Read kapsiki 1 Ka Korɛnte 16 Bible Online

1 Ka Korɛnte 16 - kapsiki bible

1 Ka Korɛnte 16

¹Te ghena ta tsehe nda wəshi ke mbelia Shala nyi mbe Zhɛrəzalɛm ne, menete mə kala nya gezete nda 'ya ke Jikə ta ka Kriste nya mbe Galate.

²Kedemase kedemase ne, ve cɛdɛ yayata wəndəa ŋayɛ kala berete ta ŋkɛ te ŋa ŋkɛ ŋkwa ki ghɛ, yitea ɗema kaneghe se ta ɗa kezha tsene wəshi.

³Ma vəa ŋkwa nya tentsehe 'ya ne, kateghwene mbeli nyi tsehave yɛ 'ya kadzeme Zhɛrəzalɛm le palepa kezha keleghe wəshi nyi tsenete yɛ.

⁴Ma kenakɛ 'ya nahe ŋkɛ kehite geva kadzeme 'ya ne, katedzeme 'ya le hɛ.

⁵Katelə 'ya sha gheyɛ dzeme laka Masɛdowane, kwa nza ŋkɛ katejive 'ya mbe.

⁶Ya kwete katetemə 'ya hwa gheyɛ, ya kwete tagha tenza 'ya nda kiɗi feghwe. Gheyɛ ka tekemane ɗa kajive mbe kema te ŋkwa nya telə 'ya tsagha.

⁷Kwa nza ŋkɛ deke newe yaɗe 'ya kanewe ŋayɛ vəa ŋkwa nya dzeghwa 'ya we, ama keɗe Shala ne, katetemə 'ya hwa gheyɛ.

⁸Ama tsetsenya ne, nahe 'ya kezəzəte kantishɛ mbe Ɛfɛze hwa'a mɛa Pantekote.

⁹Kwa nza ŋkɛ nahe hweŋkwa keghwenemte ɗa geva kamene slene nya wəba teke, ya kwela nza ka ghema ta ɗa kwele kwele.

¹⁰Kese Timotɛ sha gheyɛ ne, kemaneve mə ŋkɛ le zlama, kwa nza ŋkɛ nde mene slene ta Nde sleke ŋkwa ŋkɛ kala 'ya.

¹¹Mba mbeli keyiɗə ŋkɛ. Ama kemanakɛ mə ŋkɛ le wəshi mbe dzeghwa ta ŋkɛ nda se ŋkɛ sha 'ya, kwa nza ŋkɛ neghe yaneghe ghen'yɛ le ka kesaka ma nyi teke.

¹²Ma wəza meyɛ ɓəmə Apolos ne, mbe mtsehe nda berete 'ya kwele kwele kezha lə ŋkɛ sha gheyɛ le kweci ka kesaka ma, kezəzəte ŋkɛ kaba we. Katelə ŋkɛ kesləyi və ŋkɛ.

¹³Nza mə ɗeke ɗeke, nza mə le berete mbe yɛ, hwepe mə ghə, nza mə le berete.

¹⁴Mene mə yayata wəsə le ɗe.

¹⁵Mba kwete ghena va 'ya kageze ŋayɛ ka kesaka ma, nahe yɛ keɗepe yɛ Stɛfanas le mbelia ŋkɛ ka ghate kazele ghena ta Yɛsə mbe Grɛse. Kwele kwele kemanakɛ mbelia Shala hɛ mbe.

¹⁶Fa nda mə ghena ke mbeli nyi kala nyi ba'a mbeli nyi kemene slene tsape tsape le hɛ.

¹⁷Fare fare wənəa ɗa yitea se ta Stɛfanas, Fortənatəs ba'a Akaykəs, nahe hɛ kedzete zhia ŋayɛ kwa ɗema yɛ teke.

¹⁸Nahe hɛ kegweɗakwete ɗa wənəa ɗa kala nya gweɗakwete ŋayɛ ŋa ŋayɛ hɛ perə. Hawe mə va mbeli nyi kala hɛ.

¹⁹Kanjiŋwe ŋayɛ Jikə ta ka Kriste nyi mbe Azi, kanjiŋwe ŋayɛ yɛ Akilas le Prisile ba'a ka Kriste nyi ketsene geva ki ghɛa nci.

²⁰Pɛtɛa ka kesaka ma nyi teke kanjiŋwe ŋayɛ. Njiŋwakɛ mə ghəa ŋayɛ le zlama kala ka mama.

²¹Le dzeve ta ɗa rafete ghena nyi 'ya, 'ya Pol nya kenjiŋwe ŋayɛ.

²²Ma keɗema Nde sleke ŋkwa wəndə ne, nza wəndəa shɛ kande bezla bezla. Maranata, geze ta ŋkɛ, nde, Nde sleke ŋkwa.

²³Nza zlaɓa ta Nde sleke ŋkwa Yɛsə le gheyɛ.

²⁴Kaɗe ŋayɛ 'ya pɛtɛa mbe Yɛsə Kriste.