Read kapsiki 1 Ka Korɛnte 11 Bible Online

1 Ka Korɛnte 11 - kapsiki bible

1 Ka Korɛnte 11

¹Teke mə nza ta ɗa, kala nya teke ŋa Kriste 'ya.

²Katsahe ŋayɛ 'ya kwa nza ŋkɛ keveci keveci zəzə ɗa yɛ, bake bake dzeve keseve wəshi keshi nyi ncɛte ŋayɛ 'ya yɛ.

³Fave mə ghena nya ndeɗekə: Kriste ya kawəndə nya te ghəa yayata za, za ya kawəndə nya te ghəa male, Shala ya te ghəa Kriste.

⁴Ma kenza za le wəsə mbe ghə vəa ŋkwa nya səkwə Shala ŋkɛ ba'a nya geze nda ghena ta Shala ŋkɛ ke mbeli ne, Kriste yahawema ŋkɛ ve.

⁵Ma kenza male nya ɗema wəsə mbe ghə ve kasəkwə Shala ba'a kageze nda ghena ta Shala ke mbeli ne, za nta yahawema nde ve. Yipə yipə malea shɛ le male nya keŋsəmte ghə.

⁶Ma kaɗema male kave wəsə kənəa ghəa nta ne, megela ma ŋsəmte ghəa shɛ nde. Ma kwa nza nde wəsə hawe ghə kwa ŋsə ŋsə keɗema kwa sla sla sha mi ne, megela ma ve wəsə nde kənəa ghə.

⁷Ama za ne, mba ŋkɛ keve wəsə mbe ghə, kwa nza ŋkɛ kala Shala pate geva ŋkɛ, zləvəa Shala yancɛ za. Ama male ne, zləvəa za yancɛ nde.

⁸Shave mbe male pake za Shala we, ama shave mbe za pake male ŋkɛ.

⁹Ama za ne, kepate geva kezha male we, ama male nde pate geva kezha za.

¹⁰Vatse ve wəsə nde kənəa ghəa nta kezha ncɛ hawe ta nta va za nta, tewəmbəreke ka ghwene ta Shala.

¹¹Mbe nza ɓəmə le Nde sleke ŋkwa ne, kanzate nza za keɗema male shɛ we, kanzate nza male keɗema za shɛ we.

¹²Kala nya pate male Shala shave mbe za, tsagha shɛ sawa za hwa male perə, ama pɛtɛa nci ne, va Shala se hɛ.

¹³Mehate mə ghwə te ghena nya le ghəa ŋayɛ, ndeɗekə kenza male kasəkwə ghə hwa mbeli kaɗema wəsə kənəa ghəa nta na?

¹⁴Ya nza ta wəshi nyi kepate geva ne, kencɛte ŋayɛ ntsehwele hɛ kaɗema za kehi kanza le shinti nyi bebiya bebiya wəka?

¹⁵Ama sha male ne, zləvə nya te nde. Shala nde ndeke nda shinti nyi bebiya bebiya ke mi kezha nza kala wəsə nya kənəa ghəa nci.

¹⁶Ma keɗe kwete wəndə kaghəpə te ghena nya ne, jara ɗepe ŋkɛ kaɗema kwete wəsə keshi shɛ kamene gheɓəmə, ya Jikə ta ka Kriste.

¹⁷Ma kwa nza ŋkɛ wəshi nyi nakɛ 'ya yageze ŋayɛ 'ya ne, katsahe ŋayɛ 'ya we. Kwa nza ŋkɛ kwele ma wəsə kwa ndiremi mene ŋayɛ yɛ tsene ta ŋayɛ ke ganyɛ.

¹⁸Nahe mbeli kegezete ɗa nehe geva ya kwelɛ gheyɛ vəa ŋkwa nya tsene geva yɛ. Kaganda ŋkɛ ke kwete ghəa ɗa.

¹⁹Nda nehe geva kanza hwa gheyɛ kezha nza mbeli kaɗepete mbeli ganji.

²⁰Ma kwa tsene geva yɛ ne, geva ba'a mimia Nde sleke ŋkwa yakele yɛ we.

²¹Kwa nza ŋkɛ te vəa zeme wəsə kezeme ne, yayata wəndə kawədə geva kazeme wəsə kezeme ta ŋkɛ. Kanza kwete wəndə le ma, vəa ŋkwa nya ghwəyi kwete.

²²Ashɛ ghɛ va gheyɛ kazeme wəsə ba'a kasa wəsə ki wəka? Na, Jikə ta ka Kriste nya kaŋa Shala yaɗe yɛ kaŋ'wəshi na? Na, gheyɛ ɗe kave nda hawe ke mbeli nyi ɗema wəsə kezeme va hɛ na? Wa yaɗe yɛ kageze ŋayɛ 'ya wa? Katetsahe ŋayɛ 'ya na? Ewə, katsahe ŋayɛ 'ya we.

²³'Ya le ŋa ɗa ne, wa nya ghena nya kese va Nde sleke ŋkwa nya fave 'ya ba'a nya gezete ŋayɛ 'ya nya: Ma te viɗi nya tepamte geva Nde sleke ŋkwa Yɛsə ne, pa kelete ɗafa,

²⁴pa ŋkɛ tsate nda ŋ'wese ke Shala ba'a neheve mbe, ma ke: «Nya ya kageva ta ɗa. Nahe ŋkɛ kenza kezha gheyɛ. Mene mə kala nya kezha zəzə ɗa.»

²⁵Tsagha menete ŋkɛ le zlerekwe kwetere wəmbəa ɗafa, ma ke: «Zlerekwe nya ya kajikə geva mɛnɛfɛ le Shala, va nya shekeyi geva mimia ɗa kezha gheyɛ. Yayata və nya sa wəsə yɛ kwa ne, mene mə kala nya kezha zəzə ɗa.»

²⁶Kwa nza ŋkɛ nda tese Nde sleke ŋkwa ne, kazlape mte ta ŋkɛ yɛ te yayata və nya zeme ɗafa nya yɛ ba'a nya sa wəsə nya kwa zlerekwe nya yɛ.

²⁷Ma kenza wəndə kazeme geva ta Nde sleke ŋkwa ba'a kasa mimia ŋkɛ kaɗema kehite geva ne, katebeze nda ghena ŋkɛ ke ghəa ŋkɛ laka geva ba'a mimia Nde sleke ŋkwa.

²⁸Pa yayata wəndə neweve ghəa ŋkɛ megela nda tezeme ɗafa shɛ ŋkɛ ba'a nda tesa mimia shɛ ŋkɛ.

²⁹Kwa nza ŋkɛ ma kezehwe ɗafa shɛ ba'a kesahwe wəsə nya kwa zlerekwea shɛ wəndə kaɗema kezəzə kageva ta Nde sleke ŋkwa ŋkɛ ne, ghwə yambake nda ŋkɛ ke ghəa ŋkɛ.

³⁰Vatse nza ka zereghwe ba'a ka dewə ŋeli kwele kwele hwa gheyɛ. Nahe kweci mbeli kempə kwele kwele.

³¹Ma kemehamte ghwə gheɓəmə te ghəa ɓəmə le ghəa ɓəmə ne, mba fete kakese ɓəmə vəa ŋkwa nya temeha ghwə Shala we.

³²Ama kameha ghwə ba'a ka'yɛ ɓəmə Nde sleke ŋkwa kezha ɗema fete kave ɓəmə geva le mbeli nyi te hɛɗi.

³³Ma kala nya gɛ ka kesaka ma, ma vəa ŋkwa nya tsene geva yɛ kezha zeme geva ta Nde sleke ŋkwa ne, neghete mə kweci mbelia ŋayɛ.

³⁴Ma kenza wəndə shewə va ma ne, zehwe wəsə kezeme ŋkɛ ki ghɛa ŋkɛ. Ma vəa ŋkwa nya tetsene geva yɛ ne, katemeha ghwə Shala te gheyɛ we. Ma kaŋa kweci 'yɛwe nyi ketene ne, katetseɓa hɛ 'ya vəa ŋkwa tese 'ya.