Read kapsiki 1 Ka Korɛnte 15 Bible Online

1 Ka Korɛnte 15 - kapsiki bible

1 Ka Korɛnte 15

¹Ka kesaka ma, kaɗe 'ya kazəzəte ŋayɛ Ghena kwatenca nya ganyɛ ta Yɛsə nya se 'ya kageze ŋayɛ. Nahe yɛ keyɛte, nahe yɛ kekeseve bake bake dzeve.

²Ghena kwatenca nya ganyɛa shɛ nde tembele ŋayɛ kekeseve yɛ kala nya gezete ŋayɛ 'ya. Ma keɗema ŋkɛ kala nyagha ne, gəmə yɛ ta ŋayɛ.

³Ma kwa ghate ta ghena nya gezete ŋayɛ 'ya, nya kemave 'ya le ghəa ɗa ne, nahe Kriste kemtenyɛ te jaɗafa ta ɓəmə kala nya gezete Ghena ta Shala,

⁴pa mbeli lamte. Ma te kwa maheke ta hɛ ne, pa ŋkɛ same kwa kwele, kala nya gezete Ghena ta Shala.

⁵Pa ncɛte nda geva ke Piyɛre kaghate, zhɛne, ke ka ghwene ta ŋkɛ meŋe bakeghəmbe.

⁶Ma kwetere wəmbəa ŋkɛ, pa ncɛte nda geva ke ka kesaka ma za ma ke mcɛfe gwəmsə te ŋkwa nya kwetɛŋe, mba wəba ta nci teghweme pa tsetsenya, nahe kweci kempə.

⁷Zhɛne, pa ncɛte nda geva ke Zhake, ɓiyitsa, ke ka ghwene ta Yɛsə Kriste pɛtɛ.

⁸Ma kwa sebe ta nci kakwa keɗaŋe gɛ, pa ncɛte ɗa ghəa ŋkɛ, 'ya nya kala wəzege nya kabereɗe.

⁹'Ya ya ɓɛhwɛ hwa mbeli nyi ghwenakɛ Yɛsə Kriste. Kehi kanza 'ya kande ghwene ta Yɛsə Kriste, va nya se 'ya kaghweze mɛ hwa Jikə ta ka Kriste nya kaŋa Shala we.

¹⁰Ama va zlaɓa ta Shala nda se 'ya kanza kala nya. Te zlaɓa ta ŋkɛa shɛ ne, za ma 'ya menete slene ke kweci mbeli nyi ghwenakɛ Yɛsə pɛtɛ, ama 'ya nde menete we, zlaɓa ta Shala nya mbe 'ya.

¹¹Ya 'ya, ya ghenci ne, nya ya kaghena nya zlape ghen'yɛ, gheŋkɛa shɛ yayɛte yɛ perə.

¹²Ma ghena nya geze ghen'yɛ ne, nahe Shala kekelakame Yɛsə kwa kwele le mpi. Tsema se nde nda geze kweci mbelia ŋayɛ kaɗema mbeli kasame kwa kwele le mpi wa?

¹³Ma kasamema mbelia kwahɛɗi kwa kwele ne, nza kesame Kriste perə we.

¹⁴Ma ya kaɗema Kriste kesame kwa kwele ne, nza gəmə ghena nya zlape ghen'yɛ, gəmə ghena nya yɛte yɛ perə.

¹⁵Nza katseŋwə fete nya neghate n'yɛ yitea Shala, kwa geze n'yɛ nahe ŋkɛ kekelakame Kriste kwa kwele le mpi. Ma ya kaɗema mbelia kwahɛɗi kasame kwa kwele ne, kekelakame Kriste Shala perə we.

¹⁶Ma ya kasamema mbelia kwahɛɗi kwa kwele, nza kasame Kriste we.

¹⁷Ma ya kaɗema Kriste kesame ne, gəmə yɛ ta ŋayɛ, mba yɛ bətə mbe jaɗafa ta ŋayɛ.

¹⁸Ma tsagha nde ne, bətə mbeli nyi kempə mpə nyi keyɛte Kriste.

¹⁹Ma kenza nde deke yitea nza ta ɓəmə te hɛɗi nya vate ghə gheɓəmə te Kriste ne, nza kwele ma tenza ŋa ɓəmə dɛdiwəɓa ke ŋa kweci mbeli pɛtɛ.

²⁰Ama kaganda ne, nahe Kriste kesame kwa kwele le mpi, gheŋkɛ nde ghate nda hweŋkwa ke kweci mbeli nyi kempə mpə kasame kwa kwele le mpi kala gheŋkɛ.

²¹Kala nya se mte laka wəndə kwetɛŋe ne, tsagha se same kwa kwele le mpi laka wəndə kwetɛŋe perə.

²²Kala nya mpə mbeli pɛtɛ laka nza jikə le Adam ne, tsagha kemave mpi mbeli pɛtɛ laka nza jikə le Kriste.

²³Ama yayata wəndə te ŋa ŋkɛ ŋkwa, Kriste ya kande ghate mbeli pɛtɛ, zhɛne, mbeli nyi ketenza kaŋa ŋkɛ te veci nya tese ŋkɛ.

²⁴Ma kwa sebe ta ŋkɛ ne, katekiɗi hɛɗi, pɛtɛ teza sebe Kriste te yayata meghe, mbeli nyi te ghə ba'a yayata berete, vəa ŋkwa nya ve Meghea ŋkɛ ŋkɛ mbe dzeve ta Shala Yita.

²⁵Kwa nza ŋkɛ nda Kriste kamene meghe pa te və nya teŋkame ka ghema ta ŋkɛ Shala mbe seɗa ta ŋkɛ.

²⁶Ma nde keɗaŋe ta nde jaga ta ŋkɛ nya teza sebe ŋkɛ te ne, gheŋkɛ mte.

²⁷Kwa nza ŋkɛ ma ke Ghena ta Shala gezete: «Nahe Shala keŋkeɗeyi pɛtɛa wəshi mbe seɗa ta ŋkɛ.» Ama nahe gezete geva dazhɛ dazhɛ mbe ghena nya kaɗema Shala kenza mbe «pɛtɛa wəshi» nyi mbe seɗa ta Kriste.

²⁸Ama vəa ŋkwa nya veyi geva pɛtɛa wəshi mbe seɗa ta ŋkɛ ne, gheŋkɛ nya kaWəzege ta Shala nde tenza mbe seɗa ta Nde dapave nda pɛtɛa wəshi. Tsagha gɛ katenza Shala te ghəa pɛtɛa wəshi.

²⁹Zəzəte mə ghena ta mbeli nyi kemene nda batɛme ke ghəa nci te zhia mbeli nyi kempə mpə, le wa kete hɛ ŋkɛ wa? Ma ya kaganda ɗema mbeli nyi kempə mpə kasame kwa kwele ne, kezha wa mene nda batɛme hɛ ke ghəa nci kezha hɛ tsagha wa?

³⁰Ghen'yɛ perə ne, va wa nza n'yɛ mbasa mbasa kaza keveci keveci wa?

³¹Ka kesaka meyɛ ɗa, mbasa mbasa va mte nza 'ya keveci keveci. Kaganda ne, ma 'ya sha gheyɛ: gheyɛ yafege 'ya le mbe nza ta ɓəmə mbe Yɛsə Kriste Nde sleke ɓəmə.

³²Ma ya kala zəzə ta wəndə ŋelɛ ne, wa yaketekɛ ɗa mpa nya mpate 'ya le yɛ deghwava teke mbe Ɛfɛze wa? Nda kaɗema mbelia kwahɛɗi kasame kwa kwele le mpi ne, zeme ɓəmə wəshi kezeme ba'a sa ɓəmə wəshi kesa, kwa nza ŋkɛ katempə gheɓəmə hendɛ, kala nya geze kwete ghena ŋela.

³³Mba yɛ keghwete ghəa ŋayɛ: «Ka mcɛhɛ nyi ndiremi ndiremia mehele kabeze mehele ganji.»

³⁴Kese mə mehele, mba yɛ kemene jaɗafa. Kwa nza ŋkɛ kezha ve ŋayɛ hawe geze ŋayɛ 'ya: keɗepe Shala kweci mbeli hwa gheyɛ.

³⁵Nda kwete ma ke kwete wəndə sha te'yɛwe: Tsema same mbeli kwa kwele wa? Tsema tenza geva ta nci wa?

³⁶Gezhi na! Ma ketsawete wəsə na ne, nda wəsəa shɛ kamte nda tepese ŋkɛ.

³⁷Ma wəsə nya tsawe na ne, dəŋwəa ŋkɛ ŋkɛ we, ama deke ya ta ŋkɛ, ŋa ha keɗema ŋa kwete wəsə.

³⁸Shala nde ve nda pa ta geva ke yayata wəsə ketsawe kala nya ɗe ŋkɛ. Keghə keghə pate geva ta felehwe ta pɛtɛa wəshi ŋkɛ.

³⁹Geva ta wəshi nyi nza sli te ne, keyipə hɛ pɛtɛ we. Keghə keghə geva ta mbeli le ŋa wəshi keseɗa, keghə keghə ŋa wəshi nyi kezlə le ŋa yɛ kelepe.

⁴⁰Kweci shɛ geva ya shɛ pelɛ ghweme, kweci ya shɛ te hɛɗi, keghə keghə ndeɗea nci.

⁴¹Keghə keghə ndeɗea yɛ veci, ŋa tere le ŋa yɛ saseregwa. Ya yɛ saseregwa ne, keghə keghə ndeɗea nci perə.

⁴²Tsagha tenza same ta mbeli kwa kwele le mpi. Kada geva ta wəndə nya kemte. Ma vəa ŋkwa nya tesame ŋkɛ kwa kwele ne, katezhɛne ŋkɛ kada we.

⁴³Ma kwa lamte mbeli kwa kwele ne, kendireminyɛ ŋkɛ, berete ve we, ama kwa same ŋkɛ kwa kwele ne, ganyɛke ŋkɛ, berete ya ve.

⁴⁴Ma kwa veyi ŋkɛ mbeli kwa hɛɗi ne, nahe ŋkɛ kenza kageva, ma vəa ŋkwa nya tesame ŋkɛ le mpi ne, katenza ŋkɛ kageva nya nza Sefəa Shala mbe. Ma geva nya kasli ya shɛ ne, geva nya nza Sefəa Shala mbe ya shɛ perə.

⁴⁵Kwa nza ŋkɛ ma ke Ghena ta Shala: Nahe Adam, nde ghate ta wəndə kezhɛrenyɛ kawəndə nya nza mpi hwe, ama Adam nde keɗaŋe ne, gheŋkɛ ya kawəndə nya nza Sefəa Shala mbe, nya keve nda mpi ke mbeli.

⁴⁶Wəndə nya ɗema Sefəa Shala hwe nde se mpelɛa we, ama nya nza mpi hwe. Kwetere wəmbə se nya nza Sefəa Shala hwe.

⁴⁷Ma Adam nde ghate ne, le keləwəa hɛɗi pate ŋkɛ Shala, ama Adam nde bake ne, sawa pelɛ ghweme ŋkɛ.

⁴⁸Ma mbeli nyi te hɛɗi ne, yipə yipə hɛ le Adam nya keshave mbe hɛɗi. Ma mbeli nyi kesawa pelɛ ghweme ne, yipə yipə hɛ le wəndə nya kesawa pelɛ ghweme.

⁴⁹Ma kala nya nza gheɓəmə yipə yipə le wəndə nya kepate geva le hɛɗi ne, tsagha teyipə geva gheɓəmə le nya kesawa pelɛ ghweme perə.

⁵⁰Ka kesaka meyɛ ɗa, wa nya ghena nya ɗe 'ya kageze nya: ma slia geva ba'a mimi ne, kazeme ghɛ hɛ yitea Meghea Shala we. Ma wəsə nya kedaɗə ne, kazeme ghɛ ŋkɛ yitea wəsə nya keɗema kadaɗə we.

⁵¹'Ya katencɛ ŋayɛ ghena nya tewəfərə: katempə gheɓəmə pɛtɛ we, ama pɛtɛ tezhɛre geva gheɓəmə.

⁵²Kata kata temene geva ŋkɛ kala metɛ ta ntsə, kwa vɛte geva veke kwa keɗaŋe. Kaganda ne, katevɛ geva veke. Tagha gɛ, katesame mbelia kwahɛɗi kwa kwele kezha mpi nya keɗema kakiɗi, ama gheɓəmə ne, katezhɛre gheɓəmə pɛtɛa ɓəmə.

⁵³Nda wəsə nya kedaɗə kaseɗaghe nya kedaɗəma, nda wəsə nya ketemte kaseɗaghe nya kemtema.

⁵⁴Ma vecia shɛ, kateseɗe wəsə nya kedaɗəma wəsə nya kedaɗə, kateseɗe wəsə nya ketemtema wəsə nya kemte. Tagha gɛ, kateyipə geva ghena nya gezete Ghena ta Shala: «Nahe sebe keza te mte, nahe hərə ŋkwa kenza fate fate.»

⁵⁵Wa mte, tema hərə ŋkwa ta ŋa gɛ wa? Wa mte, tema have ta ŋa wa?

⁵⁶Jaɗafa ya kahave ta mte, wəsə mahalegə ya kaberete ta jaɗafa perə.

⁵⁷Hana ke gheɓəmə sha Shala nya kendeke ɓəmə berete kehərə ŋkwa laka Nde sleke ɓəmə Yɛsə Kriste.

⁵⁸Vatse ka kesaka meyɛ ɗa, nza mə le berete, mba yɛ kebare bare, mbake mə mene slene ta Shala keveci keveci, kwa nza ŋkɛ nahe yɛ keɗepe kaɗema hwepe ghə ta ŋayɛ kenza gəmə mbe nza ta ŋayɛ jikə le Nde sleke ŋkwa.