Read kapsiki Slene 27 Bible Online

Slene 27 - kapsiki bible

Slene 27

¹Ma kwa tarete geva ŋkɛ le kwambelə teslə ghen'yɛ kadzembe Itali ne, pa mbeli ndeke nda Pol ba'a kweci ka daŋgayɛ ke Zhəliyəs, kwete wəndə nya te ghəa ka sewajɛ nyi mbe wəvəsəa Ogəste.

²Pa ghen'yɛ dzawa kwete kwambeləa ka Adramite, nya keɗe kalə laka hɛɗia Azi, cape ghen'yɛ slə. Nahe Aristarke nde Masɛdowane te hɛɗia Tɛsalonike kenza le ghen'yɛ.

³Ma te hendɛ ta ŋkwa hwa'a ghen'yɛ mbe Sidon. Nahe Zhəliyəs kenza megela laka Pol, pa ŋkɛ pelave nda hweŋkwa kalə sha ka mcɛhɛnyɛ kezha kemane ŋkɛ hɛ.

⁴Ma kwa slə ghen'yɛ tagha, pa n'yɛ dzeyi n'yɛ laka kwete bela ta Shipre nya ɗema sefə kavɛ kwele kwele te, va nya vɛ laka ghen'yɛ.

⁵Pa ghen'yɛ jive n'yɛ te ndərəa Silisi ba'a Pamfili, hwa'a ghen'yɛ mbe Mira, pa n'yɛ sawa n'yɛ te hɛɗia Lisi.

⁶Pa wəndə nya te ghəa ka sewajɛ ntsate kwambeləa ka Alɛgezandri nya keɗe kadzembe Itali ba'a veyi n'yɛ kwa.

⁷Kahɛ kwele kwele ne, le yaka dzeyi kwambelə te yɛmə. Tekwazhizhi kekave meleme ta Kenide ghen'yɛ. Ma kwa nza sefə kafɛa n'yɛ kelə mbe kema ne, pa ghen'yɛ dzeyi laka Salmonɛ te wəmbəa Krɛte, hɛɗi nya te tepe yɛmə, ŋkwa nya ɗema sefə shɛ kwele kwele.

⁸Ma kwa dzeghwa n'yɛ le yaka ne, pa ghen'yɛ kekave kwete ŋkwa nya nza sləa ŋkɛ kaŊkwa nyi ganji keghereŋe kwambelə, takwa takwa yitea meleme ta Lazɛ.

⁹Kwele kwele temə n'yɛ kwa hweŋkwa, nahe dzeghwa ta n'yɛ kezhɛrenyɛ dzawe, kwa nza ŋkɛ nahe səwəmayɛa kiɗi ta vɛa kekiɗi. Vatse gɛ, ma ke Pol sha hɛ:

¹⁰Mbelia ɗa, ma newe dzeghwa nya 'ya ne, nahe ŋkɛ kenza dzawe: katebeze kwambelə ba'a wəshi nyi kwa, zhɛne ne, weli keza nza mpia ɓəmə.»

¹¹Ama wəndə nya te ghəa ka sewajɛ ne, za ma fa ghena ta wəndə nya kwele nya kwa kwambelə ŋkɛ ba'a ŋa wəndə ke kwambelə ke ŋa Pol.

¹²Kenza ŋkwa keghereŋe kwambeləa shɛ ndeɗekə kezha nza te hefeghwe we, vatse tarete wəba ta mbeli kaslə tagha. Ma kenza ŋkɛ kapesle hɛ yite ne, kaɗe hɛ kekave Fɛnikse, kwete ŋkwa keghereŋe kwambelə ta ka Krɛte nya tepele pelɛ ghə ba'a kwake kwake kezha nza hefeghwe.

¹³Ntake sefə kavɛ same laka bela kwa zeme ɓɛhwɛ ɓɛhwɛ. Ma zəzə hɛ ne, wərə hɛ kayipəyi zəzə ta nci kwa. Pa hɛ nteɗemte lɛ keghereŋe kwambelə ba'a dzeghakɛ dzeghwa dzeyi vare hələbəa Krɛte.

¹⁴Tewə ketemə ne, pa kwete sefə nya heka mbeli kaErakilon se le berete te hɛɗia ka Krɛtea shɛ.

¹⁵Ntake ŋkɛ kakele kwambelə, shaŋe ghen'yɛ kadzeghwa va sefə, waɗe ghen'yɛ pelakɛ ghəa n'yɛ kakele n'yɛ ŋkɛ.

¹⁶Pa ghen'yɛ dzeyi n'yɛ kwayite ta kwete hɛɗi nya te tepe yɛmə nya nza sləa ŋkɛ kaKoda, pa nde fɛake n'yɛ sefəa shɛ ɓɛhwɛ. Le dzawe zləgwəke kwambelə nya ɓɛhwɛ ghen'yɛ.

¹⁷Pa hɛ veyi ŋkɛ kwa nya wəba, pa hɛ hwepeyi yɛ zewe kekese ŋkɛ dzeyi yitea kwambelə. Ma kwa zhɛ nda ghazlənə ke hɛ kedzete ndaleghe nya mɛa hɛɗia Libi ne, pa hɛ negheyi lɛ keghereŋe kwambelə kwa yɛmə. Waɗe hɛ pelakɛ sefə katsəkwə hɛ.

¹⁸Mba sefə nya wəba shɛ ka'yɛ n'yɛ le berete. Ma te hendɛ ta ŋkwa ne, ntake hɛ kabete wəshi kwa kwambelə kwa ndərə.

¹⁹Ma te kwa maheke ta hɛ ne, pa hɛ betemte wəshia kwambelə le dzeve ta nci.

²⁰Kahɛ kwele kwele ne, kenakɛ veci keɗema yɛ saseregwa mbeli we, mba sefəa shɛ kavɛ le berete. Ma zəzə n'yɛ ne, wəndə shɛ katembele we.

²¹Kwele kwele hɛ nci kaɗema kezehwe wəsə kezeme, pa Pol sate meslete hwa hɛ, ma ke: «Ka mcɛhɛ ɗa, ma ya nahe yɛ kefate ghena ta ɗa ne, nza kaslə mə mbe Krɛte we. Tsagha gɛ, katezamte wəshi gheɓəmə ba'a katenza yaka nyi te gheɓəmə we.

²²Ama tsetsenya ne, kasəkwə ŋayɛ 'ya kezha hwepe ghə yɛ, kaza wəndəa ŋayɛ we, deke kwambelə nde teza.

²³Ma heviɗi mshena ne, nahe nde ghwene ta Shala nya kesleke ɗa ba'a nya mene nda slene 'ya kese sha 'ya,

²⁴ma ke sha 'ya: Mba na keghazlənə Pol. Nda na kadzawa kema ta Sɛzar. Nahe Shala kembelete mbeli nyi nza na le hɛ tewəmbəreke gha.

²⁵Vatse geze ŋayɛ 'ya mbelia ɗa, hwepe mə ghə, kwa nza ŋkɛ nahe 'ya keyɛte Shala, kala nya geze ɗa ŋkɛ ne, tsagha temene geva ŋkɛ.

²⁶Ama katenegha geva gheɓəmə kadzete kwete hɛɗi nya te tepe ta ndərə.»

²⁷Nahe ŋkwa kenza te kwa meŋe wəfaɗeghəmbe ta viɗia n'yɛ kakele n'yɛ sefəa shɛ te ndərəa Mɛditɛranɛ. Ma te tepe ta viɗi ne, pa mbeli nyi kege kwambelə zəzəte tsema tsema nza hɛ takwa takwa yitea hɛɗi.

²⁸Pa hɛ negheyi wəsə kedzeghe ŋkwəɗə kwa ndərə ba'a sləyi mɛtre mahekenemsə mberefaŋeghəmbe ŋkɛ. Ma cakeɗake te kema ne, pa hɛ neghate ba'a sləyi mɛtre bakemsə degheseghəmbe.

²⁹Kaghazlənə hɛ yagha kwambelə kampəve nda geva ke pelɛ, vatse beteyi lɛ nyi keghereŋe kwambelə hɛ wəfaɗe likə kwetere wəmbə kezha neghe kiɗi ta ŋkwa.

³⁰Ma kwaɗe mbeli nyi kemene slene kwa kwambelə kahwɛ kambele ghəa nci ne, pa hɛ kelakawa kwambelə nya ɓɛhwɛ kezha lə kave lɛ keghereŋe kwambelə nya wəba te kema.

³¹Ma ke Pol sha wəndə nya te ghəa ka sewajɛ ba'a ka sewajɛa ŋkɛ: «Ma keɗema mbeli nyi kenza kwa kwambelə ne, kambele yɛ we.»

³²Tagha gɛ, pa ka sewajɛ slamte zewe ta kwambelə nya ɓɛhwɛ ba'a sərəakɛ ŋkɛ kaslə te ndərə.

³³Ma temə ɓɛhwɛ nda tesame veci, pa Pol geze nda ke hɛ kazeme wəsə kezeme, ma ke sha hɛ: «Newe ma mə hɛ meŋe wəfaɗeghəmbe ɓeshi kaɗema yɛ kezehwe wəsə.»

³⁴Kageze ŋayɛ 'ya kezha zeme wəsə kezeme yɛ kezha kemane ŋayɛ kambele ghəa ŋayɛ. Ɓiyitsa ne, wəndəa ŋayɛ shɛ kateza shintia ghəa ŋkɛ we.

³⁵Ma kwa gezete ghena nya Pol ne, pa ŋkɛ kelete ɗafa ba'a tsate nda ŋ'wese ke Shala kwa kema ta mbeli pɛtɛ, pa ŋkɛ neheve mbe, ntake ŋkɛ kazeme.

³⁶Tagha gɛ, pa pɛtɛa nci hwepete ghə ba'a zehwe ɗafa.

³⁷Gwəmsə bake ba'a mberefaŋemsə ŋkwaŋeghəmbe ghen'yɛ nyi kwa kwambelə cəkwəa n'yɛ.

³⁸Ma kwa zehwe ɗafa hɛ behe behe ne, pa hɛ beteyi ha kwa ndərə kezha nza kwambelə kɛfe kɛfe.

³⁹Ma kwa kiɗinyɛ ŋkwa ne, keɗepe hɛɗi hɛ we, ama pa hɛ nakɛ ndaleghe ba'a tarete kaghereŋe kwambelə vare, kenza ŋkɛ kapesle hɛ yite.

⁴⁰Pa hɛ pelemte lɛ nyi keghereŋe kwambelə ba'a sərəakɛ hɛ kadzawa ndərə, pa hɛ hwepeyi zlave nya ɓɛhwɛ kwa kema ta kwambelə kezha kele sefə kalə kadzete ndaleghea shɛ.

⁴¹Ama pa hɛ dzetenji te ndaleghe, kashɛ kwambelə zhɛne kadzeghwa we. Nahe ŋshia ŋkɛ kenza njifə mbe ndaleghe, kashɛ nde gaŋkəɗə mbe we. Pa yɛ gaŋkeɓe ta ndərə nyi berete berete ɓelemte zeweve ta ŋkɛ.

⁴²Kaɗe ka sewajɛ kampə ka daŋgayɛ yitea kwete wəndəa nci kambele le bamba.

⁴³Pa wəndə nya te ghəa ka sewajɛ fɛake hɛ va nya a ɗe ŋkɛ kambele Pol. Pa ŋkɛ gezete nda ke mbeli nyi keɗepe tsa bamba kezha ŋsle bale kadzete ndərə mpelɛa kezha jive kadzete hɛɗi.

⁴⁴Katejive kweci mbeli kwa sebe ta nci te sheghwə nyi slapesla slapesla keɗema te yɛ 'yɛmbea kwambelə. Tsetse menete hɛ nda ntsehe hɛ pɛtɛ te hɛɗi lɛŋe lɛŋe.