Read kapsiki Slene 20 Bible Online

Slene 20 - kapsiki bible

Slene 20

¹Ma kwa peslenji mbeli nyighɛ ne, pa Pol hekakɛ ka təkwə təkwə Yɛsə pɛtɛ. Pa gezete nda ghena ke hɛ yitea mtsehe nda berete ke hɛ. Pa ŋkɛ njiŋwakɛ hɛ, cape ŋkɛ kadzembe Masɛdowane.

²Ma kwa jive ŋkɛ mbe hɛɗia shɛ ne, pa ŋkɛ mtsehete nda berete ke ka kesaka ma le ghena nyi geze nda ŋkɛ ke hɛ kwele kwele nda tedzembe Grɛse ŋkɛ.

³Ntishɛ ŋkɛ tagha katere mahekene. Ma vəa ŋkwa nya dzawa kwambelə ŋkɛ kadzembe Siri ne, pa ŋkɛ fate katsa ghena ka Zhəwif yite. Tagha gɛ, pa ŋkɛ tarete kajive laka Masɛdowane.

⁴Pa Sopatɛr, wəzege ta Pirəs, nde Bɛrɛ beghakɛ ŋkɛ, tsagha Aristarke, Sekəndəs, nde Tɛsalonike, Gayəs, nde Dɛrbe, Timotɛ, Tishike ba'a Trofime nde hɛɗia Azi.

⁵Mpelɛa hɛ lə ke ghen'yɛ, pa hɛ neghete n'yɛ mbe Trowas.

⁶Ma ghen'yɛ ne, kwetere wəmbəa gəsəkəa pɛaŋe nya ɗema tenjɛne hwe dzawa kwambelə ghen'yɛ mbe Filipe. Kwetere wəmbəa hɛ mcɛfe ne, pa ghen'yɛ ntsehe sha hɛ mbe Trowas, shikwə menete ghen'yɛ mbe.

⁷Ma hwa demase hetɛhwɛɗi ne, pa n'yɛ tsenete geva kezha zeme geva ta Yɛsə ba'a kasa mimia ŋkɛ. Ntake Pol kageze nda ghena ta Shala ke mbeli. Ma kwa nza ŋkɛ kateslə ŋkɛ hendɛ ne, pa ŋkɛ deranyɛ te ghena hwa'a te tepe ta viɗi.

⁸Kwele kwele paterela mbe cɛ nya mencikə nya tsenete geva ghen'yɛ mbe.

⁹Kwete mempɛhweta nya nza sləa kaEtishe ya mentishɛ mɛa wəfela ta cɛ. Pa ŋkɛ dzetenyɛ te hɛ ca'a ca'a va nya temə Pol kwele kwele te ghena. Ma kwa nza ŋkɛ te hɛ kashasha ne, pakatake ŋkɛ sawa pelɛ kwa maheke ta cɛ nya mencikə, 'yape ŋkɛ te ŋkwa. Ma kwa ɗe mbeli kakese ŋkɛ kasate ne, kemte mte ŋkɛ.

¹⁰Tagha gɛ, pa Pol sawa, berəɓə kənə ba'a kelete ŋkɛ yitea dzeve. Ma ke: «Nzama yɛ keyirə yirə ma, nahe ŋkɛ kenza teghweme.»

¹¹Pa ŋkɛ zhɛneghe geva kadzeme, neheve ɗafa ba'a zehwe. Ntake ŋkɛ kageze nda ghena ke mbeli zhɛkwa hwa'a va masheke. Ntəŋə ŋkɛ slənyɛ.

¹²Pa mbeli keleghe mempɛhweta shɛ teghweme kalə sha ghɛ, gweɗakwe wənəa pɛtɛa mbeli fate fate.

¹³Cape ghen'yɛ te kema kezha kele n'yɛ kwambelə kadzembe Asos, te ŋkwa shɛ tekele Pol ghen'yɛ kala nya gezete ŋkɛ, va nya ɗe ŋkɛ kakekave Asos le seɗa.

¹⁴Ma kwa kekave n'yɛ ŋkɛ mbe Asos, cape ghen'yɛ le kwa kwambelə kadzembe Mitilɛne.

¹⁵Cape ghen'yɛ slə tagha, hwa'a ghen'yɛ te hendɛ ta ŋkwa kwa kema ta Shiyo. Ma te kwa bake ta hɛ ne, hwa'a ghen'yɛ mbe Samos, te kwa maheke ta hɛ, hwa'a n'yɛ mbe Milɛ kwa sebe ta nya ghereŋe n'yɛ mbe Trozhiliyon.

¹⁶Kwa nza ŋkɛ nahe Pol ketarete kazlake Ɛfɛze kaɗema kaghereŋe, yitea ɗema ghen'yɛ kadera te hɛɗia Azi. Kawədə geva ŋkɛ kezha ntsehe pelɛ Zhɛrəzalɛm yipə yipə le gəsəkəa Pantekote, kenza nde kakekave ŋkɛ.

¹⁷Pa Pol ghweneke mɛ same kwa Milɛ kadzembe Ɛfɛze kezha heka mbelia jama ta Jikə ta ka Kriste kase.

¹⁸Ma kwa se hɛ shɛ ne, ma ke sha hɛ: «Nahe yɛ keɗepe nza nya nzahwe 'ya le gheyɛ, se te kwa ghate ta veci nya se 'ya te sla ta hɛɗia Azi.

¹⁹Nahe 'ya kemenete slene ta Nde sleke ŋkwa le shifə ghə, nehwene kwa ntsə ba'a yaka nyi sahwe 'ya va ghena nyi tsa ka Zhəwif.

²⁰Nahe yɛ keɗepe tsema tsema ɗema 'ya kawəfərəakɛ kwete ghena nya kenza kakemanakɛ ŋayɛ. Nahe 'ya kese kazlape ŋayɛ ba'a kateke ŋayɛ ghena ta Shala hwa mbeli ba'a dzeyi ki ghɛa ŋayɛ.

²¹Nahe 'ya kehekakɛ pɛtɛa mbeli, ka Zhəwif ba'a kweci hwelefefi, yitea zhɛre geva hɛ kase sha Shala ba'a yitea yɛ Nde sleke ŋkwa Yɛsə hɛ.

²²Ama tsetsenya, 'ya kadzeme Zhɛrəzalɛm kala nya tərənə ɗa Sefəa Shala, keɗepe wəsə nya ketemene ɗa geva 'ya pelɛagha we.

²³Ama wəsə nya ɗepe 'ya, mbe yayata meleme ne, nahe Sefəa Shala kencɛte ɗa neghe yaneghe ɗa yaka ba'a daŋgayɛ.

²⁴Ama sha 'ya ne, kenza mpia ɗa kawəsə nya za ma we. Ma wəsə nya za ma sha 'ya ne, kiɗimte slene ta ɗa ba'a tereke slene nya dapave ɗa Nde sleke ŋkwa Yɛsə, geze ta ŋkɛ, negha fete yitea Ghena kwatenca nya ganyɛ ta zlaɓe ta Shala.

²⁵Ma tsetsenya nahe 'ya keɗepe, mba kwete wəndəa ŋayɛ nyi se nyi 'ya kageze ŋayɛ ghena ta Meghea Shala katenakɛ ɗa zhɛkwa we.

²⁶Vatse gɛ, ma 'ya sha gheyɛ tsetsenya: ma kezanyɛ kwete hwa wəndəa gheyɛ ne, hwa ghena ta ŋkɛ 'ya we.

²⁷Kwa nza ŋkɛ pɛtɛ nahe 'ya kencɛmte ŋayɛ zəzə ta Shala, kaɗema kese 'ya kawəfərə kwete ghena.

²⁸Ya mə ghəa ŋayɛ ba'a ya mə timɛti nyi ndeke ŋayɛ Sefəa Shala kezha ya hɛ yɛ. Newe mə ghweme te Jikə ta ka Kriste nya mbeɗeke Shala laka mimia Wəzege ta ŋkɛ.

²⁹Nahe 'ya keɗepe, ma vəa ŋkwa nya slə ɗa 'ya ne, katedzehwa gheyɛ kweci mbeli kala yɛ makwagwele nyi ghyana ghyana, katesərə timɛti hɛ we.

³⁰Ya hwa gheyɛ ŋkɛ ne, katesla tseŋwə kweci mbeli kezha ghwete ka təkwə təkwə Yɛsə kazele hɛ.

³¹Ntsehwele mə gɛ, zəzəte mə nahe 'ya kegezete nda ghena 'ya ke yayata wəndəa ŋayɛ veci le viɗi le nehwene kwa ntsə kava mahekene.

³²Ma tsetsenya gɛ, kave ŋayɛ 'ya mbe dzeve ta Shala ba'a mbe ghena ta zlaɓa ŋkɛ. Berete ya ve kezha kele ŋayɛ jive te kema mbe yɛ, kezha ve nda wəshi ganji kala wəsə kezeme ghɛ ke pɛtɛa mbeli nyi kaŋa ŋkɛ.

³³Kese 'ya kasla ntsə yitea cɛdɛ ba'a lekwesa ta kwete wəndə we.

³⁴Nahe yɛ keɗepe le dzeve ta ɗa nyi menete slene 'ya kezha kemave wəsə kezeme kaŋa n'yɛ le mbeli nyi kebeghe ɗa.

³⁵Keveci keveci ncɛte ŋayɛ 'ya tsema tsema mene slene wəndə kezha kemane ka dewə ŋeli, laka zəzə ghena nya gezete Nde sleke ŋkwa Yɛsə wəndə le ghəa ŋkɛ, ma ke: Zeɗe nza ma va wəndə nya keve nda wəsə ke wəndə ke nya keŋ'we.»

³⁶Ma kwa gezete ghena shɛ Pol ne, gwəɗəŋə ŋkɛ le hɛ kasəkwə Shala.

³⁷Pɛtɛ hɛ kanehwene ba'a kahəməwə Pol kezha njiŋwe ŋkɛ kakwa keɗaŋe.

³⁸Nahe hɛ kenza keyirə yirə va nya gezete Pol ke hɛ kaɗema hɛ mba katenakɛ ŋkɛ. Pa hɛ beghakɛ ŋkɛ hwa'a yitea kwambelə.