Read kapsiki 1 Ka Korɛnte 12 Bible Online

1 Ka Korɛnte 12 - kapsiki bible

1 Ka Korɛnte 12

¹Newe ɓəmə ghena ta wəshi nyi ve nda Sefəa Shala ke wəndə: ka kesaka ma, kaɗe 'ya kanza yɛ kala mbeli nyi keɗepema wəsə we.

²Ma kwa nza yɛ mba kaka ɗepema Shala ne, nahe kwete wəsə kese kaghwete ŋayɛ kalə sha kweci shala nyi keɗema kageze ghena, kashɛ yɛ zhɛne nda ghə ke hɛ we.

³Vatse gɛ, ma 'ya sha gheyɛ: wəndə nya nza Sefəa Shala mbe shɛ kageze: «Kebezla bezla Yɛsə», ke we. Wəndə shɛ kageze: «Yɛsə ya kande sleke ŋkwa», ke, keɗema Sefəa Shala mbe we.

⁴Keghə keghə wəshi nyi ve nda Sefəa Shala ke mbeli, ama Sefəa Shala shɛ nde ve nda hɛ ke mbeli.

⁵Hweŋkwa kemene nda slene ke Shala ya shɛ keghə keghə, ama Nde sleke ŋkwa shɛnyɛ yamene nda slene mbeli pɛtɛ.

⁶Keghə keghə slene nyi mene mbeli, ama Shala shɛnyɛ nde ve nda berete kemene hɛ pɛtɛ ke mbeli pɛtɛ.

⁷Kancɛ geva Sefəa Shala laka berete nya ndeke nda ŋkɛ ke yayata wəndə kezha kemane mbeli pɛtɛ.

⁸Kave nda berete kegeze ghena le ntsehwele Sefəa Shala ke kwete wəndə, ke kwete ɓiyitsa ne, kave nda berete kegeze ghena laka ɗepe wəsə Sefəa shɛnyɛ.

⁹Sefəa Shala nde ve nda berete ke kwete kezha yɛ ghena ta Yɛsə fate fate. Ke kwete ɓiyitsa ne, kave nda berete Sefəa Shala shɛnyɛ kezha mbe ka zereghwe.

¹⁰Pa kwete kemave berete kezha mene wəshi meŋele, kwete, kezha geze ghena kelɛŋəa Shala, kwete ɓiyitsa, kezha neheve wəsə nya kese va Sefəa Shala le nya keɗema kese ve, kwete, kezha geze kweci ghena, kwete ɓiyitsa ne, kezha zhɛre nda kweci ghena shɛhɛ ke mbeli.

¹¹Ma pɛtɛa wəshia shɛhɛ ne, Sefəa Shala nya kwetɛŋea shɛ nde mene hɛ, keghə keghə ve nda wəsə ŋkɛ ke yayata wəndə, kala nya ɗe ŋkɛ.

¹²Kwa nza ŋkɛ kala geva kwetɛŋe Kriste, ama kwele kwele bela te. Ma kwa jikəte geva bela shɛhɛ, ya ghenci nza kwele kwele ne, kageva kwetɛŋe nza hɛ.

¹³Kwa nza ŋkɛ pɛtɛ ɓəmə kekemave batɛme laka Sefəa Shala nya kwetɛŋe kezha nza kageva kwetɛŋe, ka Zhəwif keɗema ka Grɛk, ka mamzashi keɗema ka mavashi. Nahe gheɓəmə pɛtɛ kesahwe Sefəa Shala nya kwetɛŋe.

¹⁴Ma geva ne, kenza kwetɛŋe bela te we, ama bela kwele kwele.

¹⁵Ma kegeze seɗa: «Kenza 'ya kadzeve we, tsagha gɛ, kenza 'ya kabela ta geva we», ke ne, katefɛa ŋkɛ kenza te geva we.

¹⁶Ma kegeze sleme: «Kenza 'ya kantsə we, tsagha gɛ, kenza 'ya kabela ta geva we», ke ne, katefɛa ŋkɛ kenza te geva we.

¹⁷Ma ya kantsə geva pɛtɛ ne, nza le wa fa ghena ŋkɛ wa? Ma ya kasleme ŋkɛ pɛtɛ ne, tsema fa zəŋwəa wəsə ŋkɛ wa?

¹⁸Kaganda ne, nahe Shala keveyi bela nyi te geva kala nya ɗe ŋkɛ.

¹⁹Ma ya kabela nya kwetɛŋe hɛ pɛtɛ nci ne, tema tenza geva wa?

²⁰Tsetsenya ne, kwele kwele bela te geva ne, ama geva nya kwetɛŋe ŋkɛ.

²¹Kashɛ ntsə geze sha dzeve: «Kaɗe ŋa 'ya we», ke shɛ we. Kashɛ ghə geze sha seɗa perə: «Kaɗe ŋayɛ 'ya we», ke shɛ we.

²²Ama ma bela nyi newe nyi mbeli kaka dewə ŋeli te geva ne, slene ta nci ya shɛ.

²³Ma kweci bela nyi te geva nyi ɗema mə kaɓela ne, ghenci yave zləvə gheɓəmə te za ma. Ma nyi ɗema mbeli kaɗe kanewe hɛ ne, ghenci yanewe ghweme gheɓəmə te hɛ za ma.

²⁴Ma kweci bela nyi nza mbeli kanakɛ hɛ ne, katsakɛ hɛ newe ghweme te hɛ we. Nahe Shala kepate geva laka ve nda zləvə ke bela nyi keɗema shɛ.

²⁵Tsagha menete ŋkɛ kezha ɗema nehe kanza te geva. Ama kezha kemane ghəa nci bela nyi te geva kanya kwetɛŋe.

²⁶Ma kezhɛ nda wəsə ke kwete bela ta geva ne, pɛtɛ zhɛ nda ŋkɛ ke nyi ketene. Ma kenza zləvə te kwete ne, pɛtɛ zlama nyi ketene.

²⁷Gheyɛ ya kageva ta Kriste, nahe yayata wəndəa ŋayɛ kenza kabela ta geva shɛ.

²⁸Tsetse nteyi mbeli Shala kezha mene slene ta ŋkɛ mbe Jikə ta ka Kriste: kwa ghate, ka ghwene ta Yɛsə, kwa bake ne, ka mɛ ŋkwa, kwa maheke, mbeli nyi keteke nda wəshi ke mbeli. Kwetere wəmbəa ŋkɛ, mbeli nyi kemene wəshi meŋele, zhɛne, mbeli nyi kembe ka zereghwe, mbeli nyi kekemane kweci mbeli keɗema nyi kencɛ nda hweŋkwa ke kweci mbeli. Kakwa keɗaŋe ne, mbeli nyi kekemave berete kegeze kweci ghena ya shɛ.

²⁹Kenza pɛtɛa mbeli kaka ghwene ta Yɛsə, kaka mɛ ŋkwa, kaka teke nda wəshi ke mbeli ba'a kaka mene wəshi meŋele we.

³⁰Pɛtɛ mbeli le berete kembe ŋkwa, kegeze kweci ghena ba'a kencɛ zeweve ta wəshi we.

³¹Zele mə kezha kemave berete ta Shala nyi za ma. Ama tsetsenya ne, 'ya katencɛ ŋayɛ hweŋkwa nya za ma ke wəshi pɛtɛ.