Read kapsiki Ka Rome 15 Bible Online

Ka Rome 15 - kapsiki bible

Ka Rome 15

¹Ma gheɓəmə nyi nza berete va gheɓəmə mbe yɛ ne, kemane ka dewə ŋeli mbe yɛ, mba mə kehi kazele wəshi nyi ɗe mə.

²Zele wəsə nya nza ghəa nde ghedəkwəa ŋkɛ gwəfə te yayata wəndə, kezha nza mbeli le berete mbe yɛ.

³Kwa nza ŋkɛ kese Kriste kamene wəsə nya kegwəfə nda ghə we. Ama ma ke Ghena ta Shala gezete: «Nahe ŋele nyi ŋele ŋa mbeli kedzeghənji kənəa 'ya.»

⁴Ma pɛtɛa wəshi nyi fa mə mbe Ghena ta Shala ne, nahe hɛ kerafete geva vəashi kezha ncɛ ɓəmə ntsehwele. Tsagha nde ne, berete ya va gheɓəmə laka ve ghə ta ɓəmə le berete nya mtsehe ɓəmə Ghena ta Shala yitea zereghe ghena, yitea jive mbe kema.

⁵Pa Shala nya keve nda zereghe ghena ba'a mtsehe berete ke mbeli ndeke ŋayɛ berete yita nza yɛ jikə kwelɛ ghəa ŋayɛ kala nya ɗe Yɛsə Kriste.

⁶Ma tsetse ŋkɛ ne, le wənə kwetɛŋe ba'a mɛ kwetɛŋe tetsahe Shala yɛ, Yitenyɛa Yɛsə Kriste Nde sleke ɓəmə.

⁷Tsagha ne, kemaneve mə ghəa ŋayɛ kala nya kemaneve ŋayɛ Kriste, kezha zləvəa Shala.

⁸Vatse nda geze 'ya fəyitekeghə, nahe Kriste kezhɛrete ghəa ŋkɛ kande mene slene ta ka Zhəwif kezha yipə meɗe mɛa Shala le ka shihɛ nci, nahe ŋkɛ kencɛte nda ke mbeli kaɗema Shala kazhɛre mehele.

⁹Nahe ŋkɛ kese perə yitea tsahe Shala kweci hwelefefi kezha ganyɛa ŋkɛ, kwa nza ŋkɛ ma ke rafete geva: «Vatse tetsahe ŋa 'ya hwa kweci hwelefefi, kategha cimə 'ya yitea tsahe sləa ŋa.»

¹⁰Ma ke zhɛkwa: «Gheyɛ kweci hwelefefi, zlama mə le mbelia ŋkɛ nyi tsehave Shala.»

¹¹Zhɛne ne, ma ke perə: «Gheyɛ kweci hwelefefi, tsahe mə Mahwətə. Tsahe Shala mbeli nyi te hɛɗi pɛtɛ.»

¹²Ma ke Ɛzayi perə: «Katenca wəzege ta Zhɛsɛ. Gheŋkɛ nde tenza kande sleke hwelefefi, gheŋkɛ yaveyi zəzə ta nci hwelefefi te.»

¹³Pa Shala nya keve nda ve ghə ke mbeli behekɛ ŋayɛ le zlama ba'a kwelɛŋe laka yɛ ta ŋayɛ, yitea nza yɛ kaka mcɛlə mbe ve ghə laka berete ta Sefəa ŋkɛ.

¹⁴Ka kesaka ma, 'ya le ghəa ɗa ne, nahe 'ya keɗepe kwele kwele mene ndeɗea mehele yɛ. Nahe 'ya keɗepe perə ndeɗekə ɗepete wəshi yɛ, berete ya va gheyɛ kancɛ nda ntsehwele ke ghəa ŋayɛ.

¹⁵Mbe palepa nya rafete ŋayɛ 'ya ne, kweci ghena kencɛ ntsehwele ya shɛ mbe. Nda rafete ŋayɛ 'ya kala nyagha ne, kezha zlaɓa ta ŋkɛ nya ndeke ɗa Shala,

¹⁶kezha nza kande mene slene ta Yɛsə Kriste hwa kweci hwelefefi. Nahe ŋkɛ keveyi ɗa tekeleke kezha slene ta Ghena kwatenca nya ganyɛ ta Shala, yitea nza kweci hwelefefi kawəsə nya zeɗehwe nda ke Shala ba'a nya kehi kezha gheŋkɛ laka Sefəa Shala.

¹⁷Wərə 'ya kamene fege te slene ta Shala nya mene 'ya kwa nza 'ya jikə le Yɛsə Kriste.

¹⁸Kashɛ 'ya geze kwete wəsə we, nda wəsə nya menete Kriste laka 'ya kezha kele kweci hwelefefi kase kayɛ nda fete ke Shala. Nahe ŋkɛ kemenete laka ghena nyi gezete 'ya ba'a wəshi nyi menete 'ya,

¹⁹laka wəshi kencɛ wəshi ba'a wəshi meŋele, ba'a laka berete ta Sefəa Shala. Tsagha nde ne, nahe 'ya kekiɗimte zlape ta Ghena kwatenca nya ganyɛ ta Kriste laka dzete yayata ŋkwa, slə mbe Zhɛrəzalɛm hwa'a te sla ta hɛɗia Iliri.

²⁰Ama nahe 'ya kentsəte geva yitea geze Ghena kwatenca nya ganyɛ deke te ŋkwa nyi ɗema mbeli kegha fave sləa Kriste, yitea ɗema 'ya kaŋa wəsə te shihə nyi ghate kwete wəndə.

²¹Tsagha ne, nahe 'ya kemenete kala nya kerafete geva mbe Ghena ta Shala, ma ke: «Ma mbeli nyi ghama mbeli kazlapete nda ghena ta ŋkɛ ke hɛ ne, katenakɛ hɛ. Ma nyi keghama kafate ghena te ghəa ŋkɛ ne, katefa hɛ.»

²²Ghena shɛ nde fɛake ɗa kalə sha gheyɛ.

²³Ma tsetsenya gɛ, ketene kwete slene va 'ya te sla ta hɛɗi nyi we. Se mɛa va kwele kwele ne, kaɗe 'ya kalə sha gheyɛ.

²⁴Ma vəa ŋkwa nya tedzembe Ɛspanye 'ya ne, katebegeme 'ya le gheyɛ zəzə 'ya. Ma ketemə 'ya le gheyɛ ya ɓɛhwɛnyɛ ŋkɛ ne, katekemane ɗa yɛ kadzete ŋkwa shɛ.

²⁵Ma tsetsenya ne, 'ya kadzeme Zhɛrəzalɛm kezha kemane mbelia Shala nyi pelɛagha.

²⁶Kwa nza ŋkɛ nahe ka Kriste nyi mbe Masɛdowane ba'a nyi mbe Akay kezəzəte kemane mbelia Shala nyi mbe Zhɛrəzalɛm va titikwə nya kezhɛ nda ke hɛ.

²⁷Ghenci le ghəa nci ka zəzəte, ama kala dewa nyi hwa hɛ ŋkɛ. Kwa nza ŋkɛ nahe hɛ kekemave Ghena kwatenca nya ganyɛ va ka Zhəwif ne, nahe ŋkɛ kehite geva kezha kemane ka Zhəwif kweci hwelefefi le wəshia nci.

²⁸Ma nahe ŋkɛ kemenete slenea shɛ 'ya ba'a kendeke nda wəshia shɛhɛ 'ya ke hɛ ne, katedzembe Ɛspanye 'ya dzeyi laka gheyɛ.

²⁹Nahe 'ya keɗepe ma vəa ŋkwa nya telə 'ya sha gheyɛ ne, le wəpi ta Kriste telə 'ya.

³⁰Ama ka kesaka meyɛ ɗa, kampi ŋayɛ dzeve 'ya laka Nde sleke ɓəmə Yɛsə Kriste ba'a laka ɗe nya ve ɓəmə Sefəa Shala, kemane ɗa mə mbe mpa nya mpa 'ya, səkwə mə Shala kaŋa ɗa,

³¹kezha baŋe 'ya kambele va ka Zhəwdɛ nyi keɗema kambelia Yɛsə Kriste. Səkwə mə ghə ɓiyitsa baŋe mbelia Shala nyi mbe Zhɛrəzalɛm kakemaneve ɗa ndeɗekə le wəshi nyi tekele nda 'ya ke hɛ.

³²Tsagha ne, le zlama tese 'ya sha gheyɛ keɗe Shala, katekemave zhɛne mpi 'ya hwa gheyɛ.

³³Pa Shala nya keve nda kwelɛŋe ke mbeli nza le gheyɛ pɛtɛ. Amɛn.