Read kapsiki Slene 4 Bible Online

Slene 4 - kapsiki bible

Slene 4

¹Ma mba yɛ Piyɛre le Zhaŋe kageze nda ghena ke mbeli ne, hwa'a ka dzeghe Shala, mbeli nyi te ghəa ka ya ghɛa Shala ba'a ka Sadəsɛyɛn.

²Kwele kwele zhɛ nda wənəa nci ke hɛ va mbeli nyi bake nyi kegeze nda same ta Yɛsə kwa kwele ke mbeli, geze ta ŋkɛ, same ta mbelia kwahɛɗi kwa kwele.

³Pa hɛ keseve hɛ ba'a beteyi hɛ kwa daŋgayɛ pa va hendɛ, kwa nza ŋkɛ nahe tɛhwɛɗi kemene.

⁴Ya tsemanyɛ ŋkɛ ne, kwele kwele nyi keyɛte Shala hwa mbeli nyi kefave Ghena ta Shala, nahe mbelia Yɛsə Kriste kemtsehete geva gare slibə mcɛfe.

⁵Te hendɛ ta ŋkwa, pa mbeli nyi te ghəa ka Zhəwif ba'a mbelia jama ba'a ka rafe wəsə mahalegə tsenete geva mbe Zhɛrəzalɛm.

⁶Tagha yɛ Ane, wəndə kwelea ka dzeghe Shala, Kayife, Zhaŋe, Alɛgezandre ba'a pɛtɛa mbeli nyi kwa yita ta wəndə kwelea ka dzeghe Shala.

⁷Pa hɛ keleke yɛ Piyɛre le Zhaŋe kwa kema ta nci. Ma ke hɛ sha hɛ: «Wa nde ndeke ŋayɛ berete nya mbete wəndə nya yɛ le wa?»

⁸Tagha gɛ, pa Sefəa Shala viɗikɛ wənəa Piyɛre, ma ke sha hɛ:

⁹«Mbeli nyi te ghəa mbeli ba'a mbelia jama, ka'yɛwe ghena mbeli va ghen'yɛ ɓeshi te wəsə ganyɛ nya kemenete nda geva ke gweleba nya. Tsema tsema mbenyɛ wəndəa shɛ.

¹⁰Jara ɗepe yɛ, gheyɛ ba'a pɛtɛa ka Israyɛl: le sləa Yɛsə Kriste nde Nazarɛt nya baŋate yɛ te sheghwə, nya kelakame Shala same kwa kwele mbenyɛ wəndə nya newe nya yɛ lɛŋe lɛŋe mbe kema ta ŋayɛ.

¹¹Ma ke Ghena ta Shala gezete te ghəa ŋkɛ: Ma pelɛ nya neghakɛ gheyɛ ka ŋa ŋkwa ne, gheŋkɛ nde zhɛrenyɛ kapelɛa megwekwe.

¹²Deke gheŋkɛ nde nza kambelete ŋkwa, kwa nza ŋkɛ wəndə shɛ nya ncɛte nda sləa ŋkɛ Shala ke mbeli te hɛɗi lema kanza kambelete ɓəmə we.»

¹³Heheɓake mbeli nyi te ghəa meleme ta ka Zhəwif kwa nakɛ ghazlənəma ghə ta yɛ Piyɛre le Zhaŋe hɛ. Nahe hɛ kenza kambeli nyi gəmə ba'a kaka ɗepema wəshi. Nahe hɛ keɗepe hɛ kambeli nyi kese kadzeghwa le Yɛsə.

¹⁴Kanewe wəndə nya kembete geva hɛ tagha meslete, kashɛ hɛ zhɛne kwete ghena we.

¹⁵Tagha gɛ, pa hɛ gezete kezha ŋka ŋkɛ mbeli kajive. Ntake hɛ katseɓa ghena ta nci.

¹⁶Ma ke hɛ: «Tsema mene gheɓəmə le mbeli nyi tse wa? Kwa nza ŋkɛ nahe pɛtɛa ka Zhɛrəzalɛm keɗepe fate fate wəsə meŋele nya dzawe nya menete nya hɛ. Kashɛ gheɓəmə ghəpə yite we.

¹⁷Ama kezha ɗema ghena shɛ kapeslahwe geva hwa mbeli kahe kahe ne, nda gheɓəmə kafɛake hɛ le berete kegeze nda ghena ta Yɛsə ke yayata wəndə.

¹⁸Pa hɛ hekakɛ hɛ zhɛkwa ba'a fɛake hɛ fəyitekeghə kezhɛne kageze ghena keɗema kateke nda wəsə ke mbeli te sləa Yɛsə.»

¹⁹Ma ke yɛ Piyɛre le Zhaŋe sha hɛ: «Neghate mə fete le ghəa ŋayɛ, kenza ŋkɛ tiɗiɗi ŋkɛ kwa kema ta Shala kayɛ ŋayɛ fete ghen'yɛ za ma ke gheŋkɛ.

²⁰Ama ghen'yɛ le ŋa n'yɛ ne, kashɛ n'yɛ nza n'yɛ kegeze wəshi nyi nakɛ n'yɛ ba'a nyi fate n'yɛ we.»

²¹Pa mbeli nyi te ghəa meleme ta ka Zhəwif fɛake hɛ zhɛkwa le berete ba'a pelakɛ hɛ. Kenakɛ ghena nya nza hɛ kaveyi hɛ kwa daŋgayɛ hɛ te we, kwa nza ŋkɛ pɛtɛ mbeli katsahe Shala te wəsə nya kemenete geva.

²²Kwa nza ŋkɛ kwele ma ke wəfaɗemsə nza va ta wəndə nya kembete geva shɛ le meŋele.

²³Ma kwa pelakɛ hɛ mbeli ne, cape yɛ Piyɛre le Zhaŋe kalə sha ka mcɛhɛ nci. Pa hɛ gezete nda pɛtɛa ghena nyi gezete mbeli nyi te ghəa ka dzeghe Shala ba'a mbelia jama ke hɛ.

²⁴Ma kwa fate ghena shɛ hɛ ne, ma ke hɛ səkwəte Shala kanya kwetɛŋe: «Nde sleke ŋkwa, gha nde pate ghweme, hɛɗi, ndərə ba'a pɛtɛa wəshi nyi te hɛ.

²⁵Ma pa na gezete le Sefəa ŋa laka mɛa shia n'yɛ David, wəndə nya kemene ŋa slene: Yitea wa ɗəkwə ɗəkwə geva mbeli tse wa? Yitea wa tsa ghena hwelefefi gəmə tse wa?

²⁶Nahe ka meghea kɛfi nyi te hɛɗi lema kehi geva yite mpa ba'a nahe mbelia jama kejikəyite geva yitea Mahwətə ba'a meghe nya ntave ŋkɛ.

²⁷Kaganda ne, nahe yɛ Hɛrode le Ponse Pilate kejikəte geva mbe meleme nya le ka mtake ba'a ka Israyɛl yitea Yɛsə, nde mene slene ta ŋa nya keveyi geva tekeleke, nya ntave na kameghe.

²⁸Nahe hɛ kemenete pɛtɛa wəshi nyi ɗete na ba'a tarete na laka berete ta ŋa.

²⁹Ama tsetsenya gɛ Nde sleke ŋkwa, fa ŋgezle ta nci, ndeke nda berete ke mbeli nyi kemene ŋa slene kageze ghena ta ŋa le gezleŋema ghə.

³⁰Hake dzeve ta ŋa kezha mbe mbeli, mene geva wəshi kencɛ wəshi ba'a wəshi meŋele laka sləa Yɛsə, nde mene slene ta ŋa nya keveyi geva tekeleke.»

³¹Ma kwa kiɗimte səkwə ghə hɛ ne, ntake ŋkwa nya nza hɛ te kagaŋkəɗə. Pa Sefəa Shala viɗiyi geva mbe pɛtɛa nci, ntake hɛ kageze ghena ta Shala kaɗema ghazlənə hwa hɛ.

³²Nahe mbelia Yɛsə Kriste kenza jikə fate fate kanya mbe mehele ta nci ba'a wənəa nci. Wəndə shɛ hwa hɛ nya kegeze deke kaŋa ŋkɛ kwetɛŋenyɛ wəshia ŋkɛ we, ama nahe yayata wəsə nya va hɛ kenza kaŋa nci.

³³Le berete ta Shala neghate fete ka ghwene ta Yɛsə Kriste kwele kwele yitea same ta Nde sleke ŋkwa Yɛsə kwa kwele. Kwele kwele wəpikɛ hɛ Shala.

³⁴Wəndə shɛ hwa hɛ kedewə nda wəsə we. Kwa nza ŋkɛ yayata wəndə nya nza wəve ve, le ghɛ, pɛtɛ hɛ pamte hɛ ba'a keleke cɛdɛ nya kese te pɛtɛ,

³⁵kezha ve nda ke ka ghwene ta Yɛsə Kriste. Yayata wəndə kekemave kala nya ɗe ŋkɛ.

³⁶Banda ta ŋkɛ, pa wəve va kwete wəndəa nci nya nza sləa ŋkɛ kaZhozɛf, nde Lɛvi nya keya mbe Shipre ŋkɛ. Pa ka ghwene ta Yɛsə Kriste hekate nda slə kaBarnabas geze ta ŋkɛ, nde mtsehe nda berete ke mbeli.

³⁷Pa ŋkɛ pamte wəvea ŋkɛ, keleke cɛdɛa ŋkɛ ba'a ndeke nda ke ka ghwene ta Yɛsə Kriste.