Read kapsiki 1 Ka Korɛnte 2 Bible Online

1 Ka Korɛnte 2 - kapsiki bible

1 Ka Korɛnte 2

¹Ka kesaka ma, ma 'ya le ŋa ɗa kwa se 'ya sha gheyɛ kezha geze ŋayɛ zəzə nya tewəfərə ta Shala ne, kese 'ya kamene slene le ghena nya dzawe ba'a ntsehwele nya wəba we.

²Ma vəa ŋkwa nya nza 'ya hwa gheyɛ ne, kedambeghə ɗa 'ya yitea ncɛ ŋayɛ kwete ghena we, deke Yɛsə Kriste nya kemte te sheghwə kwa zleŋkwa.

³Vatse se 'ya sha gheyɛ kala nde dewə ŋeli nya kebare bare va ghazlənə.

⁴Ma wəshi nyi se 'ya kateke ŋayɛ ne, kenza hɛ kala ghena ntsehwelea mbeli nyi keɗepe ghena kageze we, ama ghena ta ɗa nya gezete 'ya nde ncɛte berete ta Sefəa Shala,

⁵yagha yɛ ta ŋayɛ kaghereŋe deke te ntsehwele ta mbeli nyi teke te hɛɗi, ama te berete ta Shala.

⁶Ndagwara ntsehwele yateke nda 'ya ke ka Kriste nyi kentsə ntsə mbe ghena ta Shala. Ama kenza ntsehwelea shɛ kaŋa mbeli nyi te hɛɗi ya kaŋa mbeli nyi kesleke hɛɗi ba'a nyi ketempə we.

⁷Ntsehwelea Shala nya kese tewəfərə, nya ɗepema mbeli, yateke nda 'ya ke mbeli. Nahe Shala kentave vəashi kezha ve ɓəmə mbe zləvəa ŋkɛ tewə Shala kepate hɛɗi lema.

⁸Ashɛ kwete wəndəa mbeli nyi te ghə nyi ndiremi ndiremia mehele nyi te hɛɗi lema shɛ keɗepe ntsehwelea Shala we. Ma ya nahe hɛ keɗepe ŋkɛ ne, nza katebaŋe Nde sleke ŋkwa nya nza zləvə te hɛ te sheghwə kwa zleŋkwa we.

⁹Kwa nza ŋkɛ ma ke rafete geva: «Ma wəsə nya ghama ntsə ta wəndə kanakɛ, nya ghama sleme ta wəndə kafave, nya ghama wəndə kazəzəte ne, nahe Shala kehite nda ŋkɛ ke mbeli nyi keɗe ŋkɛ.»

¹⁰Kaganda ne, ke gheɓəmə ncɛte ɓəmə ghena ta ŋkɛ nya tewəfərə Shala laka Sefəa ŋkɛ. Kwa nza ŋkɛ ne, wərə Sefəa Shala kaɗepe wəshi pɛtɛ, pa le zəzə ta Shala nyi tewəfərə.

¹¹Wa nde ɗepe wəshi nyi zəzə wəndə wa? Ashɛ mehele ta wəndəa shɛ wəka? Tsagha Shala, wəndə shɛ keɗepe wəshi nyi zəzə ŋkɛ we, nda Sefəa Shala.

¹²Ama gheɓəmə ne, sefə nya te hɛɗi yakemave gheɓəmə we, Sefəa ŋkɛ nya kese va Shala yakemave gheɓəmə yitea ɗepe wəshi ganji nyi ndeke ɓəmə Shala gheɓəmə.

¹³Le ghena nyi kese va ntsehwelea wəndə ŋelɛ geze wəshia shɛhɛ gheɓəmə we, ama le ghena nya teke ɓəmə Sefəa Shala. Ma wəshi nyi kese va Sefəa Shala ne, le ghena nya kese va Sefəa Shala ncɛ nda hɛ gheɓəmə ke mbeli.

¹⁴Ma wəndə nya ɗema Sefəa Shala mbe, kaɗe wəsə nya ncɛ nda Sefəa Shala ŋkɛ we. Wəsə gezhi ŋkɛ shɛ. Kafate ŋkɛ, kwa nza ŋkɛ laka Sefəa Shala geze geva ŋkɛ we.

¹⁵Wəndə nya kekemave Sefəa Shala ne, berete yave yitea meha ghwə te wəshi pɛtɛ. Ama wəndə shɛ kandeke nda fete we.

¹⁶Kwa nza ŋkɛ ma ke Ghena ta Shala: «Wa nde ɗepe zəzə ta Mahwətə wa? Wa nde nza kancɛte nda ntsehwele wa?» Ama gheɓəmə ne, zəzə ta Yɛsə ya va gheɓəmə.