Read kapsiki Slene 9 Bible Online

Slene 9 - kapsiki bible

Slene 9

¹Ma Sol le ŋa ŋkɛ ne, keveci keveci ɗe mpə ta mbeli nyi kezele Nde sleke ŋkwa ŋkɛ. Cape ŋkɛ kalə sha wəndə kwelea ka dzeghe Shala

²ba'a 'yɛwete yɛ palepa va ke mbelia jama ta cɛ kesəkwə ghə nyi mbe Damas. Ma kentsate mbeli nyi kezele hweŋkwa ta Nde sleke ŋkwa ŋkɛ, zhili keɗema mi mbe ne, katefə hɛ ŋkɛ kehwepe hwepe kase teke mbe Zhɛrəzalɛm.

³Ntəŋə ŋkɛ kwa hweŋkwa. Ma takwa takwa ŋkɛ yitea Damas ne, vəkə kwete waŋe sawa pelɛ ghweme kadzeghə, kaɓele ŋkɛ tɛawe tɛawe.

⁴Tahwepare ŋkɛ te hɛɗi, pa ŋkɛ fate kwete ghena, ma ke: «Sol, Sol, yitea wa ghweze mɛ na hwa 'ya wa?»

⁵Ma ke Sol: «Wa sləa ŋa wa Nde sleke ŋkwa?» Ma ke ŋwələa shɛ shɛ: «'Ya ya kaYɛsə nya ghweze mɛ na hwe.

⁶Ama sate, kwiɗi kadzembe meleme, kategeze ŋa wəsə nya temene na mbeli mbagha.»

⁷Pa mbeli nyi kebeghe Sol ghereŋenji, hehake hɛ, kashɛ hɛ geze kwete ghena va ghazlənə we. Kafa ghena shɛ hɛ, ama kenakɛ wəndə hɛ we.

⁸Pelɛhetɛme Sol sate te ŋkwa, newe ke sha ŋkwa ne, kashɛ newe ŋkwa we. Pa mbeli keseve ŋkɛ te dzeve kala ghwələ kadzembe Damas.

⁹Hɛ mahekene menete ŋkɛ kaghwələ, kaɗema kazeme wəsə kezeme ba'a kasa wəsə kesa.

¹⁰Kwete wəndəa Yɛsə nya nza sləa ŋkɛ kaAnaniyas ya mbe Damas. Pa Nde sleke ŋkwa ncɛte nda geva, ma ke shɛ: «Ananiyas.» -- «Wa nya 'ya nya, Nde sleke ŋkwa», a ke Ananiyas.

¹¹Ma ke Nde sleke ŋkwa shɛ: «Sate, kwiɗi tsetsenya kwa hweŋkwa nya nza sləa ŋkɛ kahweŋkwa nya Tiɗiɗi shɛ na dzeki ghɛa Zhəwdas, 'yɛwete nde Tarse nya nza sləa ŋkɛ kaSol. Ghə yasəkwə ŋkɛ tsetsenya

¹²ba'a newe yanewe wəndə nya nza slə kaAnaniyas ŋkɛ kadzeki kezha dape dzeve kənə yitea newe ŋkwa ŋkɛ zhɛkwa.»

¹³Ma ke Ananiyas shɛ: «Nde sleke ŋkwa, nahe 'ya kefate ghena nya geze mbeli te wəndəa shɛ ba'a wəshi nyi ndiremi ndiremi nyi menete nda ŋkɛ ke mbelia ŋa pelɛ Zhɛrəzalɛm.

¹⁴Kezha gheŋkɛ se ŋkɛ teke le berete nya ndeke nda mbeli nyi te ghəa ka dzeghe Shala kezha kese mbeli nyi keheka sləa ŋa.»

¹⁵Ma ke Nde sleke ŋkwa shɛ: «Kwiɗi, nahe 'ya kentave wəndəa shɛ kezha nza kande negha fete ta ɗa mbe kema ta kweci hwelefefi ba'a ka meghea kɛfia nci, tsagha ka Israyɛl perə.

¹⁶'Ya le ghəa ɗa nde tencɛ nda yaka nyi tesa ŋkɛ tewəmbəreke sləa ɗa.»

¹⁷Tagha gɛ, cape Ananiyas. Hwa'a ŋkɛ ki ghɛa shɛ, pa ŋkɛ dapaghe dzeve kənəa Sol, ma ke shɛ: «Sol, wəza meyɛ ɗa, nahe Nde sleke ŋkwa Yɛsə nya kencɛte ŋa geva kwa hweŋkwa nya se na kadzeghwa kwa keghweneke ɗa sha gha kezha zhɛne na kanewe ŋkwa ba'a kezha nza na viɗikɛ va Sefəa Shala.»

¹⁸Te ŋkwa shɛnyɛ ne, telakwe kwete wəsə teɗe sawa te ntsə ta ŋkɛ kala jɛpəli, kanewe ŋkwa ŋkɛ ghwɛaɗɛaɗɛa zhɛkwa. Pa ŋkɛ sate te ŋkwa ba'a pa mbeli menete nda batɛme.

¹⁹Ma kwa zehwe wəsə kezeme ŋkɛ ne, pa geva ta ŋkɛ kemave berete zhɛkwa. Pa Sol hɛakɛ hɛ le ka təkwə təkwə Yɛsə nyi kwa Damas.

²⁰Te ŋkwa shɛnyɛ, ntake ŋkɛ kazlape nda ghena ke mbeli mbe cɛ kesəkwə ghə, ma ke: «Yɛsə ya kaWəzege ta Shala.»

²¹Heheɓake mbeli nyi kefa ghena ta ŋkɛ, ma ke hɛ: «Ashɛ wəndə nya nde mpə mbeli nyi keheka sləa Yɛsə mbe Zhɛrəzalɛm wəka? Ashɛ yitea kese hɛ kalə sha mbeli nyi te ghəa ka dzeghe Shala se ŋkɛ teke wəka?»

²²Ama nahe berete kembakete nda geva ke Sol yitea geze ghena ta Yɛsə, kashɛ ka Zhəwif nyi mbe Damas zhɛne nda kwete ghena kwa ncɛte nda ŋkɛ ke hɛ nahe Yɛsə ya kaMɛsi we.

²³Kwetere wəmbəa hɛ ɓɛhwɛ ne, pa ka Zhəwif tsate ghena kezha pesle Sol.

²⁴Ama pa Sol fate ghena shɛ. Kalə mbeli kaya mɛ degha ta meleme viɗi le veci kezha pesle ŋkɛ.

²⁵Ama pa mbeli nyi yite keleghe ŋkɛ dzawa te zli kwa kwaciga le zewe.

²⁶Ma kwa dzeme Zhɛrəzalɛm Sol ne, pa ŋkɛ dzeghakɛ kajikə geva le mbeli nyi ketəkwə təkwə Yɛsə. Ama nahe pɛtɛa mbeli keghazlənənji ve, kayɛ kande təkwə təkwə Yɛsə nya kaganda ŋkɛ we.

²⁷Pa Barnabas beghakɛ ŋkɛ kalə sha ka ghwene ta Yɛsə Kriste ba'a gezete nda ke hɛ tsema tsema nakɛ Nde sleke ŋkwa Sol kwa hweŋkwa ba'a tsema tsema gezete nda Nde sleke ŋkwa. Pa ŋkɛ gezete nda ke hɛ tsema tsema ncɛte nda ghena ta sləa Yɛsə Sol le hwepe ghə ke ka Damas.

²⁸Ghala se mɛa vecia shɛ, jikə yɛ Sol le ka ghwene ta Yɛsə, dzeyi teke dzeyi teke ŋkɛ mbe Zhɛrəzalɛm kageze ghena te sləa Nde sleke ŋkwa le hwepe ghə.

²⁹Kageze nda ghena ke ka Zhəwif nyi kegeze ghena ta ka Grɛk perə, kaghəpə Sol le hɛ. Kazele hweŋkwa mbelia shɛhɛ kapesle ŋkɛ.

³⁰Ma kwa fate ka kesaka meghekɛ, pa hɛ begheghe Sol kadzembe Sɛzarɛ, zhɛne ne, kadzembe Tarse.

³¹Tagha gɛ, kwelɛŋe ya va Jikə ta ka Kriste nyi mbe Zhəwdɛ, Galilɛ ba'a Samari. Kantsə geva hɛ ba'a kahawe hɛ va Shala, kambake geva hɛ laka kemane ta Sefəa Shala.

³²Ma kwa nza Piyɛre kadzeghwa te yayata hɛɗi ne, pa ŋkɛ dzawa sha mbelia Shala nyi mbe Lida.

³³Pa ŋkɛ sləyi kwete wəndə nya nza sləa ŋkɛ kaƐnɛ, meɓelahe ŋkɛ te gezle ta ŋkɛ ghala va deghese, kemte mte geva ta ŋkɛ.

³⁴Ma ke Piyɛre shɛ: «Ɛnɛ, wa nya Yɛsə Kriste nya kambe ŋa. Sate, kelete gezle ta ŋa.» Te ŋkwa shɛnyɛ ne, pelɛhetɛme ŋkɛ.

³⁵Ma kwa nakɛ wəndəa shɛ ka Lida ba'a ka Saron ne, pa hɛ zhɛreke geva kase sha Nde sleke ŋkwa.

³⁶Kwete male nya keyɛte Yɛsə nya nza sləa kaTabita ya shɛ mbe Zhopɛ. Ma ghena mbe sləa nta le ghena ta ka Grɛk ne, Dorkas, geze ta ŋkɛ, kɛme. Kakwa mcɛlə nde ba'a kaɗa nda wəshi nde ke ka titikwəa kɛfi.

³⁷Pa zereghwe keseve vəa ŋkwa shɛ, mtiwə nde. Ma kwa pɛkɛ ŋkɛ mbeli ne, pa mbeli keleghe ŋkɛ kadzeme cɛ nya mencikə.

³⁸Takwa takwa yɛ Lida le Zhopɛ. Ma kwa fave ka təkwə təkwə Yɛsə mbe Lida Piyɛre ne, pa hɛ ghwenakɛ nda mɛ laka mbeli bake, ma ke hɛ shɛ: «Təhwə təhwə, nde kadzembe meleme ta n'yɛ kahe kahe.»

³⁹Ntəŋə Piyɛre le hɛ te ŋkwa shɛ. Ma kwa ntsehe hɛ ne, pa mbeli begheghe kadzeme cɛ nya pelɛ ghəa cɛa shɛ. Pɛtɛ ka wedidi nyi tagha tseneke nda geva le nehwene, pa hɛ ncɛte nda yɛ tɛagware ba'a lekwesa nyi tsate Dorkas kwa nza nde mba teghweme.

⁴⁰Pa Piyɛre gezete nda ke mbeli kajive. Pa ŋkɛ gwəɗəŋə kasəkwə ghə. Tewətelɛwe zhɛrete geva laka wəndə kemte mte, ma ke: «Tabita, sate ŋa.» Pa malea shɛ pelakɛ ntsə. Ma kwa nakɛ Piyɛre nde ne, pa nde sate nda mentishɛ.

⁴¹Pa Piyɛre keseve ŋkɛ te dzeve ba'a kesakate ŋkɛ. Pa ŋkɛ hekakɛ mbelia Yɛsə ba'a ka wedidi, pa ŋkɛ ncɛte nda ŋkɛ teghweme ke hɛ.

⁴²Nahe pɛtɛa ka Zhopɛ kefave ghena shɛ, kwele kwele nyi keyɛhwe Nde sleke ŋkwa.

⁴³Pa Piyɛre teməakɛ temə kwele kwele mbe Zhopɛ, ki ghɛa Simon nde keɓe hweta.