Read kapsiki Ka Rome 10 Bible Online

Ka Rome 10 - kapsiki bible

Ka Rome 10

¹Ka kesaka meyɛ ɗa, ma wəsə nya ɗe 'ya kwa wənəa ɗa ba'a nya səkwə 'ya va Shala kezha ka Zhəwif ne, kezha nza kembele mbele.

²Kwa nza ŋkɛ 'ya nde negha fete yitea hɛ, kwele kwele hwepe ghə hɛ yitea Shala. Ama kala mbeli nyi keɗepema hwepe ghə hɛ.

³Kefave hɛ tsema tsema zhɛre wəndə Shala kawəndə nya tiɗiɗi we, ŋa nci nza tiɗiɗi yaɗe hɛ kasepa. Vatse ɗema hɛ kefave tsema tsema veyi mbeli Shala tiɗiɗi.

⁴Kwa nza ŋkɛ Kriste nde keɗaŋemte wəsə mahalegə, kezha nza yayata wəndə nya keyɛte ŋkɛ tiɗiɗi.

⁵Wa nya wəsə nya rafete Moyize le ghəa ŋkɛ te ghəa nza tiɗiɗi nya ve nda wəsə mahalegə ke wəndə nya: «Ma wəndə nya kemene slene le wəsə mahalegə ne, laka wəsə mahalegə tenza ŋkɛ teghweme.»

⁶Wa nya tsetse gezete geva ŋkɛ te ghəa nza tiɗiɗi nya kese laka yɛ: «Gezema na mbe wənəa ŋa: Wa nde tedzeme ghweme wa?», pa ma. Nahe ŋkɛ kenza kazhɛne Kriste kasawa.

⁷Gezema na: «Wa nde tedzawa zeweve ta hɛɗi wa?», a pa perə ma. Nahe ŋkɛ kenza kazhɛne Kriste same hwa mbelia kwahɛɗi.

⁸Ama tsema ke ghena ta Shala sha gha wa? Ma ke: «Takwa takwa ghena shɛ yitea gha, kwa mɛa ŋa nde ba'a mbe wənəa ŋa nde.» Ghena shɛ ya ghena ta yɛ nya zlape ghen'yɛ.

⁹Ma kegezete na le mɛa ŋa nahe Yɛsə kenza kaNde sleke ŋkwa ba'a keyɛte na kwa wənəa ŋa kaganda kelakame ŋkɛ Shala kwa kwele le mpi ne, katembele na.

¹⁰Kwa nza ŋkɛ ma keyɛte Shala na le wənə kwetɛŋe ne, kateve ŋa Shala kawəndə tiɗiɗi. Ma keneghate fete na yitea yɛ ta ŋa kwa kema ta mbeli ne, kambele ŋa ŋkɛ.

¹¹Kwa nza ŋkɛ ma ke Ghena ta Shala gezete: «Yayata wəndə nya keyɛte Yɛsə, katenza hawe te we.»

¹²Ma tsagha ne, yipə yipə ka Zhəwif le kweci hwelefefi, kwetɛŋe Nde sleke hɛ nya keve nda mcɛlə ke yayata wəndə nya kehekɛme sləa ŋkɛ.

¹³Kwa nza ŋkɛ ma ke Ghena ta Shala: «Ma yayata wəndə nya ketehekɛme Shala Mahwətə ne, katembele ŋkɛ.»

¹⁴Ama tsema hekɛme sləa wəndə na, kaɗema na keyɛte wəndəa shɛ wa? Tsema nza na kayɛ wəndə nya ghama na fate ghena ta ŋkɛ wa? Tsema nza na kafave ghena keɗema wəndə kezlape shɛ wa?

¹⁵Ɓiyitsa ne, tsema zlape ghena shɛ wəndə keɗema Shala keghwenakɛ ŋkɛ wa? Kwa nza ŋkɛ ma ke Ghena ta Shala: «Wa nya zlama kala newe se ta ka zlape ghena kwatenca nya ganyɛ gɛ!»

¹⁶Ama kese pɛtɛa mbeli kayɛ fete yitea Ghena kwatenca nya ganyɛ we. Vatse gɛ, ma ke Ɛzayi: «Mahwətə, wa nde yɛte ghena nya zlapete ghen'yɛ wa?»

¹⁷Ma tsetse ŋkɛ ne, mbe ghena nya zlape mbeli se yɛ Shala. Ma ghena nya zlapea shɛ mbeli ne, ghena ta Kriste.

¹⁸Tagha gɛ, ma 'ya sha 'yɛwe: Ashɛ hɛ kefave ghena nya zlapete mbeli wəka? E'e, nahe hɛ kefave. Ma ke Ghena ta Shala gezete: «Nahe mbeli kefa zlape ta ghena ta nci te yayata hɛɗi. Nahe ghena ta nci kentsehe hwa'a te mendɛkwe ta hɛɗi.»

¹⁹Ma 'ya sha 'yɛwe ɓiyitsa: Kaɗema ka Israyɛl kefave na? Yawa, ma ke Shala zhɛnete laka Moyize: «Kateve ŋayɛ zlɛ ŋayɛ va hwelefe nya keɗema ganyɛ 'ya, katehwepe ŋayɛ wənəa ŋayɛ 'ya va mbeli nyi keɗepema wəshi.»

²⁰Ma ke Ɛzayi dzeghakɛ kageze: «Mbeli nyi kesema kazele ɗa ka sləyi ɗa, nahe 'ya kencɛte nda ghəa ɗa ke mbeli nyi kesema ka'yɛwe wəsə va 'ya.»

²¹Ama te ghəa ka Israyɛl ne, ma ke: «Nahe 'ya kese kaha nda dzeve kevə kevə ke hwelefe nya ntɛaŋentɛa ghə ba'a nya kefama ghena.»