Read kapsiki 1 Ka Korɛnte 14 Bible Online

1 Ka Korɛnte 14 - kapsiki bible

1 Ka Korɛnte 14

¹Ntsə mə geva kezha kemave ɗe. Mawe mə wəshi nyi ve nda Sefəa Shala ke wəndə, halama geze ghena kelɛŋəa Shala.

²Ma wəndə nya kegeze kweci ghena ne, ke mbeli geze nda ŋkɛ we, ama ke Shala. Wəndə shɛ kafave ghena nyi geze ŋkɛ we, le berete ta Sefəa Shala geze ghena nyi tewəfərə ŋkɛ.

³Ma wəndə nya kegeze ghena kelɛŋəa Shala ne, ke mbeli geze nda ŋkɛ, kezha kele hɛ mbe yɛ, kezha mtsehe nda berete ke hɛ, kezha gweɗakwe hɛ.

⁴Ma wəndə nya kegeze kweci ghena ne, deke ke ghəa ŋkɛ mtsehe nda berete ŋkɛ. Ma wəndə nya kegeze ghena kelɛŋəa Shala ne, pɛtɛ mtsehe nda berete ŋkɛ ke Jikə ta ka Kriste.

⁵Kaɗe 'ya kageze kweci ghena pɛtɛa ŋayɛ, ama za ma ghena kelɛŋə yaɗe 'ya kageze nda yɛ ke mbeli. Kwa nza ŋkɛ ma wəndə nya kegeze nda ghena kelɛŋəa Shala ke mbeli ne, za ma ŋkɛ ke wəndə nya kegeze kweci ghena, nda wəndə nya kezhɛre nda ghena shɛ ke Jikə ta ka Kriste kanza shɛ.

⁶Banda ta ŋkɛ gɛ ka kesaka meyɛ ɗa: tsema nza 'ya kemanakɛ ŋayɛ kese 'ya sha gheyɛ le kweci ghena wa? Gəmə ghena ta ɗa keɗema 'ya kencɛte ŋayɛ ghena nyi kese va Shala, ya ɗepe wəsə, ya ghena kelɛŋə, ya teke nda wəshi ke mbeli.

⁷Yipə yipə ghena shɛ le shela ba'a gagera, ma keɗema gaka ta nci kembeɗete geva ne, tsema tefa zeɗea nci wəndə wa?

⁸Na, ma kevɛtema veke kedzemte mpa wəndə kevɛ kala nya kehi ne, tsema tenza mbeli kahite geva yitea mpa wa?

⁹Tsagha ŋkɛ sha gheyɛ perə, ma kegezete ghena yɛ le kweci ghena ne, tsema tefa wəsə nya ɗe yɛ kageze mbeli wa? Gəmə tenza ghena ta ŋayɛ.

¹⁰Wa nde ɓelate ghena nyi keghə keghə te hɛɗi lema wa? Ama kwete shɛ hwa hɛ nya ɗema slə kwa we.

¹¹Ma keɗema 'ya kafa ghena nya geze ɗa wəndə ne, kala mentiɓə wəndəa shɛ sha 'ya, kala mentiɓə 'ya sha wəndəa shɛ perə.

¹²Tsagha gheyɛ ɓiyitsa: ma keɗe wəshi nyi ve nda Sefəa Shala yɛ gəmə ke wəndə ne, hwepe mə ghə kasepa wəshi nyi kenza kakemanakɛ Jikə ta ka Kriste.

¹³Vatse gɛ, ma kenza wəndə kageze kweci ghena ne, pa wəndəa shɛ hi kasəkwə Shala kezha ndeke nda berete kencɛ nda ghena nya mbe ŋkɛ ke mbeli.

¹⁴Ma kenza 'ya kasəkwə Shala le kweci ghena ne, mbe səkwə Shala wənəa ɗa, ama kamene slene mehele ta ɗa we.

¹⁵Ma kala nya nde tsagha ne, wa yatemene 'ya tse wa? Ma kasəkwə Shala wənəa ɗa ne, kasəkwə Shala mehele ta ɗa perə, ma kagha cimə wənəa ɗa ne, kagha mehele ta ɗa perə.

¹⁶Ma kenza nde deke le wənəa ŋa tsa nda hana na ke Shala ne, tsema tezhɛne «Amɛn», wəndə nya kefa mbe Jikə ta ka Kriste kwa fatema hana nya tsate nda na ke Shala ŋkɛ wa? Keɗepe wəsə nya ɗe na kageze ŋkɛ we.

¹⁷Ya kwela nza hana nya tsa nda na ke Shala ganyɛke ne, kakemanakɛ wəndə nyagha ŋkɛ kwa ɗema ŋkɛ kefate we.

¹⁸Ŋ'wese 'ya sha Shala kwa geze kweci ghena 'ya za ma ke gheyɛ pɛtɛ.

¹⁹Ama mbe Jikə ta ka Kriste ne, ghena mcɛfe nya fa mbeli yaɗe 'ya kageze kezha kete kweci mbeli, kenya geze kweci ghena slibə meŋe le ghena nyi fatema mbeli.

²⁰Ka kesaka ma, mba yɛ kezəzə ghena kala ŋwale. Nza mə kala ŋwalea fəshi laka wəsə kwa ndiremi, ama kezha zəzə ghena ne, nza mə kala mbelia jama.

²¹Ma mbe Ghena ta Shala ne, ma ke Shala: «Kategeze nda ghena 'ya ke mbeli nyi laka ghena ta kwete hwelefe, laka mɛa ka mentiɓəa sli. Ya tsagha ŋkɛ ne, katefa ghena ta ɗa hɛ we.»

²²Ma tsagha ne, nahe ghena nya geze wəndə le kweci ghena kenza kawəsə kencɛ wəsə ŋkɛ sha ka yɛtema Shala, ama kaɗema sha ka yɛte Shala. Ama ghena kelɛŋəa Shala nya geze wəndə ne, kawəsə kencɛ wəsə ŋkɛ sha ka yɛte Shala, ama kaɗema sha ka yɛtema Shala.

²³Ma banda ta ŋkɛ ne, pɛtɛ ketsenete geva Jikə ta ka Kriste, ntake hɛ pɛtɛ kageze ghena le kweci ghena: ma kedzembe kweci mbeli gəmə keɗema ka yɛtema Shala ne, kateɗema hɛ kazəzə kaka gezhia kɛfi yɛ na?

²⁴Ma kenza mbelia Yɛsə Kriste pɛtɛ kageze ghena kelɛŋəa Shala, nda se nde yɛtema Shala keɗema wəndə gəmə kadzehwa hɛ ne, wərə kaɗepe jaɗafa ta ŋkɛ fate fate va ghena nya fate ŋkɛ. Kateve ghəa ŋkɛ ŋkɛ kande fete laka pɛtɛa mbeli.

²⁵Ma zəzə ta ŋkɛ nyi tentikə ghalanza ne, pɛtɛ tencɛ geva hɛ. Te ŋkwa shɛnyɛ gwəɗəŋə ŋkɛ ntiŋə ghə mbe hɛɗi kahawe va Shala, ma ke: «Kaganda nza Shala hwa gheyɛ.»

²⁶Ka kesaka ma, tsema keɗaŋe ghena shɛ mə wa? Ma kwa tsene geva yɛ yitea tsahe Shala ne, cimə ya va kwete kagha, wəsə ya va kwete kateke nda ke mbeli, kwete ɓiyitsa, kwete ghena nya ncɛte nda Shala yave kageze, geze ghena le kweci ghena ya va kwete, ghena nya mbe ghena shɛ yaɗepe kwete. Mene mə pɛtɛa wəshia shɛhɛ kezha mbake nda berete ke Jikə ta ka Kriste.

²⁷Ma keɗe mbeli kageze ghena le kweci ghena ne, bake keɗema mahekene nza hɛ kageze, ama kwetere wəmbəa kwete geze kwete. Pa kwete wəndə kezha ncɛ nda ghena nya mbe ke mbeli.

²⁸Ma keɗema wəndə shɛ kancɛ nda ghena nya mbe ke mbeli ne, mba wəndəa shɛ kegeze ghena ta ŋkɛ kwa ɗema mbeli kafate nya ɗe ŋkɛ kageze, megela ma geze nda ŋkɛ ke ghəa ŋkɛ ba'a ke Shala.

²⁹Ma mbeli nyi kegeze ghena kelɛŋəa Shala ne, deke mbeli bake keɗema mahekene ka geze, nda newe zeweve ta ghena nya geze hɛ mbeli nyi ketene.

³⁰Ma kegeze nda ghena Shala ke kwete wəndə nya tagha laka kelɛŋə ne, pa wəndə nya keghate ghena kageze dzakwemte ŋa ŋkɛ.

³¹Wərə yɛ pɛtɛ kageze ghena kelɛŋə, ama yayata wəndə te ŋa ŋkɛ və, yitea fave ba'a yitea mtsehe nda berete ŋkɛ ke yayata wəndə hwa tsene.

³²Ma mbeli nyi kegeze ghena nyi kese va Shala ne, keseyi berete nya ndeke nda Shala ke hɛ hɛ.

³³Kwa nza ŋkɛ kenza Shala kaShala nya kemene zlere we, ama Shala nya keve nda kwelɛŋe ke mbeli. Kala nya kemene geva mbe jikə ta mbelia Shala ne,

³⁴mba mi kegeze ghena kwa tsene geva yɛ. Hweŋkwa va hɛ kageze ghena we. Nda hɛ kahawe kala nya gezete wəsə mahalegə.

³⁵Ma keɗe hɛ ka'yɛwe ghena ne, va zhilia nci 'yɛwe hɛ ki ghɛa nci, kehi male kageze ghena hwa tsene we.

³⁶Na, va gheyɛ ghate nca ghena ta Shala na? Na, deke gheyɛ ka kelete ghena ta Shala na?

³⁷Ma keveyi ghəa ŋkɛ wəndə kande mɛ ŋkwa keɗema kawəndə nya kegeze ghena laka Sefəa Shala ne, nda ŋkɛ kaɗepe nahe ghena nyi rafete ŋayɛ 'ya kenza kaghena ta Nde sleke ŋkwa.

³⁸Ama keɗema ŋkɛ keɗepe tsagha ne, keɗepe ŋkɛ Shala perə we.

³⁹Ma tsagha gɛ ka kesaka meyɛ ɗa, səkwə mə ghə yitea kemave berete yɛ kageze ghena kelɛŋə, fɛama mbeli nyi kegeze kweci ghena yɛ ma,

⁴⁰ama mene mə yayata wəsə kala nya kehi ba'a le hweŋkwa ta ŋkɛ.