Read kapsiki Zhaŋe 7 Bible Online

Zhaŋe 7 - kapsiki bible

Zhaŋe 7

¹Kwetere wəmbəa ŋkɛ, cape Yɛsə kadzeghwa dzeyi te hɛɗia ka Galilɛ, hɛreɗɛ ɗema dzeghwa te hɛɗia ka Zhəwdɛ va nya nza hɛ kamene ntsehwele kapesle.

²Takwa takwa gəsəkəa cɛ ghwəlia ka Zhəwif te vecia shɛ.

³Ma ke ka menəhɛnyɛ sha Yɛsə: «Slə ŋa teke, kwiɗi kadzembe Zhəwdɛ yitea nakɛ slene nyi mene na mbeli nyi ketəkwə təkwə ŋa.

⁴Wəndə shɛ kamene wəsə tewəfərə keɗe ŋkɛ kafa zləvəa ŋkɛ mbeli we. Ma kenza nde wəshi meŋele yamene na ne, dzeyi te ŋwela nda nza mbeli nakɛ ŋa pɛtɛ.»

⁵Pa le ka menəhɛnyɛ kaɗema yɛ Yɛsə.

⁶Ma ke Yɛsə sha hɛ: «Kenaka və kedzeme ta ɗa kadzeghete geva we. Ya te nyama nyama və dzeme yɛ ne, megela ŋkɛ sha gheyɛ.

⁷Mbeli nza zlɛ va gheyɛ na, ama 'ya ne, dzawe zlɛ hɛ va 'ya, va nya nza ŋkɛ ndiremike wəshi nyi mene yɛ 'ya sha hɛ.

⁸Kwiɗi mə yitea gəsəkə le ŋa ŋayɛ, kadzeme 'ya we. Kenaka ŋa ɗa və kedzeme we.»

⁹Pa gezete nda ghena shɛ ke hɛ kala nyagha, pa ntishɛnyɛ mbe Galilɛ.

¹⁰Ma kwa dzemenji ka menəhɛnyɛ yitea gəsəkə ne, ntəŋə Yɛsə kwetere wəmbəa nci kadzeme te ghərə te ghərə. Kese ŋkɛ ncɛ nda geva ke mbeli we.

¹¹Kazele ka Zhəwif dzeyi hwa mbeli, ma ke hɛ: «Tema ŋkɛ wa.»

¹²Kwele kwele geze ghena ta Yɛsə mbeli mbe slene mbe slene hwa mbeli nyi ketsenete geva tipə tipə, ma ke kweci: «Wəndə nya ganyɛa mehele, wəndə nya.» Ma ke kweci: «Ewə, ghwete yaghwete ŋkwa ŋkɛ gəmə.»

¹³Ama wəndə shɛ kashɛ geze ghena kwa ntsə kwa ntsə te ghəa Yɛsə va ghazlənə ta ka Zhəwif we.

¹⁴Kwele ma nya kenahe na, na, kwele ma nya mba na, gəsəkə nda dzembe ghɛa Shala Yɛsə kateke nda wəshi ke mbeli.

¹⁵Hehake ka Zhəwif, ma ke hɛ: «Tsema ɗepe wəshi nyi wəndə nya kaɗema ŋkɛ ketekeve wəshi wa?»

¹⁶Ma ke Yɛsə sha hɛ: «Se va 'ya se ghena nya tekete ŋayɛ 'ya we, ama se va wəndə nya keghweneke ɗa.

¹⁷Kateɗepe yayata wəndə nya keɗe kamene wəshi nyi ɗe Shala kenza nde se va Shala se ghena nya teke nda 'ya ke mbeli keɗema shave mbe ghəa ɗa shave hɛ.

¹⁸Wəndə nya kegeze ghena nya keshave mbe ghəa ŋkɛ ne, yitea ve zləvə mbeli te ga ŋkɛ wəka? Ama wəndə nya keve zləvə te wəndə nya keghwenakɛ ne, gheŋkɛ nde geze kaganda. Tseŋwə hwa ghena ta ŋkɛ tɛape we.

¹⁹Ashɛ Moyize kendeke ŋayɛ wəsə mahalegə wəka? Ama wəndə shɛ hwa gheyɛ kemenete slene le wəsə mahalegə we. Yitea wa ɗe yɛ kapesle ɗa wa?»

²⁰Ma ke mbeli nyi ketsenete geva shɛ: «Shewə na va 'yi'yɛghwə na? Wa nde ɗe kapesle ŋa wa?»

²¹Ma ke Yɛsə: «Wəsə meŋele kwetɛŋe yamenete 'ya, ama nahe pɛtɛa ŋayɛ kenza heheɓake ve.

²²Take ne, nahe Moyize kendeke ŋayɛ hweŋkwa kesla nda mɓɛta ke ŋwale, ya kwela nza ŋkɛ kaɗema kaMoyize nde ghate kamene, ama ka shihɛ ɓəmə. Nahe yɛ keyɛhwe sla mɓɛta ya te vecia kezhɛne mpi.

²³Ma kenza nde kasla nda mɓɛta yɛ ke wəzege ya te veci kezhɛne mpi kaɗema wəsə mahalegə kabezemte geva ne, yitea wa hwepe wənə yɛ va nya mbete wəndə 'ya zake te vecia shɛ wa?

²⁴Neghama fete yɛ yitea wəndə deke te wəshi nyi nakɛ yɛ ma, pa yɛ ɗepe negha fete tiɗiɗi.»

²⁵Ma ke kweci mbeli mbe Zhɛrəzalɛm: «Take ne, ashɛ wəndə nya yazele mbeli kapesle wəka?

²⁶Wa nyagha mə gɛ! Darahwe darahwe geze ghena ŋkɛ, wəndə shɛ kamɛ shɛ we. Nahe mbeli nyi jama ta ɓə keɗepete gheŋkɛ Mɛsi kaganda na?

²⁷Wəndə nya ne, nahe mə keɗepe ŋkwa nya se ŋkɛ te, kenza Mɛsi kase ne, wəndə shɛ kaɗepe ŋkwa nya tese ŋkɛ te we.»

²⁸Ma kwa teke nda wəshi Yɛsə ke mbeli mbe ghɛa Shala ne, ma ke zlapete ghena: «Nahe yɛ keɗepe ɗa ba'a ŋkwa nya se 'ya te? Ma 'ya ne, 'ya nde ghweneke ghəa ɗa we, ama kaganda yageze wəndə nya keghweneke ɗa. Keɗepe wəndəa shɛ yɛ we.

²⁹'Ya nde ɗepe, kwa nza ŋkɛ yite se 'ya, gheŋkɛ nde ghweneke ɗa kase.»

³⁰Se te ghena shɛ ɗe hɛ kakese Yɛsə, ama wəndə shɛ kedapate dzeve te we, kwa nza ŋkɛ kenaka vəa ŋkɛ kase we.

³¹Kwele kwele mbeli nyi keyɛte Yɛsə hwa mbeli nyi ketsenete geva, ma ke hɛ: «Ma kese Mɛsi ne, za ma temene wəshi meŋele ŋkɛ ke wəndə nya na?»

³²Ma kwa fate ghena nyi geze mbeli mbe slene mbe slene te Yɛsə ka Fariziyɛn ne, jikə hɛ jikəte geva le mbeli nyi te ghəa ka dzeghe Shala, pa hɛ ghweneke ka ya ghɛa Shala kakese Yɛsə.

³³Ma ke Yɛsə gezete: «Mba 'ya katemə ɓɛhwɛ hwa gheyɛ zhɛkwa, nda telə 'ya sha wəndə nya keghweneke ɗa.

³⁴Katesepa ɗa yɛ, ama katesləyi ɗa yɛ we, va nya ɗema yɛ katentsehe te ŋkwa nya telə 'ya.»

³⁵Ma ke ka Zhəwif kwelɛ ghəa nci: «Tema telə ŋkɛ nda geze ŋkɛ: Katesləyi ɗa yɛ we, ke wa? Gheŋkɛ kalə sha ka Zhəwif nyi te hɛɗia ka Grɛk yitea teke nda wəshi ke ka Grɛk na, na, tsema wa?

³⁶Ma ke ɓiyitsa: Katesepa ɗa yɛ, ama ashɛ yɛ kateslə ɗa we, va nya ɗema yɛ katentsehe te ŋkwa nya telə 'ya. Wa yaɗe ŋkɛ kageze tsagha wa?»

³⁷Kwa keɗaŋe ta gəsəkə yaza ma. Vəa ŋkwa shɛ, ghereŋe Yɛsə kwa kema ta mbeli, ma ke zlapete ghena: «Ma kezhɛ nda ndere ke wəndə ne, se ŋkɛ kasa yɛmə va 'ya.

³⁸Ma ke mbe Ghena ta Shala: Wəndə nya keyɛte ghena ta ɗa ne, katehwɛ yɛmə nya keɗema kakiɗi shave mbe wənəa ŋkɛ.»

³⁹Ghena ta Sefəa Shala nya tekemave mbeli nyi keyɛte yageze Yɛsə tsagha. Te vəa shɛ ne, kenaka mbeli kakemave Sefəa Shala kaba kwa nza ŋkɛ kenaka Shala ndeke nda zləvə ke Yɛsə we.

⁴⁰Hwa mbeli nyi ketsenete geva nyi, ma ke mbeli kwele kwele kwa fate ghena ta Yɛsə hɛ: «Wəndə nya ne, Nde mɛ ŋkwa ta Shala ŋkɛ fate.»

⁴¹Ma ke kweci: «Mɛsi ŋkɛ.» Ma ke kweci kwa ŋa nci: «Se te hɛɗia ka Galilɛ tese Mɛsi na?»

⁴²Nahe Ghena ta Shala kegezete: «Mbe hwelefe ta David teya Mɛsi, se mbe Bɛtelɛhɛm meleme ta David.»

⁴³Pa mbeli neheve geva mbe tewəmbəreke Yɛsə.

⁴⁴Pa kweci mbeli ɗe kakese Yɛsə, ama wəndə shɛ kedapate dzeve te we.

⁴⁵Zhɛne ka ya ghɛa Shala kalə sha ka Fariziyɛn le mbeli nyi te ghəa ka dzeghe Shala. Ma hɛ 'yɛwete va hɛ: «Va wa ɗema yɛ keseke ŋkɛ wa?»

⁴⁶Ma ke ka ya ghɛa Shala: «Wəndə shɛ kegha kagezete ghena kala nya geze wəndəa shɛ we.»

⁴⁷Ma ke ka Fariziyɛn zhɛnete: «Zlaɓe le gheyɛ ghwetete ŋkɛ perə ka?

⁴⁸Nahe yɛ kegha kanakɛ kwete hwa ghen'yɛ, mbeli nyi jama jama le ka Fariziyɛn nya kegha yɛte na?

⁴⁹Ama mbeli nyi ketsenete geva gəmə yite ne, keɗepe wəshi mahalegə hɛ we. Nahe Shala kebezlamte hɛ pɛtɛ.»

⁵⁰Tagha Nikodɛme hwa mbeli nyi jama nyi. Gheŋkɛ wəndə nya kese sha Yɛsə vecagha. Ma ke sha hɛ:

⁵¹«Kala nya geze wəshi mahalegəa Shala ta ɓəmə, berete va gheɓəmə kandeke nda fete ke wəndə keɗema mə kefate ba'a keɗepe wəshi nyi menete ŋkɛ perə we.»

⁵²Ma ke hɛ shɛ: «Kaya, nde Galilɛ na perə na? Kwiɗi jaŋgate Ghena ta Shala tiɗiɗi, pa na ncɛte ŋkwa nya gezete geva ŋkɛ te kenza nde nahe nde mɛ ŋkwa ta Shala kegha same kwa Galilɛ ya kwetɛŋe.»

⁵³Kwetere wəmbəa ŋkɛ, kwetɛ kwetɛŋe hɛ lənji sha ghɛ.