Read kapsiki Ka Rome 13 Bible Online

Ka Rome 13 - kapsiki bible

Ka Rome 13

¹Hawe yayata wəndə va mbeli nyi kesleke hɛɗi. Kwa nza ŋkɛ ne, va Shala se sleke ŋkwa we, Shala nde veyi yayata nde sleke hɛɗi.

²Nda tsagha nde ne, nahe wəndə nya keɗema kahawe va nde sleke hɛɗi kehawete nda ma ke Shala. Ma mbeli nyi kezhɛne nda ghə ke ghena ta ŋkɛ ne, ghena ta ghwə yatenda nda hɛ ke ghəa nci.

³Kwa nza ŋkɛ ne, kaghazlənə ka mene wəshi ganji va ka meha ghwə we, ama deke ka mene wəshi nyi ndiremi ndiremi. Kaɗe na kanza kawəndə nya keɗema kaghazlənə va nde sleke hɛɗi na? Mene slene ganyɛ yitea tsahe ŋa ŋkɛ.

⁴Kwa nza ŋkɛ slene ta Shala yamene ŋkɛ kezha mtsehe ŋa berete kamene wəsə ganyɛ. Ma kemenete wəsə kwa ndiremi na ne, ghazlənə va nde sleke hɛɗi. Kwa nza ŋkɛ gəmə nza berete ve kezha 'yɛ mbeli we. Slene ta Shala yamene nda ŋkɛ kwa nza ŋkɛ ka'yɛ mbeli nyi kemene wəsə kwa ndiremi ŋkɛ.

⁵Vatse nza ŋkɛ ndeɗekə kahawe va nde sleke hɛɗi, kenza deke kezha ɗema Shala kahwepe wənə va gha we, ama va nya gezete ŋa mehele ta ŋa.

⁶Se te ghena shɛ nda ŋki jaɓeregwale yɛ, kwa nza ŋkɛ nahe ka tsehe jaɓeregwale kenza kaka mene nda slene ke Shala kezha mene slenea shɛ tiɗiɗi.

⁷Ŋkikɛ nda mə dewa ta ŋkɛ ke yayata wəndə, ŋki nda mə jaɓeregwale ke nde tsehe jaɓeregwale ba'a wəsə ke nde tsehe wəshi. Hawe mə va wəndə nya hi yɛ kahawe ve ba'a ve mə zləvə te wəndə nya hi yɛ kave zləvə te.

⁸Nzama yɛ le dewa ta wəndə ma, nda dewa ta ɗe nya hi kaɗe ghəa ŋayɛ. Ma wəndə nya keɗe nde ghedəkwəa ŋkɛ ne, nahe ŋkɛ kemenete wəsə mahalegə fate fate.

⁹Kwa nza ŋkɛ ne, nahe yɛ keɗepe wəshi mahalegə: «Valema na tahe ma, peslema wəndə na ma, ghərəma na ma, slama ntsə na yitea wəsəa wəndə ma.» Nahe ghena shɛhɛ ba'a kweci nyi ketene kejikəte geva mbe ghena nya: «Ɗe nde ghedəkwəa ŋa kala nya ɗe ghəa ŋa na.»

¹⁰Ma wəndə nya keɗe ŋkwa ne, kamene nda wəsə kwa ndiremi ŋkɛ ke nde ghedəkwəa ŋkɛ we. Laka ɗe ŋkwa ne, kahawe wəndə fəyitekeghə va wəsə mahalegə.

¹¹Nahe yɛ keɗepe və nya nza gheɓəmə mbe tsetsenya: gare feɗeghe yɛ yitea hɛ ta ŋayɛ, kwa nza ŋkɛ takwa takwa mbele ta ɓəmə tsetsenya, nahe ŋkɛ kenza dekwe ma yitea gheɓəmə.

¹²Nahe ŋkwa kekiɗi, takwa takwa veci kasame. Betakɛ ɓəmə slene nyi mbe ŋkwesle, fəte ɓəmə wəshi kempa mbe waŋe.

¹³Dzeghwa ɓəmə kala nya kehi, kala wəsə nya mbe waŋea veci. Mba gheɓəmə kemene gəsəkə kala gezhi, zlenekɛ ɓəmə ghwəyi ba'a mefətekwə, mba gheɓəmə kemene vale tahe, mba gheɓəmə kempa ba'a kezlɛ.

¹⁴Ama seɗete mə Nde sleke ŋkwa Yɛsə Kriste, mba yɛ kepelave nda ghəa ŋayɛ ke wəshi nyi ɗe geva ta ŋayɛ.