Read kapsiki Slene 11 Bible Online

Slene 11 - kapsiki bible

Slene 11

¹Nahe ka ghwene ta Yɛsə ba'a ka kesaka ma nyi kwa Zhəwdɛ kefave nahe kweci hwelefefi keyɛte ghena ta Shala le ŋa nci perə.

²Ma kwa dzeme Zhɛrəzalɛm Piyɛre ne, ntake ka sla sla mɓɛta kaghəpə le.

³Ma ke hɛ: «Wa raberə dzeki ghɛa mbeli nyi keslamtema mɓɛta na ba'a zehwe wəsə kezeme na le hɛ wa?»

⁴Pa Piyɛre ɓelate nda wəsə nya kemenete geva ke hɛ se te kwa ghate. Ma ke:

⁵«Ma kwa nza 'ya kasəkwə ghə mbe Zhopɛ ne, pa 'ya nakɛ kwete wəsə laka kelɛŋə. Pa 'ya nakɛ kwete wəsə kasawa pelɛ ghweme sha 'ya, kala gwada nya wəba, wəfaɗe bela te, kasawa terasle vare 'ya.

⁶Newe 'ya sha ŋkwa nya mbe ne, pa 'ya nakɛ wəshi keseɗa nyi ki ghɛ, nyi kwamte, nyi kedzeghwa le hwə, 'yɛ nyi kezlə.

⁷Tagha gɛ, ma ke ŋwələa sha 'ya: Sate Piyɛre, henekɛ ba'a zehwe.

⁸Ma 'ya shɛ: Ewə, Nde sleke ŋkwa we, ghala yake ɗa mbeli ne, kegha wəsə nya kefɛake geva ba'a nya wale wale kadzawa mɛa ɗa we.

⁹Ma ke ŋwələ sha 'ya sawa pelɛ ghweme ɓiyitsa: Zhɛrema wəsə nya veyi Shala wɛŋe na wale wale ma.

¹⁰Mahekene zhigəa ŋkɛ kamene geva kala nyagha shɛ, taghanyɛ ne, vəwə pɛtɛa wəshia shɛhɛ keleghe geva kadzeme ghweme.

¹¹Te ŋkwa shɛnyɛ, pɛkwe mbeli mahekene ki ghɛ nya nza 'ya, same kwa Sɛzarɛ ghweneke ɗa hɛ mbeli.

¹²Pa Sefəa Shala geze ɗa kalə le hɛ kaɗema kazhɛne ghə. Wa nyi ka kesaka ma nyi ŋkwaŋe nyi kebeghakɛ ɗa nyi teke, nahe pɛtɛa n'yɛ kedzeki ghɛa Kornɛy le hɛ.

¹³Pa ŋkɛ gezete n'yɛ se ta nde ghwene ta Shala shɛ ki ghɛa ŋkɛ, ma ke shɛ: Ghweneghe wəndə kadzawa Zhopɛ kaheka Simon nya nza sləa ŋkɛ kaPiyɛre.

¹⁴Kategeze ŋa ghena ta wəshi nyi kemenete geva nyi ketembele ŋa, gha le mbelia ŋa pɛtɛ.

¹⁵Ma vəa ŋkwa nya ghate 'ya kageze ghena ne, pa Sefəa Shala sawa kadzeghəa hɛ, kala nya menete ŋkɛ le gheɓəmə kaghate.

¹⁶Tagha gɛ, pa 'ya zəzəte ghena nya gezete Nde sleke ŋkwa, ma ke: Le yɛmə menete batɛme Zhaŋe, ama gheyɛ ne, le Sefəa Shala temene ŋayɛ batɛme mbeli.

¹⁷Tsagha ne, nahe Shala kendeke nda wəsə nya kwetɛŋe ke mbelia shɛhɛ le gheɓəmə vəa ŋkwa nya yɛhwe ghena ta Nde sleke ŋkwa Yɛsə Kriste gheɓəmə. Wa ŋkɛ 'ya nda fɛa Shala 'ya kemene slene ta ŋkɛ wa?»

¹⁸Ma kwa fate ghena shɛhɛ hɛ, tikə tikə hɛ, pa hɛ tsahekɛ Shala, ma ke hɛ: Nda kaganda deŋwa, nahe Shala kepelave nda hweŋkwa ke kweci hwelefefi kazhɛre wənəa nci ba'a kaŋ'we mpi.

¹⁹Nahe mbeli kese kaghweze mɛ hwa mbelia Yɛsə Kriste se te mte ta Ɛtiyɛne. Pɛtɛ hɛ ketazemte geva. Kahwɛ kweci kadzawa Fɛnisi, kadzawa Shipre kweci, kadzawa Antiyoshe kweci. Ama deke ke ka Zhəwif zlape nda ghena ta Shala hɛ.

²⁰Pa kweci mbelia nci nyi yake mbeli mbe Shipre ba'a Sirɛne dzawa Antiyoshe. Ntake hɛ kageze nda Ghena kwatenca nya ganyɛ ta Nde sleke ŋkwa Yɛsə ke ka Grɛk.

²¹Kwa nza berete ta Nde sleke ŋkwa le hɛ, kwele kwele mbeli nyi kezhɛrete wənəa nci laka nza kaka yɛte Shala.

²²Ma kwa fave ghena shɛ Jikə ta ka Kriste nyi pelɛ Zhɛrəzalɛm, pa hɛ ghweneghe nda Barnabas ke ka Antiyoshe.

²³Ma kwa ntsehe ŋkɛ ne, pa ŋkɛ nakɛ slene ganyɛ nya menete Shala ba'a zlamate zlama. Pa ŋkɛ ntsəte nda berete ke hɛ pɛtɛ kanza dɛŋe dɛŋe te Nde sleke ŋkwa.

²⁴Nahe Barnabas kenza kawəndə ganyɛ, nya viɗi va Sefəa Shala ba'a nya kendeke nda ghə ke Shala. Vatse se mbeli kwele kwele sha Nde sleke ŋkwa.

²⁵Kwa sebe ta ŋkɛ, cape Barnabas kadzawa Tarse kezha sepa Sol.

²⁶Ma kwa ntsate ŋkɛ ŋkɛ ne, pa ŋkɛ keleke ŋkɛ kadzembe Antiyoshe. Pa hɛ bake nci vanji hwa Jikə ta ka Kriste nya te ŋkwa shɛ ba'a tekete nda wəshi ke mbeli kwele kwele. Kwa Antiyoshe ghate mbeli kaheka ka təkwə təkwə Yɛsə kaka Kriste.

²⁷Ma vəa ŋkwa shɛ ne, nahe kweci ka mɛ ŋkwa ta Shala kesawa pelɛ Zhɛrəzalɛm kadzawa Antiyoshe.

²⁸Pa kwete wəndəa nci nya nza sləa ŋkɛ Agabəs, laka Sefəa Shala gezete tsema tsema temene geva ma nya wəba te hɛɗi pɛtɛ. Kaganda ne, nahe ma kemenete geva kala nya gezete ŋkɛ te və nya nza Klode kaSɛzar.

²⁹Tagha gɛ, pa ka təkwə təkwə Yɛsə tarete kezha ghwene wəsə yayata wəndə kala berete ta ŋkɛ kakemane ka kesaka ma nyi mbe Zhəwdɛ.

³⁰Pa hɛ tsenete cɛdɛ ba'a ghweneghe yɛ Barnabas le Sol kave nda ŋkɛ ke mbelia jama nyi mbe Zhəwdɛ.