Read kapsiki Slene 21 Bible Online

Slene 21 - kapsiki bible

Slene 21

¹Ma kwa nehemte geva ghen'yɛ le hɛ ne, ntəŋə n'yɛ le kwambelə kadzawa Kos kata kata. Te hendɛ ta ŋkwa ne, hwa'a ghen'yɛ mbe Rodɛs, cape ghen'yɛ slə tagha kadzembe Patara.

²Pa ghen'yɛ nakɛ kwambelə nya kelə kadzembe Fɛnisi. Tagha gɛ, pa ghen'yɛ dzawa, ntəŋə ghen'yɛ.

³Hwa'a ghen'yɛ takwa takwa yitea Shipre, kanewe newe n'yɛ kwa kwambelə ghen'yɛ. Pa ghen'yɛ dzeyi n'yɛ kwayite ta hɛɗi nya te tepe yɛməa shɛ kezha dzembe Siri. Pa ghen'yɛ sawa n'yɛ kwa kwambelə mbe Tir, kwa nza ŋkɛ tagha tebete wəshia nci hɛ.

⁴Shikwə kwetɛŋe menete ghen'yɛ te ŋkwa shɛ kwa begemete geva n'yɛ le ka təkwə təkwə Yɛsə tagha. Ma kwa ncɛte nda Sefəa Shala ke hɛ ne, pa hɛ gezete nda ke Pol kezha ɗema ŋkɛ kadzeme Zhɛrəzalɛm.

⁵Ama nahema ta shikwəa shɛ ne, ntəŋə n'yɛ yitea dzeghwa ta n'yɛ. Pa hɛ beghakɛ n'yɛ le mia nci ba'a ŋwalea nci kashave mbe meleme hwa'a pelɛke te ŋwela. Pa ghen'yɛ səkwəte ghə mɛ ndərə megwəɗəŋə.

⁶Ma kwa njinjiŋwakɛ ghəa n'yɛ n'yɛ ne, pa ghen'yɛ dzawa kwambelə, cape hɛ kalə sha ghɛa nci.

⁷Ma kwa kiɗimte dzeghwa ta n'yɛ ghen'yɛ le kwambelə se mbe Tir, hwa'a ghen'yɛ mbe Ptolɛmayis. Pa ghen'yɛ njiŋwakɛ ka kesaka ma nyi mbe melemea shɛ, hɛ kwetɛŋe menete n'yɛ le hɛ.

⁸Te hendɛ ta ŋkwa ne, ntəŋə ghen'yɛ yitea dzeghwa ta n'yɛ hwa'a mbe Sɛzarɛ. Pa ghen'yɛ dzeki ghɛa Filipe, nde geze Ghena kwatenca nya ganyɛ, nya hwa mbeli nyi mberefaŋe nyi ntave Jikə ta ka Kriste mbe Zhɛrəzalɛm. Ntishɛ ghen'yɛ ki ghɛa ŋkɛ.

⁹Wəfaɗe deghelɛshi ya ve, kewəmeve zhili hɛ we, kageze ghena kelɛŋə hɛ.

¹⁰Ɓɛhwɛ hɛakɛ hɛ n'yɛ tagha, pɛkwe kwete nde mɛ ŋkwa same kwa Zhəwdɛ, Agabəs sləa ŋkɛ.

¹¹Pa ŋkɛ se sha ghen'yɛ, kelete hətə nya hwa hwə va Pol, pa ŋkɛ hwepete seɗa ta ŋkɛ ba'a dzeve ta ŋkɛ le, ma ke: «Ma ke Sefəa Shala: Ma wəndə ke hətə nya ne, tsetse tehwepe ŋkɛ ka Zhəwif pelɛ Zhɛrəzalɛm, kateve nda ŋkɛ hɛ ke kweci hwelefefi.»

¹²Ma kwa fate ghena shɛ ghen'yɛ ne, ntake ghen'yɛ le ka Kriste nyi mbe Sɛzarɛ kampi nda dzeve ke Pol kezha ɗema ŋkɛ kadzeme Zhɛrəzalɛm.

¹³Ama ma ke sha ghen'yɛ: «Wa raberə nehwene yɛ kezha sla heli hwa 'ya wa? Ma 'ya ne, kehite geva 'ya deke kezha hwepe ɗa mbeli we, ama kezha mte pelɛ Zhɛrəzalɛm te sləa Nde sleke ŋkwa Yɛsə.»

¹⁴Ma kwa shaŋe ghen'yɛ va fɛa ŋkɛ ne, bivə ghen'yɛ nza n'yɛ, ma ke ghen'yɛ: «Menete geva ŋkɛ kala nya ɗe Nde sleke ŋkwa.»

¹⁵Ma kwa hɛakɛ hɛ ghen'yɛ tagha, pa n'yɛ hite geva, cape n'yɛ kadzeme Zhɛrəzalɛm.

¹⁶Pa ka təkwə təkwə Yɛsə nyi mbe Sɛzarɛ begheghe n'yɛ, pa hɛ keleghe n'yɛ kadzeki ghɛa Menason, nde Shipre, nya kande zele Yɛsə ghalanza.

¹⁷Ma kwa ntsehe ghen'yɛ pelɛ Zhɛrəzalɛm ne, pa ka kesaka ma kemaneve n'yɛ le zlama.

¹⁸Ma te hendɛ ta ŋkwa ne, pa ghen'yɛ le Pol lə sha Zhake. Ki ghɛa ŋkɛ tsenete geva pɛtɛa mbeli nyi jama ta Jikə ta ka Kriste.

¹⁹Pa Pol njiŋwakɛ hɛ, pa ŋkɛ gezete nda pɛtɛa wəshi nyi menete Shala laka gheŋkɛ hwa kweci hwelefefi ke hɛ.

²⁰Ma kwa fate hɛ ne, ntake hɛ katsahe Shala. Ma ke hɛ sha Pol: «Wəza meyɛ n'yɛ, nahe na kenakɛ tsema tsema zhɛrenji ka Zhəwif tipə tipə kaka Kriste. Pɛtɛa nci kenza dɛŋe dɛŋe te wəsə mahalegəa nci.

²¹Nahe hɛ kefave ghena nyi geze mbeli te gha: nahe na ketekete nda ke ka Zhəwif nyi hwa kweci hwelefefi kasərə wəsə mahalegəa Shala. Nahe na kegezete nda ke hɛ kezha ɗema hɛ kasla nda mɓɛta ke ŋwalea nci ba'a kazele wəshi keshia ka Zhəwif.

²²Tsema temene gheɓəmə wa? Kwa nza ŋkɛ ne, katefa hɛ nahe na kese teke.

²³Menete wəsə nya tegeze ŋa ghen'yɛ gɛ. Kweci mbeli ya shɛ wəfaɗe va ghen'yɛ nyi kemenete nda meɗe mɛ ke Shala.

²⁴Hekakɛ hɛ kase, mene wəsə keshi le hɛ kezha yaɓe ghəa ŋa na ba'a ŋkikɛ cɛdɛ nya zamte hɛ kezha ŋsəmte ghəa nci hɛ. Ma tsagha ne, pɛtɛ mbeli kateɗepe tseŋwə yaslave ŋa mbeli. Pɛtɛ hɛ kateɗepe kayɛ fete na yitea wəshi mahalegəa ɓəmə.

²⁵Ma kweci hwelefefi nyi kezhɛrenji kaka Kriste ne, nahe ghen'yɛ kerafave nda palepa ke hɛ te ghena nyi tsahwe gheɓəmə, kezha ɗema hɛ kezeme slia wəshi keseɗa nyi dzeghekɛ nda melɛ mbeli le hɛ ke wəshi nyi zhɛrete mbeli kashala, kezha ɗema hɛ kazeme mimi ba'a wəsə keseɗa nya slamtema ghə mbeli yite, kezha ɗema hɛ kamene mefətekwə.»

²⁶Pa Pol fəke mbelia shɛhɛ. Ma te hendɛ ta ŋkwa ne, pa ŋkɛ menete wəsə keshi le hɛ kezha yaɓe ghəa ŋkɛ. Kwa sebe ta ŋkɛ, ntəŋə ŋkɛ kadzembe ghɛa Shala kezha geze nda veci nya tedzeghe melɛ mbeli kaŋa yayata wəndəa nci, vəa ŋkwa nya kiɗi yaɓe geva ta nci.

²⁷Takwa takwa hɛa yaɓe geva nyi mberefaŋe kakiɗi nda nakɛ Pol ka Zhəwif nyi kese te sla ta hɛɗia Azi mbe ghɛa Shala. Pa hɛ vaghe gaŋkəɗə geva hwa mbeli ba'a keseve Pol.

²⁸Ma ke hɛ sha lewela: «Ka Israyɛl, kemane n'yɛ mə. Wa nya mə wəndə nya kekele zləvə te hwelefe ta ɓəmə, wəsə mahalegəa ɓəmə ba'a te ghɛa Shala nya mbe wəshi nyi teke nda ŋkɛ ke mbeli. Ɓiyitsa ne, pa ŋkɛ fəghe kweci hwelefefi kadzembe ghɛa Shala ba'a zhɛrete ŋkwa nya keveyi geva nya tekeleke wale wale.»

²⁹Kwa nza ŋkɛ nahe hɛ kenakɛ ŋkɛ le Trofime, nde Ɛfɛze dzeyi mbe meleme nda geze hɛ tsagha. Ma zəzə hɛ ne, nahe Pol kekeleghe ŋkɛ kadzembe ghɛa Shala.

³⁰Pa hɛ veyi gaŋkəɗə mbe meleme ba'a pa mbeli hwɛke hwɛ se te yayata ŋkwa. Pa hɛ keseve Pol ba'a ntsehakave ŋkɛ shave mbe ghɛa Shala, pa hɛ ŋzlete yɛ ŋkwa kedzembe.

³¹Kaɗe hɛ kapesle Pol nda gezete nda mbeli ke wəndə kwelea ka sewajɛa ka Rome, ma ke mbeli shɛ: «Kwele kwele gaŋkəɗənyɛ Zhɛrəzalɛm.»

³²Te ŋkwa shɛnyɛ, pa ŋkɛ tseneke mbeli nyi te ghəa ka sewajɛ ba'a sewajɛa nci, təkwəsəmə hɛ le hwɛ kalə sha mbeli. Ma kwa nakɛ wəndə kwelea ka sewajɛ hɛ le ka sewajɛ ŋkɛ, pa hɛ ɗema ɗa Pol.

³³Pa wəndə kwelea ka sewajɛ lə kakeseve Pol ba'a gezete kezha hwepe ŋkɛ mbeli le zewe lɛ bake. Zhɛne ne, pa ŋkɛ 'yɛwete wa ŋkɛ wa ŋkɛ ba'a wəsə nya menete ŋkɛ.

³⁴Ama kwete wəsə yazlape kweci, kwete ŋa kweci. Ma kwa shaŋe wəndə kwelea ka sewajɛ kaɗepe ghena nya kaganda nya kemenete geva ne, pa ŋkɛ gezete kezha kele Pol mbeli kadzembe ŋkwa nya berete.

³⁵Ma kwa ntsehe Pol yitea taŋa ne, pa ka sewajɛ kelete ŋkɛ te dzeve kadzeme, va nya ɗe mbeli kapesle ŋkɛ,

³⁶kwa nza ŋkɛ ma ke pɛtɛa mbeli nyi kwa sebe ta ŋkɛ sha tsa lewela: «Peslekɛ mə ŋkɛ!»

³⁷Ma takwa takwa mbeli kadzembe ŋkwa nya berete ne, ma ke Pol sha wəndə kwelea ka sewajɛ: «Kandeke ɗa hweŋkwa na gezete ŋa ghena 'ya tse yi?» Ma ke wəndə nya te ghə ka sewajɛ shɛ: «Nahe na keɗepe geze ghena Grɛk na?

³⁸Kenza na kande Ɛzhipte nya ketsəkwəyite mbeli yitea fama ghena ba'a nya kefəghe ka mpə ŋkwa slibə wəfaɗe kadzete ɓerama wəka?»

³⁹Ma ke Pol shɛ: «Ma 'ya ne, nde Zhəwif 'ya. Kwa Tarsea ka Silisi yake ɗa mbeli, kawəndə meleme nya nza zləvə te 'ya. Təhwə təhwə ŋa 'ya, ndeke ɗa hweŋkwa yitea geze nda ghena ke mbeli nyi.»

⁴⁰Pa wəndə kwelea ka sewajɛ pelave nda hweŋkwa. Pa Pol slete pelɛ taŋa ta ŋkwa ka sewajɛ, gweɗakwete mbeli le dzeve. Ma kwa nza hɛ tikə tikə ne, ma ke Pol sha hɛ le ghena ta ka Ɛbrə: