Read kapsiki Slene 3 Bible Online

Slene 3 - kapsiki bible

Slene 3

¹Ma kwa mtsa veci ne, cape yɛ Piyɛre le Zhaŋe kadzeme ghɛa Shala kezha səkwə ghə.

²Ma mɛa ghɛa Shala nya nza sləa ŋkɛ kaMɛa cɛ nya ndeɗe, tagha kwete wəndə nya yake mbeli sawa kwa hwə kagweleba. Keveci keveci kele ŋkɛ mbeli kase tagha yitea səkwə cɛdɛ ŋkɛ va mbeli nyi kedzembe ghɛa Shala.

³Newe ke ne, kase yɛ Piyɛre le Zhaŋe kadzembe ghɛa Shala. Ntake ŋkɛ kasəkwə wəsə va hɛ.

⁴Mteghere yɛ Piyɛre le Zhaŋe vate ntsə te wəndəa shɛ, ma ke Piyɛre shɛ: «Newe n'yɛ!»

⁵Mba wəndəa shɛ kanewe hɛ. Ma zəzə ŋkɛ ne, katekemave wəsə ŋkɛ va hɛ.

⁶Ma ke Piyɛre shɛ: «Mze kwa tɛawetɛa keɗema mze kwa tere tere va 'ya we. Ama wəsə nya va 'ya ne, kave ŋa ŋkɛ 'ya: le sləa Yɛsə Kriste, nde Nazarɛt ne, sate kadzeghwa.»

⁷Pa ŋkɛ keseve ŋkɛ te dzeve kwa zeme ba'a kesakate ŋkɛ te ŋkwa. Te ŋkwa shɛnyɛ ne, pa yɛ seɗa ta ŋkɛ ba'a yɛ daŋwela ta ŋkɛ kemave berete.

⁸Pelɛhetɛme ŋkɛ sate te seɗa ta ŋkɛ, ntake ŋkɛ kadzeghwa. Shilimə ŋkɛ mbe ghɛa Shala le hɛ le dzeghwa, bale ba'a tsahe Shala.

⁹Nahe pɛtɛa mbeli kenakɛ ŋkɛ kadzeghwa ba'a katsahe Shala.

¹⁰Ma kwa ɗepe hɛ gheŋkɛ gweleba nya kese mentishɛ mɛa Mɛ nya ndeɗe ta ghɛa Shala kezha səkwə wəshi ne, pa hɛ dakenji ba'a nzanji heheɓake pɛtɛa nci, va wəsə nya kemenete nda geva.

¹¹Ma kwa ɗema wəndəa shɛ slə yitea yɛ Piyɛre le Zhaŋe ne, pɛtɛ mbeli heheɓake, kase mbeli kwele kwele sha hɛ le hwɛ kadzembe gelɛŋka nya heka mbeli kaGelɛŋka ta Salomon.

¹²Ma kwa nakɛ wəsəa shɛ Piyɛre ne, ma ke sha hɛ: «Ka Israyɛl, va wa nza yɛ heɓake va mbe ta wəndə nya wa? Va wa newe yɛ kala ghen'yɛ nde mbete wəndə nya le berete ta n'yɛ keɗema va nya ndeke nda ghə n'yɛ ke Shala wa?

¹³Nahe Shala ta ka shihɛ ɓəmə, Shala ta Abraham, Izak ba'a Zhakob kendeke nda zləvə ke wəndəa ŋkɛ nya kemene nda slene, gheŋkɛ Yɛsə. Gheyɛ le ghəa ŋayɛ ka pamte Yɛsə ba'a ka wəfəyite ŋkɛ kwa kema ta Pilate kwa ɗe ŋkɛ kapele ŋkɛ.

¹⁴Pa yɛ ɗema wəndə nya keveyi geva tekeleke ba'a nya tiɗiɗi. Nahe yɛ ke'yɛwe kezha pele ŋayɛ nde mpə ŋkwa mbeli.

¹⁵Nahe yɛ kepeslekɛ meghea mpi. Ama nahe Shala kekelakame ŋkɛ same kwa kwele, ghen'yɛ ya kaka negha fete yite.

¹⁶Te zlaɓa ta yɛ nya mbe sləa Yɛsə se mbele ta wəndə nya ɗepe nya yɛ ba'a nya newe nya yɛ. Yɛ nya yɛhwe Yɛsə wəndəa shɛ nde mbete ŋkɛ kwa ntsə ta ŋayɛ.

¹⁷Ma tsetsenya gɛ ka kesaka meyɛ ɗa, nahe 'ya keɗepe tsema tsema nza wəsə nya menete nda yɛ ba'a mbeli nyi te ghəa ŋayɛ laka ɗepema ta ŋayɛ.

¹⁸Ama kezha yipə ghena nyi se ka mɛ ŋkwa ta Shala pɛtɛ gezete ghena Shala. Nahe ŋkɛ kegezete katesa yaka Mɛsi.

¹⁹Ma gɛ ne, mpi mə dzeve ba'a zhɛre nda mə geva ke Shala kezha kelemte jaɗafa ta ŋayɛ ŋkɛ te wənə.

²⁰Tagha gɛ, kateve ŋayɛ yɛ vəa zhɛne mpi ba'a kateghwene ŋayɛ Yɛsə, Mɛsi nya ntave ŋkɛ vəashi ŋkɛ.

²¹Kaba ne, pelɛ ghweme tenza Yɛsə hwa'a te veci nya tezhɛre pɛtɛa wəshi kamɛnɛfɛ kala nya gezete Shala laka ka mɛ ŋkwa ta ŋkɛ nyi keveyi geva tekeleke.

²²Ma ke Moyize gezete: Kateghwene nde mɛ ŋkwa Mahwətə Shala ŋayɛ kala 'ya, katenza ŋkɛ kawəndə nya mbe hwelefe ta ŋayɛ, kateve sleme yɛ yitea ghena nyi tegeze ŋayɛ ŋkɛ.

²³Ma yayata wəndə nya ketefa nda ma ghena ke nde mɛ ŋkwa shɛ ne, katekele ŋkɛ mbeli shave hwa mbelia Shala ba'a katepesle ŋkɛ mbeli.

²⁴Nahe ka mɛ ŋkwa ta Shala ghala se te Saməyɛl ba'a nyi kese kwetere wəmbəa ŋkɛ kegezete ghena ta və nya tsetsenya.

²⁵Nahe meɗe mɛ nya meɗeyi nda Shala ke mbeli laka ka mɛ ŋkwa ta ŋkɛ kenza kezha gheyɛ. Ma gheyɛ ne, Nahe yɛ kenza mbe jikə geva nya menete Shala le ka shihɛ ŋayɛ yɛ, kwa nza ŋkɛ ma ke sha Abraham: Katewəpi mbeli nyi te hɛɗi 'ya laka hwelefe ta ŋa.

²⁶Kaŋa ŋayɛ mpelɛa kelakame nde mene slene ta ŋkɛ Shala kwa kwele, kezha wəpi ŋayɛ ghweneke ŋkɛ ŋkɛ laka zhɛremte yayata wəndəa ŋayɛ seyi vare jaɗafa ta ŋkɛ.»