Read kapsiki 1 Ka Korɛnte 6 Bible Online

1 Ka Korɛnte 6 - kapsiki bible

1 Ka Korɛnte 6

¹Ma kenza ghena kwelɛ gheyɛ ne, yitea wa lə yɛ kameha ghwə kweci hwelefefi te gheyɛ wa? Va wa ɗema yɛ lə kezha meha ghwə mbelia Shala te gheyɛ wa?

²Keɗepe yɛ mbelia Shala ka temeha ghwə te mbeli nyi te hɛɗi wəka? Ma kenza nde gheyɛ ka temeha ghwə te mbelia shɛhɛ ne, tsema shaŋe yɛ va meha ghwə te wəshi nyi ɓɛhwɛ ɓɛhwɛ kwelɛ ghəa ŋayɛ wa?

³Keɗepe yɛ gheɓəmə ka temeha ghwə ta ka ghwene ta Shala wəka? Halama ghena nyi teke te hɛɗi nya gɛ na!

⁴Ma kenza ghena kwelɛ gheyɛ te wəshi nyi teke te hɛɗi ne, mbeli nyi ɓelama Jikə ta ka Kriste yakele yɛ kaka meha ghwə.

⁵Kezha ve ŋayɛ hawe geze 'ya kala nya. Ya tsemanyɛ ŋkɛ ne, shaŋe wəndə nya kentsehwele ntsehwele kanza hwa gheyɛ nya kenza kiɗimte ghena kwelɛ ka kesaka ma na?

⁶Wa raberə nda kele nda wəza meghekɛ nde Kriste ke ka meha ghwə nyi keɗema keyɛte Yɛsə wa?

⁷Ya tsemanyɛ ŋkɛ ne, hawe ya te gheyɛ kwa ɗema yɛ katseɓa ghena kwelɛ ghəa ŋayɛ. Va wa ɗema yɛ kaɗe kasəwə ghena kwa ndiremi wa? Va wa ɗema yɛ pelakɛ kweci mbeli kaghərə wəshia ŋayɛ wa?

⁸Ama gheyɛ ka mene nda wəsə kwa ndiremi ke mbeli, gheyɛ ka ghərə wəshia mbeli. Ndagwara ka kesaka meyɛ ŋayɛ hɛ wəka?

⁹Keɗepe yɛ katezemema Meghea Shala ka mene wəshi nyi ndiremi ndiremi wəka? Ghwetema ghəa ŋayɛ ma: ka mene wəshi nyi kehitema geva, ka hawe va kweci shala, ka vale tahe, zhili nyi kevale zhili keɗema mi nyi kevale mi, zhili nyi kevale ŋwale,

¹⁰ka ghərəa kɛfi, ka sla ntsə yitea wəshi, ka ghwəyi, ka ŋele ŋkwa ba'a ka ŋwasle ŋkwa shɛ katedzembe Meghea Shala we.

¹¹Tsetse se kweci mbelia ŋayɛ vəashi, ama tsetsenya ne, nahe jaɗafa ta ŋayɛ keyaɓemte geva, nahe yɛ kenza kambeli nyi keveyi geva tekeleke, nahe yɛ kenza kambeli tiɗiɗi te sləa Nde sleke ŋkwa Yɛsə Kriste ba'a laka Sefəa Shala.

¹²Ma ke kweci mbeli sha geze: «Hweŋkwa ya va 'ya kamene yayata wəsə nya ɗe 'ya.» Ama kenza yayata wəsə megela kaŋa ŋayɛ we. Hweŋkwa ya va 'ya kamene yayata wəsə nya ɗe 'ya, ama kapelakɛ kwete wəsə 'ya kazhɛre ɗa kamava ta ŋkɛ we.

¹³Nahe wəsə kezeme kenza kezha hwə ba'a hwə kezha wəsə kezeme. Ama pɛtɛ tezamte hɛ Shala. Kenza geva ta wəndə ŋelɛ kezha vale tahe we. Kezha Nde sleke ŋkwa geva ta ɓəmə, kezha geva ta ɓəmə Nde sleke ŋkwa.

¹⁴Nahe Shala kekelakame Nde sleke ɓəmə Yɛsə same kwa kwele le mpi, tsagha tefə ɓəmə ŋkɛ same kwa kwele laka berete ta ŋkɛ.

¹⁵Nahe yɛ keɗepe geva ta ŋayɛ ya kabela nyi te geva ta Kriste. Katekele bela ta geva ta Kriste 'ya kezha zhɛre kageva ta male mefətekwə na? Kamenete geva we.

¹⁶Keɗepe yɛ nahe wəndə nya kejikə geva le male mefətekwə kenza kageva nya kwetɛŋe le malea shɛ wəka? Kwa nza ŋkɛ ma ke Ghena ta Shala gezete: «Ketenza hɛ bake nci kageva nya kwetɛŋe.»

¹⁷Ama wəndə nya kejikə geva le Nde sleke ŋkwa ne, kanya kwetɛŋe mehele ta ŋkɛ le.

¹⁸Hwɛ ŋayɛ mə va ɓelahe nya kehitema geva. Nahe pɛtɛa kweci jaɗafa nyi mene wəndə kenza pelɛke te wəmbəa geva ta ŋkɛ. Ama wəndə nya kemenete vale tahe ne, ke geva ta ŋkɛ menete nda jaɗafa ŋkɛ.

¹⁹Ashɛ yɛ keɗepe geva ta ŋayɛ ya kaghɛa Sefəa Shala, Sefə nya mbe gheyɛ ba'a nya ndeke ŋayɛ Shala wəka? Kenza yɛ kaŋa ghəa ŋayɛ we.

²⁰Nahe Shala kepave ŋayɛ jake jake kezha nza yɛ waɗe. Ma kala nya ŋkɛ ne, ve mə zləvə te Shala le geva ta ŋayɛ.