Read kapsiki Slene 23 Bible Online

Slene 23 - kapsiki bible

Slene 23

¹Mteghere Pol sha ntsə te mbeli nyi te ghəa hɛɗi, ma ke: «Ka kesaka ma, le wənə nya ganyɛ nzahwe nza 'ya kwa kema ta Shala ghalanza pa ɓeshi nya.»

²Pa Ananiyas, wəndə kwelea ka dzeghe Shala gezete kezha mpa Pol mbeli nyi dzeme vare gheŋkɛ le dzeve te mɛ.

³Ma ke Pol: «Shala nde teɗa ŋa le ŋa ŋkɛ, ndeɗe kwa ntsə na. Kezha meha ghwə kala nya ɗe wəshi mahalegəa ɓəmə ntishɛ na teke, ama nahe na kegezete kezha mpa ɗa mbeli tekeleke le wəsə nya geze wəsə mahalegə.»

⁴Ma ke mbeli nyi vare Pol shɛ: «Wəndə kwelea ka dzeghe Shala yaŋele na na?»

⁵Ma ke Pol: «Ka kesaka meyɛ ɗa, keɗepe 'ya kawəndə kwelea ka dzeghe Shala ŋkɛ we. Kwa nza ŋkɛ ma ke Ghena ta Shala: Ŋelema wəndə nya te ghəa hwelefe ta ŋa na ma.»

⁶Nahe Pol keɗepe ka Sadəsɛyɛn ba'a ka Fariziyɛn ya shɛ hwa mbeli nyi te ghəa hɛɗi, vatse gɛ, ma ke zlapete kwa kema ta nci: «Ka kesaka ma, nde Fariziyɛn 'ya le ghəa ɗa, wəzege ta nde Fariziyɛn 'ya. Va nya neghe same ta mbeli kwa kwele le mpi 'ya nda keleke ɗa mbeli kadzete ghwə.»

⁷Ma kwa gezete nda ghena shɛ ŋkɛ ke hɛ ne, ntake ka Fariziyɛn ba'a ka Sadəsɛyɛn kaghəpə kwelɛ ghəa nci, bake neheve geva hɛ mbe.

⁸Kwa nza ŋkɛ ma ke ka Sadəsɛyɛn sha geze: «Kasame mbeli kwa kwele le mpi we, nde ghwene ta Shala shɛ we, kweci mbeli nyi nakɛma mbeli shɛ we.» Ama kayɛ hɛ ka Fariziyɛn le ŋa nci.

⁹Ntake pɛtɛa mbeli katsa lewela le berete. Pelɛhetɛme kweci ka rafe wəsə mahalegə sate hwa ka Fariziyɛn. Ma ke hɛ le berete: «Kenakɛ fete ta wəndə nya ghen'yɛ we. Nda wəndə nya ɗema mbeli kanakɛ keɗema nde ghwene ta Shala nde gezete nda ghena wəka?»

¹⁰Pa hɛ tsehate mɛ kwele kwele, pa wəndə kwelea ka sewajɛ ghazlənənyɛ yagha hɛ kaslekwemte Pol. Vatse gezete nda ŋkɛ ke ka sewajɛa ŋkɛ kadzawa hwa tsene kezha zləgwə Pol shave mbe dzeve ta nci ba'a kezha kele ŋkɛ kalə kadzembe ŋkwa nya berete.

¹¹Ma mbe viɗi nya kedzeyite ne, pa Nde sleke ŋkwa se sha Pol, ma ke: «Hwepe ghɛ deŋwa! Nahe na keneghate fete yitea 'ya teke mbe Zhɛrəzalɛm, nda na kaneghate fete tsagha mbe Rome.»

¹²Ma te hendɛ ta ŋkwa masheke ne, pa ka Zhəwif tsahwe ghena ba'a zemete fela kezha zemema wəsə kezeme wəsə ba'a kezha sama wəsə kesa keɗema hɛ kepeslekɛ Pol.

¹³Ma mbeli nyi kezemete fela shɛ ne, kwele ma hɛ ke wəfaɗemsə.

¹⁴Pa hɛ lə sha mbeli nyi te ghəa ka dzeghe Shala ba'a mbelia jama, ma ke hɛ: «Nahe n'yɛ kezemete fela mbe kema ta Shala kezha zemema wəsə kezeme keɗema n'yɛ kepeslekɛ Pol.

¹⁵Ma gheyɛ mbelia jama ba'a mbeli nyi te ghəa hɛɗia ka Zhəwif ne, 'yɛwe mə va wəndə kwelea ka sewajɛa kezha keleke Pol ŋkɛ kadzawa kema ta ŋayɛ kezha newe ghena ta ŋkɛ yɛ tiɗiɗi. Ma ghen'yɛ gɛ ne, nahe ghen'yɛ kehite geva kezha pesle ŋkɛ kwa hweŋkwa nda tetsehe ŋkɛ teke.»

¹⁶Ama nahe wəzege ta wəzha ta meghekɛa Pol kefate ghena ta tsa ghena shɛ. Cape ŋkɛ kalə kadzembe ŋkwa nya berete kezha geze nda ke Pol.

¹⁷Pa Pol hekakɛ kwete wəndə nya te ghəa ka sewajɛ, ma ke shɛ: «Begheghe wəzege nya kalə sha wəndə kwelea ka sewajɛ, gheŋkɛ ɗe kageze nda ghena.»

¹⁸Cape ŋkɛ le kalə sha wəndə kwelea ka sewajɛ le, ma ke: «Pol nde daŋgayɛ nya nde hekakɛ ɗa kezha beghe wəzege nya kase sha gha, ghena ya ve kageze ŋa.»

¹⁹Pa wəndə kwelea ka sewajɛ keseve wəzegea shɛ te dzeve, ntəŋə ŋkɛ le, ma ke 'yɛwete ve: «Wa ghena nya ɗe na kageze ɗa wa?»

²⁰Ma ke shɛ: «Ka Zhəwif tsahwe ghena kezha 'yɛwe va gha kakele Pol kase hendɛ kadzehwa tsene ta mbeli nyi te ghəa hɛɗi kezha newe ghena ta ŋkɛ tiɗiɗi.

²¹Ama yɛma na ma, kwa nza ŋkɛ za ma ke wəfaɗemsə mbeli nyi keceha Pol kwa hweŋkwa. Nahe hɛ kezemete fela kaɗema kazeme wəsə kezeme ba'a kasa wəsə kesa keɗema hɛ kepeslekɛ Pol. Nahe hɛ kehimte geva pɛtɛ tsetsenya, mɛa ŋa yaneghe hɛ.»

²²Tagha gɛ, ma ke wəndə nya te ghəa ka sewajɛ sha wəzegea shɛ: «Geze nda ma ghena nya gezete ɗa nya na ke kwete wəndə ma.» Kwa sebe ta ŋkɛ, pa ŋkɛ sərəakɛ ŋkɛ kaslə.

²³Pa wəndə nya te ghəa ka sewajɛ hekakɛ mbelia jama ta ka sewajɛa bake taghanyɛ: Tsenete mə ka sewajɛ gwəmsə bake, mberefaŋemsə ka zleɗe gədəwə ba'a ka megha gwəmsə bake, nza mə ɗeke ɗeke kezha dzawa Sɛzarɛ nahe ɗafa heshi.

²⁴Hite mə gədəwəa lɛmə kezha kele Pol lɛŋe lɛŋe kalə sha ŋgwamna Fɛlikse[14].

²⁵Ma ke rafave nda palepa:

²⁶«'Ya Klode Lisiyas nde njiŋwe kwelea ɗa ŋgwamna Fɛlikse.

²⁷Nahe ka Zhəwif keŋsleyi vəkwə kezha pesle wəndə nya ghwenakɛ ŋa nya 'ya. Ma kwa fate 'ya kande hɛɗia Rome ŋkɛ ne, pa 'ya se le ka sewajɛa ɗa ba'a zləgwəke ŋkɛ.

²⁸Ma kwa ɗe 'ya kaɗepe wəsə nya ndeke nda fete hɛ te ne, pa 'ya keleke ŋkɛ kadzawa kema ta mbeli nyi te ghəa hɛɗi.

²⁹Newe 'ya ne, te ghena ta wəsə mahalegəa nci ve nda fete hɛ, ama kenakɛ fete ta ŋkɛ mbeli wərə pesle ŋkɛ ba'a wərə ve ŋkɛ kwa daŋgayɛ we.

³⁰Ɓiyitsa, ma kwa fate 'ya kaɗe ka Zhəwif kapesle ŋkɛ ne, nahe 'ya keghweneghe ŋa ŋkɛ. Nahe 'ya kegezete nda ke mbeli nyi keve nda fete yitea lə hɛ le ghena shɛ sha gha.»

³¹Pa ka sewajɛ menete kala nya gezete nda mbeli ke hɛ. Pa hɛ keleghe Pol te viɗia shɛnyɛ kadzembe Antipatris.

³²Ma te hendɛ ta ŋkwa ne, pa ka sewajɛ nyi le seɗa zhɛneke geva kase kadzawa ŋkwa nya berete ba'a sərəakɛ ka zleɗe gədəwə kabeghe Pol.

³³Ma kwa kekave Sɛzarɛ hɛ ne, pa ka zleɗe gədəwə ndeke nda palepa ke ŋgwamna ba'a ncɛte nda Pol.

³⁴Pa ŋgwamna jaŋgate palepa ba'a 'yɛwete sla ta hɛɗi nya nza Pol te. Ma kwa fave ŋkɛ kande Silisi ŋkɛ ne,

³⁵ma ke shɛ: «Ma kese mbeli nyi kendeke ŋa fete ne, kate'yɛwe ghena 'ya va gha.» Pa ŋkɛ geze nda ke mbeli kave Pol ki ghɛ meghea Hɛrode.