Read kapsiki Slene 28 Bible Online

Slene 28 - kapsiki bible

Slene 28

¹Ma kwa mbele ghen'yɛ ne, pa n'yɛ fate Malte sləa hɛɗi nya te tepe yɛməa shɛ.

²Pa mbeli nyi mbe menete n'yɛ ganyɛ. Ma kwa nza va kame ba'a kwa nza ntasle kwele kwele ne, pa hɛ mehate ghwə nya wəba nya kemaneve n'yɛ hɛ pɛtɛ yite.

³Pa Pol kelete ghəa sheghwə kadzemɛa ghwə, ama pa mentsape shave mbe va ghyana ta ghwə ba'a ciɗəate geva te dzeve ta ŋkɛ.

⁴Ma kwa nakɛ shishi hɛ te dzeve ta Pol ne, ma ke hɛ kwelɛ ghəa nci: «Nde pesle ŋkwa wəndəa shɛ kaganda, nahe ŋkɛ kembele same kwa ndərə, ama kesərəakɛ ŋkɛ nza tiɗiɗia Shala kanza teghweme we.»

⁵Ama pa Pol yisəyi shishia shɛ mbe ghwə, wəsə shɛ kese kazhɛ nda ke Pol we.

⁶Ma zəzə kweci mbeli ne, katekesle geva ta ŋkɛ ba'a kateteɗe ŋkɛ kamte taghanyɛ. Ama kwa sebe ta neghakɛ hɛ kavə kwele kwele ne, pa hɛ nakɛ kaɗema wəsə kezhɛte nda ke Pol. Tagha gɛ, pa hɛ mbeɗemte zəzə ta nci, ma ke hɛ: «Nahe ŋkɛ kenza kashala.»

⁷Takwa takwa ŋkwa shɛ yitea ghɛa wəndə nya kesleke hɛɗi nya te tepe yɛməa shɛ, nya nza sləa ŋkɛ kaPəbliyəs. Pa ŋkɛ keleghe n'yɛ kadzeki ghɛa ŋkɛ le ɗe, mahekene hɛa n'yɛ ki ghɛa ŋkɛ.

⁸Shewə yitenyɛa Pəbliyəs va ɗawa ba'a metse kwa mimi. Pa Pol lə kanewe ŋkɛ, səkwəte Shala kezha gheŋkɛ, veyi dzeve kənə ba'a mbete ŋkɛ.

⁹Ma kwetere wəmbəa ŋkɛ ne, pɛtɛ kweci ka zereghwe nyi te hɛɗia shɛ se shɛ, pa Pol mbelete hɛ.

¹⁰Nahe mbelia shɛhɛ kevate kwele tsape te ghen'yɛ. Ma kaslə ghen'yɛ kadzawa kwambelə ne, pɛtɛa wəshi nyi kehi ɗave n'yɛ hɛ kezha dzeghwa ta n'yɛ.

¹¹Ma kwetere wəmbəa tere mahekene, ntəŋə ghen'yɛ le kwambeləa ka Alɛgezandri nya heka mbeli kayɛ Diyoskəre, nya kekiɗimte feghwe te ŋkwa keghereŋe kwambelə nya te hɛɗia shɛ.

¹²Pa ghen'yɛ ntsehe mbe Sirakəze. Hɛ mahekene menete ghen'yɛ tagha.

¹³Ma slə ta n'yɛ tagha ne, ntəŋə ghen'yɛ dzeyi n'yɛ vare hələbə kezha dzembe Regiyo. Ma te hendɛ ta ŋkwa ne, ntake sefə kavɛ same laka bela kwa zeme, bake hɛa n'yɛ kwa hweŋkwa nda ntsehe n'yɛ mbe Pəwzolɛs.

¹⁴Ma mbe melemea shɛ ne, pa ghen'yɛ sləyi ka kesaka ma nyi ke'yɛwete kezha temə ghen'yɛ le hɛ kashikwə kwetɛŋe. Tsetse menete ghen'yɛ nda ntsehe ghen'yɛ mbe Rome.

¹⁵Nahe ka kesaka ma nyi mbe Rome kefate se ta n'yɛ, pa hɛ se kaneghe n'yɛ te shikwəa Apiyəs ba'a te ŋkwa nya nza Cɛ kehɛ mahekene. Ma kwa nakɛ hɛ Pol ne, pa ŋkɛ tsate nda hana ke Shala, fare fare wənəa ŋkɛ.

¹⁶Ma kwa ntsehe ghen'yɛ mbe Rome, pa mbeli pelave nda hweŋkwa ke Pol kanza ki ghɛ nya ɗe ŋkɛ le kwete sewajɛ nya keya ŋkɛ.

¹⁷Ma kwa sebe ta hɛ mahekene ne, pa Pol hekakɛ mbeli nyi te ghəa ka Zhəwif nyi mbe Rome kase shɛ. Ma kwa tsene hɛ ne, ma ke sha hɛ: «Ka kesaka meyɛ ɗa, ya 'ya ɗema kebezemte nda ghena ci'a ke hwelefe ta ɓəmə ba'a wəshi keshia ɓəmə ne, nahe mbeli kekeseve ɗa pelɛ Zhɛrəzalɛm ba'a kendeke nda ɗa ke ka Rome.

¹⁸Ma kwa 'yɛwakɛ ghena ka Rome va 'ya te ghwə ne, kaɗe hɛ kapele ɗa, va nya ɗema hɛ kenakɛ fete va 'ya gare pesle ɗa.

¹⁹Ama kaɗe ka Zhəwif we. Tagha gɛ, pa 'ya 'yɛwete se kadzawa kema ta Sɛzar; Ndagwara kaɗe 'ya kave nda fete ke hwelefe ta ɗa we.

²⁰Vatse 'yɛwete hweŋkwa kenewe ŋayɛ 'ya kezha geze ŋayɛ ghena shɛ. Kwa nza ŋkɛ tewəmbəreke wəndə nya neghe ka Israyɛl nda nza 'ya kwa zewe lɛ.»

²¹Ma ke hɛ shɛ: «Ghen'yɛ le ŋa n'yɛ ne, kekemave palepa ghen'yɛ same kwa Zhəwdɛ te ghəa ŋa we. Kwete hwa mbelia ɓəmə shɛ nya kesawa pelɛagha nya kegezete n'yɛ wəsə kwa ndiremi nya menete na we.

²²Ama kwa mɛa ŋa ɗe n'yɛ kafa wəshi nyi zəzə na, kwa nza ŋkɛ nahe n'yɛ keɗepe kaɗema mbeli kaɗe wəvəsə nya nza nya na mbe ta yayata ŋkwa.»

²³Pa hɛ sləyi veci le Pol. Ma te vecia shɛ ne, kwele kwele hɛ se sha Pol te ŋkwa nya hɛ ŋkɛ. Ghala kiɗi ŋkwa pa va tɛhwɛɗi ne, kanegha fete Pol te Meghea Shala ba'a kakese mehele ta nci ŋkɛ laka geze nda ghena ta Yɛsə ke hɛ shave mbe wəsə mahalegəa Moyize ba'a palepa ta ka mɛ ŋkwa.

²⁴Nahe kweci mbelia keyɛte ghena nya gezete ŋkɛ, ama keyɛte ghena shɛ kweci we.

²⁵Ma vəa ŋkwa nya slə hɛ ne, kenza hɛ kanya kwetɛŋe kwelɛ ghəa nci we, ma ke Pol sha hɛ: «Nda kaganda ghena ta Sefəa Shala kwa geze nda ghena ŋkɛ ke ka shihɛ ŋayɛ laka mɛa nde mɛ ŋkwa Ɛzayi.

²⁶Ma ke gezete: Kwiɗi sha mbeli nyi, ma pa na sha hɛ: Katefa ghena yɛ megela, ama katefa ghena nya mbe yɛ we, katenewe ŋkwa yɛ megela, ama kateneweve yɛ we.

²⁷Kaganda ne, ntɛaŋe ntɛaŋe ghəa mbelia shɛhɛ. Nahe hɛ kezhiɓəte sleme ta nci, keŋzlete ntsə ta nci, kezha ɗema ntsə ta nci kanakɛ ŋkwa, kezha ɗema sleme ta nci kafa ghena. Tagha gɛ, katezhɛre geva hɛ kase sha Shala. Tagha gɛ, katembele hɛ 'ya.

²⁸Ɗepete mə megela: ke kweci hwelefefi ghweneghe nda ghena ta mbele Shala perə, katefa hɛ ghena shɛ kwa ŋa nci.»

²⁹Ma kwa gezete ghena nya Pol ne, cape ka Zhəwif kalə kaghəpə kwelɛ ghəa nci le berete.

³⁰Bake va ta Pol ki ghɛ nya kelete ŋkɛ kaŋki te tere. Nahe ŋkɛ kekemaneve pɛtɛa mbeli nyi kese shɛ ŋkɛ.

³¹Kazlape nda Meghea Shala ŋkɛ ke mbeli ba'a kateke nda ghena ta Nde sleke ŋkwa Yɛsə Kriste ŋkɛ le gezleŋema ghə ba'a waɗe.