Read kapsiki 1 Ka Korɛnte 4 Bible Online

1 Ka Korɛnte 4 - kapsiki bible

1 Ka Korɛnte 4

¹Newe n'yɛ mbeli kaka mene slene ta Kriste, nyi dapate nda slene ta ghena ta ŋkɛ nya tewəfərə Shala te dzeve ke hɛ.

²Ma wəsə nya ɗe mbeli va wəndə nya dapate nda wəsə mbeli te dzeve ne, nza ta ŋkɛ dɛŋe dɛŋe te slene ta ŋkɛ.

³Kaŋa ɗa ne, wərə yɛ kamehate ghwə te 'ya le ghəa ŋayɛ keɗema laka mbelia jama nyi kemeha ghwə. Kameha ghwə 'ya te ghəa ɗa we.

⁴Mbe mehele ta ɗe ne, wəsə shɛ kaŋele ghəa ɗa 'ya te, ama keveyi ghəa ɗa 'ya kawəndə nya tiɗiɗi we. Ma wəndə nya kemeha ghwə te 'ya ne, gheŋkɛ Nde sleke ŋkwa.

⁵Vatse gɛ ne, mba yɛ kemeha ghwə te wəndə tewə vəa ŋkɛ kese, tewə Nde sleke ŋkwa kenaka kase. Gheŋkɛ nde tencɛ wəshi nyi tewəfərə mbe ŋkwesle te waŋe, pɛtɛ tencɛ wəshi nyi kwa wənəa mbeli nyi wəfərəakɛ hɛ ŋkɛ. Ma vəa ŋkwa shɛ ne, katekemave tsahe ta ŋkɛ yayata wəndə va Shala kala nya nza ŋkɛ.

⁶Ka kesaka ma, kezha gheyɛ gezete ghena nyi 'ya pɛtɛ laka ghena keyipə pa te ghəa ɗa ba'a Apolos. Ma ɗe 'ya, pa gheyɛ tekeve wəsə nya ɗe ghena nya kancɛ ŋayɛ: «Mba wəndə kezlakemte wəsə nya kerafete geva.» Mene mə kala ghen'yɛ, mba yɛ kemene fege laka nza yitea wəndə nya keŋ'wəshi kwete wəndə.

⁷Wa nde veyi ŋa kawəndə kwele te ghəa kweci mbeli wa? Ma yayata wəsə nya va gha ne, ashɛ Shala nde ndeke ŋa ŋkɛ wəka? Ma kwa kemave ŋkɛ na ne, yitea wa mene fege na kala wəsə nya kemavema ŋkɛ wa?

⁸Behe behe yɛ tsetsenya. Kaka mcɛləa kɛfi yɛ. Ka meghea kɛfi yɛ kaɗema le ghen'yɛ. Ma ya kaganda nza yɛ kaka meghea kɛfi ne, nza wərə ghen'yɛ kanza kaka meghea kɛfi le gheyɛ perə.

⁹Kwa nza ŋkɛ ma newe 'ya ne, nahe Shala keveyi n'yɛ mbeyitere sheghwə, ghen'yɛ nyi kaka ghwene ta Yɛsə Kriste, kala mbeli nyi tempə mbeli. Kawəsə nya ŋ'wəshi mbeli zhɛrete n'yɛ Shala kwa ntsə ta mbeli nyi te hɛɗi pɛtɛ, kwa ntsə ta yɛ ka ghwene ta Shala ba'a mbeli.

¹⁰Kaka gezhia hɛɗi ghen'yɛ tewəmbəreke Kriste, ama gheyɛ ne, nahe yɛ keɗepe wəshi kwa nza yɛ jikə le, kaka dewə berete berete ghen'yɛ, ama ka berete berete gheyɛ, kayiɗə n'yɛ mbeli, ama kahawe mbeli va gheyɛ.

¹¹Pa tsetsenya ne, yaka yasa ghen'yɛ va ma ba'a ndere, lekwesa va ghen'yɛ we, kaɗa n'yɛ mbeli, kandeŋe ghen'yɛ hwa'a teke hwa'a teke va titikwə ghɛ.

¹²Kamene slene ghen'yɛ dzawe le dzeve ta n'yɛ. Ma keŋele n'yɛ mbeli ne, kawəpikɛ ŋkwa n'yɛ. Ma keghwezakɛ mɛ mbeli hwa ghen'yɛ ne, kazereghe n'yɛ.

¹³Kaŋwashɛ ŋwashɛ n'yɛ mbeli, ama ghen'yɛ ne, kakemane ŋkwa ghen'yɛ le ghena ganyɛ. Ka newe n'yɛ mbeli kala kəsəa hɛɗi lema pa tsetsenya, kala wevɛa mbeli.

¹⁴Kezha ve ŋayɛ hawe nda rafe ŋayɛ ghena nya 'ya we, ama kezha teke ŋayɛ wəshi kala kaŋwalea ɗa nyi ɗe 'ya.

¹⁵Kwa nza ŋkɛ ya kwela ncɛte ŋayɛ ghena ta Kriste ka teke ŋayɛ wəshi slibə meŋe ne, deke yita kwetɛŋe nde nza kanza va gheyɛ: 'ya kwetɛŋe ya kayiteyɛa ŋayɛ, kwa nza nde 'ya nde yake ŋayɛ kaŋwalea Yɛsə Kriste laka Ghena kwatenca nya ganyɛ.

¹⁶Kasəkwə ŋayɛ 'ya kezha mene yɛ kala 'ya.

¹⁷Vatse nda ghwenakɛ ŋayɛ Timotɛ, gheŋkɛ wəzege ta ɗa nya ɗe 'ya, wəndə nya dɛŋe dɛŋe te Nde sleke ŋkwa 'ya. Gheŋkɛ nde tezəzə ŋayɛ nza ta ɗa mbe ghena ta hweŋkwa ta Yɛsə nya zele 'ya nya ncɛ nda 'ya ke Jikə ta ka Kriste te yayata ŋkwa.

¹⁸Ma zəzə kweci mbelia ŋayɛ ne, katezhɛne 'ya kase sha gheyɛ we, vatse mene fege hɛ.

¹⁹Ama keɗe Nde sleke ŋkwa ne, katelə 'ya sha gheyɛ kahe kahe. Kateɗepete nza ta ka fegea shɛhɛ 'ya, kenza deke te ghena ta nci we, ama wəshi nyi nza hɛ kamenete.

²⁰Kwa nza ŋkɛ kenza Meghea Shala kaghena we, ama kaberete.

²¹Tsema ɗe yɛ wa? Se 'ya sha gheyɛ le ghweɗa keɗema le ɗe ba'a mehele ganyɛ na?