke sha Filipe: «Tema nza gheɓəmə kapave wəshi kezeme kezha ve nda ke mbeli nyi tse wa?»

⁶Deke kezha dzeghe gea Filipe gezete Yɛsə tsagha, kwa nza ŋkɛ nahe ŋkɛ keɗepe wəsə nya temene ŋkɛ.

⁷Ma ke Filipe shɛ: «Ya kaslibə bakemsə ne, wa wəsə nya nza gheɓəmə kapave kezha ndɛamakɛ yayata wəndəa nci wa?»

⁸Ma ke kwete hwa mbeli nyi ketəkwə təkwə sləa ŋkɛ Andrɛ, wəza meghekɛa Simon Piyɛre ŋkɛ:

⁹«Kwete dɛgwə ya shɛ teke nya nza 'yɛmbe dəghwəa ɗafa megi mcɛfe ba'a kelepe bake ve. Ama wa wəsə nya nza hɛ kaketekɛ nda ke mbeli nyi kwele kwele nyi wa?»

¹⁰Tagha gɛ, ma ke Yɛsə: «Geze nda mə ke mbelia shɛhɛ kantishɛ.» Kwele kwele gwəzə te ŋkwa shɛ. Pɛtɛ hɛ ntishɛnji, gare slibə mcɛfe nza zhili.

¹¹Pa Yɛsə kelete ɗafa, kwa tsate nda ŋ'wese ŋkɛ ke Shala ne, pa nehave nda ke mbeli nyi mentishɛ tagha. Tsagha neheve nda kelepe ŋkɛ ke hɛ perə, kala nya ɗe hɛ.

¹²Ma kwa zehwe hɛ behe behe ne, ma ke Yɛsə sha mbeli nyi ketəkwə təkwə: «Tsenete mə kwetiɓəa ɗafa nyi ketene yagha wəsə kaza.»

¹³Pa hɛ tsenete hɛ ba'a viɗikɛ kwaciga meŋe bakeghəmbe le kwetiɓəa ɗafa nyi ketene yitea ɗafa megi nyi mcɛfe nyi zehwe hɛ.

¹⁴Ma kwa nakɛ wəsə meŋele nya menete Yɛsə mbeli ne, ma ke hɛ: «Kaganda nza wəndə nya kaNde mɛ ŋkwa, nya kehi kase kadzete hɛɗi lema.»

¹⁵Ma kwa ɗepe Yɛsə kaɗe hɛ kave nda meghe le berete ne, ntəŋə ŋkɛ ɓiyitsa kwetɛŋenyɛ kadzeme ghəa ghweme.

¹⁶Ma kwa se tɛhwɛɗi ne, cape mbeli nyi ketəkwə təkwə Yɛsə kalə kadzemɛa hələ.

¹⁷Tarame hɛ kwa kwambelə, ntəŋə hɛ jive te yɛmə kezha dzawa Kapɛrnawəm. Pa viɗi keseve hɛ te yɛmə, kenaka Yɛsə kase sha hɛ we.

¹⁸Kagaŋkəɗə ndərə le berete, va nya nza sefə kavɛ kwele kwele.

¹⁹Mcɛfe keɗema ŋkwaŋe kilemɛtre menete hɛ nda nakɛ Yɛsə hɛ kadzeghwa te yɛmə kase sha kwambeləa nci. Tagha gɛ, ntake hɛ kaghazlənə.

²⁰Ma ke Yɛsə sha hɛ: «'Ya ŋkɛ, ghazlənəma yɛ ma.»

²¹Kaɗe hɛ kakele Yɛsə kadzawa kwambelə, ama taghanyɛ ntsehe hɛ te ŋkwa nya lə hɛ.

²²Ma te hendɛ ta ŋkwa, nahe mbeli nyi kese pelɛ kema ta hələ keɗepe kwetɛŋe kwambelə nya kejivenyɛ. Nahe hɛ keɗepe kaɗema Yɛsə kedzawa kwambeləa shɛ yitea mbeli nyi ketəkwə təkwə, deke mbelia shɛhɛ kadzawa kaghəa nci.

²³Hwa'a kweci kwambelə nyi kese mbe meleme ta Tibɛriyade nya takwa takwa yitea ŋkwa nya zehwe ɗafa hɛ, kwa tsate nda hana Nde sleke ŋkwa ke Shala.

²⁴Kwa nakɛ mbeli nyi ketsenete geva nyi kaɗema Yɛsə tagha, ya ka təkwə təkwə ŋkɛ ne, pa hɛ dzawa kwambeləa shɛhɛ, ntəŋə hɛ kadzawa Kapɛrnawəm kazele Yɛsə.

²⁵Kwa nakɛ Yɛsə mbeli nyighɛ pelɛ kema ta hələ ne, ma ke hɛ shɛ: «Rabi, hweŋkwa se ŋa na teke wa?»

²⁶Ma ke Yɛsə: «Kaganda ne, ma 'ya sha gheyɛ: wəshi meŋele nyi menete 'ya nde keleke ŋayɛ kase teke we, ama ɗafa nya behekɛ ŋayɛ 'ya le nde keleke ŋayɛ.

²⁷Menema slene yɛ kezha kemave wəshi kezeme nyi kedaɗə gəmə ma, mene mə slene kezha wəshi kezeme nyi keɗema kadaɗə, nyi kaŋa mpi nya keɗema kakiɗi. Wəzege ta za nde teve ŋayɛ wəshi kezemea shɛ, gheŋkɛ yavate lamba ta berete ta ŋkɛ Shala Yita te.»

²⁸Ma ke hɛ shɛ: «Tsema mene n'yɛ nda nza n'yɛ kamenete slene nya ɗe Shala tse wa?»

²⁹Ma ke Yɛsə sha hɛ: «Ma slene nya ɗe Shala kamene yɛ ne, yɛ mə wəndə nya ghweneke ŋkɛ.»

³⁰Ma ke hɛ shɛ: «Wa wəsə kencɛ wəsə nya nza na kamenete n'yɛ kezha yɛte ŋa ghen'yɛ wa? Wa sləa slene nya temene na wa?

³¹Nahe ka shihɛ n'yɛ kezehwe mane kwamte te ɓerama, kwa nza ŋkɛ ma ke rafete geva mbe Ghena ta Shala: Nahe ŋkɛ kendeke nda wəsə kezeme ke hɛ sawa pelɛ ghweme.»

³²Ma ke Yɛsə sha hɛ: «Kaganda ne, ma 'ya sha gheyɛ: Moyize nde ndeke ŋayɛ ɗafa nya kesawa pelɛ ghweme we, Yiteyɛ ɗa nde ndeke ŋayɛ ɗafa nya kaganda sawa pelɛ ghweme.

³³Ma ɗafa nya kese va Shala, nya kesawa pelɛ ghweme ne, gheŋkɛ nde ve nda mpi ke pɛtɛa mbeli nyi te hɛɗi.»

³⁴Ma ke hɛ shɛ: «Nde sleke ŋkwa, ve n'yɛ ɗafa shɛ keveci keveci gi!»

³⁵Ma ke Yɛsə sha hɛ: «'Ya ya kaɗafa ta mpi. Ma yayata wəndə nya kese sha 'ya ne, katezhɛ nda ma kaghala ghala we. Ma yayata wəndə nya keyɛte ɗa ne, katezhɛ nda ndere kaghala ghala we.

³⁶Nahe 'ya kegezete ŋayɛ, nahe yɛ kenakɛ ɗa, ama keyɛte ɗa yɛ we.

³⁷Katese yayata wəndə nya ndeke ɗa Yiteyɛ ɗa sha 'ya. Kateŋka wəndə nya kese sha 'ya 'ya we.

³⁸Kwa nza ŋkɛ kesawa 'ya pelɛ ghweme kezha mene ɗe ta ɗa we, ama kezha mene ɗe ta wəndə nya keghweneke ɗa.

³⁹Wa nya wəsə nya ɗe wəndə nya keghweneke ɗa nya: Kezha ɗema 'ya kwete wəndəa mbeli nyi ndeke ɗa ŋkɛ. Ama kezha fə hɛ 'ya same kwa kwele te veci nya kiɗi hɛɗi.

⁴⁰Wa nya wəsə nya ɗe Yiteyɛ ɗa nya: yayata wəndə nya kenakɛ Wəzege ba'a nya keyɛte ŋkɛ ne, katekemave mpi nya kaghala ghala. Kambele ŋkɛ 'ya same kwa kwele te kwa keɗaŋe ta hɛ.»

⁴¹Ntake ka Zhəwif kandəghwə ndəghwə va nya gezete Yɛsə, ma ke: «'Ya ya kaɗafa nya kesawa pelɛ ghweme.»

⁴²Ma ke hɛ: «Ashɛ wəzege ta Zhozɛf Yɛsə wəka? Nahe gheɓəmə keɗepe yitenyɛ ba'a meghekɛ. Tsema geze ŋkɛ ɓəmə ŋkɛ sawa pelɛ ghweme ŋkɛ wa?»

⁴³Ma ke Yɛsə sha hɛ: «Ndəghwə ndəghwəma yɛ kwelɛ ghəa ŋayɛ ma.

⁴⁴Wəndə shɛ kase sha 'ya keɗema Yiteyɛ ɗa nya keghweneke ɗa kentseheke ŋkɛ we. Ama 'ya ne, katekele yayata wəndə nya kese sha 'ya 'ya same kwa kwele te veci nya kiɗi hɛɗi.

⁴⁵Ma ke ka mɛ ŋkwa rafete: Kateteke nda wəshi Shala ke hɛ pɛtɛ. Yayata wəndə nya kefate ghena ta Yiteyɛ ɗa nya ba'a nya kekelete, kase wəndəa shɛ sha 'ya.

⁴⁶Wəndə shɛ kenakɛ Yita 'ya we. Deke wəndə nya kesawa pelɛagha sha Shala nde nakɛ Yita.

⁴⁷Kaganda ne, ma 'ya sha gheyɛ: nahe yayata wəndə nya keyɛte kekemave mpi nya kaghala ghala.

⁴⁸'Ya ya kaɗafa ta mpi.

⁴⁹Mane yazehwe ka shihɛ ŋayɛ te ɓerama, ama nahe hɛ kempə.

⁵⁰Ama ɗafa nya kesawa pelɛ ghweme nya geze ŋayɛ nya 'ya ne, katemte yayata wəndə nya kezehwe we.

⁵¹'Ya ya kaɗafa nya nza mpi mbe nya kesawa pelɛ ghweme. Yayata wəndə nya kezehwe ɗafa shɛ ne, teghweme tenza ŋkɛ kaghala ghala. Ɗafa nya teve ŋayɛ 'ya ne, gheŋkɛ slia geva ta ɗa, kave nda ŋkɛ 'ya ke mbeli kezha kemave mpi mbeli.»

⁵²Tagha gɛ, ntake ka Zhəwif kaghəpə kwele kwele kwelɛ ghəa nci, ma ke hɛ: «Tsema nza wəndə nya kandeke ɓəmə slia geva ta ŋkɛ kawəsə kezeme wa?»

⁵³Ma ke Yɛsə sha hɛ: «Kaganda ne, ma 'ya sha gheyɛ: ma keɗema yɛ kezehwe geva ta Wəzege ta za ba'a kesahwe mimia ŋkɛ ne, katenza mpi yɛ mbe gheyɛ we.

⁵⁴Ma yayata wəndə nya kezeme slia geva ta ɗa ba'a nya kesa mimia ɗa ne, mpi nya kaghala ghala ya ve. Katekele ŋkɛ 'ya same kwa kwele te kwa keɗaŋe ta veci.

⁵⁵Kwa nza ŋkɛ ne, wəsə kezeme ganyɛ slia geva ta ɗa, wəsə kesa ganyɛ mimia ɗa perə.

⁵⁶Yayata wəndə nya kezehwe slia geva ta ɗa ba'a nya kesahwe mimia ɗa ne, mbe 'ya nza wəndəa shɛ, mbe wəndəa shɛ nza 'ya perə.

⁵⁷Teghweme Yita nya keghweneke ɗa, laka gheŋkɛ nza 'ya teghweme perə. Tsagha yayata wəndə nya kezeme geva ta ɗa, laka 'ya nza ŋkɛ teghweme perə.

⁵⁸Tsagha ɗafa nya kesawa pelɛ ghweme, kejikə nde le ɗafa nya zehwe ka shihɛ ŋayɛ nyi kempənji we. Yayata wəndə nya kezehwe ɗafa nya ne, teghweme tenza ŋkɛ kaghala ghala.»

⁵⁹Mbe cɛ kesəkwə ghə gezete ghena nyi Yɛsə, vəa ŋkwa nya teke nda wəshi ŋkɛ ke mbeli kwa Kapɛrnawəm.

⁶⁰Ma kwa fate ghena ta Yɛsə nya hɛ, ma ke kweci hwa ka təkwə təkwə kwele kwele: «Dzawe ghena shɛ deŋwa. Tsema nza wəndə kayipəyi kwa kala nya geze ŋkɛ wa?»

⁶¹Nahe Yɛsə keɗepe mbe ghəa ŋkɛ kandəghwə ndəghwə ka təkwə təkwə va ghena shɛ. Ma ke sha hɛ: «Kazhɛ ŋayɛ wənəa ŋayɛ va ghena nya geze nya 'ya na?

⁶²Tsema temene yɛ tsagha kenakɛ Wəzege ta za yɛ kalə kadzete ŋkwa nya se ŋkɛ te wa?

⁶³Sefəa Shala nde ve nda mpi ke wəndə, slia geva le ghəa ŋkɛ ne, gəmə ŋkɛ. Ghena nyi se nyi 'ya kageze ŋayɛ ne, ghena ta Sefəa Shala hɛ, ghenci mpi.

⁶⁴Ama kayɛ kweci hwa gheyɛ we.» Kwa nza ŋkɛ nahe Yɛsə keɗepe kaghate mbeli nyi keɗema kayɛ ghena ta ŋkɛ, le wəndə nya ketepamte.

⁶⁵Ma ke Yɛsə sha hɛ: «Va nya kala nya gezete ŋayɛ 'ya, wəndə shɛ kase sha 'ya keɗema Yiteyɛ ɗa kekeleke we.»

⁶⁶Se mɛa ghena shɛ, kwele kwele mbeli nyi ketəkwə təkwə nyi kewəfəyite Yɛsə, kaɗe hɛ zele ɓiyitsa we.

⁶⁷Ma ke Yɛsə gezete nda ke mbeli nyi ketəkwə təkwə nyi meŋe bakeghəmbe: «Pa le gheyɛ kaɗe kaslə na?»

⁶⁸Ma ke Simon Piyɛre shɛ: «Nde sleke ŋkwa, sha wa lə n'yɛ gɛ? Gha wəndə nya nza ghena ta mpi nya kaghala ghala ve.

⁶⁹Ghen'yɛ tsetsenya ne, nahe ghen'yɛ keyɛhwe ŋa, nahe ghen'yɛ keɗepe ɓiyitsa gha wəndə nya ntave Shala.»

⁷⁰Ma ke Yɛsə sha hɛ: «Ashɛ 'ya nde tsehave ŋayɛ, gheyɛ nyi meŋe bakeghəmbe wəka? Ama kwete wəndəa ŋayɛ ne, 'yi'yɛghwə ŋkɛ.»

⁷¹Te ghəa Zhəwdas, wəzege ta Simon Iskariyote gezete ghena shɛ ŋkɛ va nya nza ŋkɛ gheŋkɛ nde tepamte Yɛsə, ya kwela nza ŋkɛ hwa mbeli nyi ketəkwə təkwə nyi meŋe bakeghəmbe.