Read kapsiki 1 Ka Korɛnte 7 Bible Online

1 Ka Korɛnte 7 - kapsiki bible

1 Ka Korɛnte 7

¹Tsetsenya ne, geze ɓəmə ghena nya se yɛ ka'yɛwe va 'ya vecagha. Ndeɗekə ŋkɛ keɗema wəndə wəme geva.

²Ama kwa nza nde nahe vale tahe kepesleyi geva te hɛɗi ne, megela ma wəmeve male za kaŋa ŋkɛ ba'a wəmeve za male kaŋa nta.

³Nda za kanza le male ta ŋkɛ ba'a nda male kanza le za nta perə.

⁴Male nde sleke geva ta nta we, za nta. Tsagha shɛ ne, za nde sleke geva ta ŋkɛ we, male ta ŋkɛ.

⁵Mba yɛ kefɛa nda geva ta ŋayɛ ke ghəa ŋayɛ, nda gheyɛ kegezete kwelɛ ghəa ŋayɛ kahɛ ɓɛhwɛ kezha səkwə Shala. Ama kwetere wəmbəa ŋkɛ ne, jikə mə geva ta ŋayɛ, yagha Satan teghwete ŋayɛ kwa ɗema berete va gheyɛ kazereghete.

⁶Ma ghena nya geze ŋayɛ 'ya ne, ghena nya kegezete geva ŋkɛ we, ama ghena nya kehi ŋayɛ.

⁷Ma ɗe 'ya ne, kala 'ya ɗe 'ya kanza mbeli. Ama keghə keghə wəsə nya ndeke nda Shala ke yayata wəndə, tekeleke ŋa nya, tekeleke ŋa kwete.

⁸Wa nya ghena nya geze nda 'ya ke ka ghwemezhi ba'a ka wedidi nya: megela nza ŋayɛ kala 'ya, kaɗema kawəme geva.

⁹Ma keɗema yɛ kapesle yitea tsefe geva ta ŋayɛ ne, wəme mə geva, megela ma wəme geva wəndə ke mte va gwaya.

¹⁰Wa nya ghena nya geze nda 'ya ke mbeli nyi kewəmeve geva, ghena nya kesema va 'ya, ama va Nde sleke ŋkwa nya: Kahi male kanehe le za nta we.

¹¹Ma kenehemte geva nde le ne, mba nde kezhɛne kawəme kwete za, keɗema ne, pa nde tseɓate ghena shɛ le za nta. Mba za keŋka male ta ŋkɛ.

¹²Wa nya ghena nya geze nda 'ya ke kweci mbeli, 'ya le ghəa ɗa, kaɗema kaNde sleke ŋkwa nya: ma kenza male nya keɗema kakwa Kriste yitea nde Kriste, nda yɛte nde kanza le wəndəa shɛ ne, kahi ŋkɛ keŋkamte ŋkɛ we.

¹³Ma kenza kwa Kriste kamale ta nde yɛtema Yɛsə, nda yɛte ŋkɛ kanza le ghenta ne, kahi kaŋkamte ŋkɛ nde we.

¹⁴Kwa nza ŋkɛ ne, laka male ta ŋkɛ nza wəndə nya keɗema keyɛte Yɛsə kaŋa Shala, laka za nta nza male nya keɗema kawəndəa Yɛsə kaŋa Shala perə. Ma keɗema ŋkɛ tsagha ne, kenehe nehe le Shala nza ŋwalea ŋayɛ, ndagwara mbelia Shala hɛ.

¹⁵Ma keɗe wəndə nya keɗema kawəndəa Yɛsə kanehe geva le wəndəa Yɛsə ne, pelakɛ ŋkɛ mbeli kamene kala nya ɗe ŋkɛ. Ma tsagha gɛ, nahe wəndə Kriste nya kaza keɗema kamale kenza waɗe, kwa nza ŋkɛ yitea nza mbe kwelɛŋe hekakɛ ŋayɛ Shala.

¹⁶Ma gha male nya kakwa Kriste ne, tsema nza na kaɗepe wərə na kambelete za ŋa wa? Gha za nya kande Kriste ne, tsema nza na kaɗepe wərə na kambelete male ta ŋa wa?

¹⁷Ma ne, nza yayata wəndə kala nya ndeke nda Shala, mbe nza nya nza ŋkɛ vəa ŋkwa nya hekakɛ ŋkɛ Shala. Gheŋkɛ ya kaghena nya geze 'ya mbe pɛtɛa Jikə ta ka Kriste.

¹⁸Ma kenza nde nahe wəndə keslamte mɓɛta nda hekakɛ ŋkɛ Shala, mba ŋkɛ kewəfərə sla mɓɛta ta ŋkɛ. Ma nda kaɗema wəndə keslamte mɓɛta nda hekakɛ ŋkɛ Shala ne, mba ŋkɛ kesla mɓɛta.

¹⁹Nza kesla sla mɓɛta keɗema kaɗema mɓɛta kesla ne, ghena mbe we. Wəsə nya wəba kwetɛŋe, yɛ ghena nyi gezete ɓəmə Shala kamene.

²⁰Nza yayata wəndə tsetsenya kala nya se ŋkɛ te veci nya hekakɛ ŋkɛ Shala.

²¹Kamava na nda hekakɛ ŋa Shala na? Nzama na keyirə yirə ma. Ma kenza hweŋkwa va gha kezha nza kawəndə nya waɗe ne, mbele ghəa ŋa.

²²Kwa nza nde ma mava nya hekakɛ Nde sleke ŋkwa ne, mamza nya kaŋa Nde sleke ŋkwa ŋkɛ. Ɓiyitsa, ma mamza nya hekakɛ geva ne, mava ta Kriste ŋkɛ.

²³Nahe Shala kembeɗeke ŋayɛ jake jake shave mbe mava kezha nza waɗe. Zhɛrema ghəa ŋayɛ kaka mavashia mbeli zhɛkwa ma.

²⁴Ka kesaka ma, nza yayata wəndə tsetsenya kala nya se ŋkɛ te veci nya hekakɛ ŋkɛ Shala.

²⁵Ama te ghəa mbeli nyi kewəmevema geva ne, Nde sleke ŋkwa nde gezete ɗa ghena shɛ we. Ama ghena nya zəzəte 'ya yageze 'ya. Ndeɗekə ŋkɛ keyɛte ghena ta ɗa shɛ mbeli, va nya nza ŋkɛ nahe Nde sleke ŋkwa keveyi ɗa kawəndə nya gezleŋema ghə mbeli ve laka zhɛ helia ŋkɛ.

²⁶Ma va ghena ta yaka nya tsetse ŋkwa nya ne, wa nya ghena nya zəzə 'ya nya: megela ma nza wəndə kala nya nza ŋkɛ.

²⁷Ma kenza nde male ya va gha, mba na kemene ntsehwele keŋkamte ŋkɛ. Ma kenza nde ghwemezhi na ne, mba na kezele male.

²⁸Ma kewəmeve geva na ne, kemenete jaɗafa na we. Ma kewəmeve za degheli ne, kemenete jaɗafa nde we. Ama mbeli nyi kewəmeve geva ne, kwele kwele tesa yaka hɛ mbe nza ta nci, vatse ncɛ ŋayɛ ntsehwele 'ya va yaka shɛ.

²⁹Ka kesaka ma, wa nya ghena nya ɗe 'ya kageze nya: ndale tene və we. Se tsetsenya ne, nahe ŋkɛ kehi kanza mbeli nyi kewəmeve geva kala wəsə nya ɗema hɛ kewəmeve geva,

³⁰mbeli nyi kenehwene ne, nza hɛ kala mbeli nyi keɗema kanehwene, mbeli nyi kezlama ne, nza hɛ kala mbeli nyi keɗema kazlama, mbeli nyi kepa wəshi ne, nza hɛ kala mbeli nyi ɗema wəshi nyi pave hɛ va hɛ,

³¹mbeli nyi kefa zeɗe nza teke te hɛɗi ne, nza hɛ kala mbeli nyi kefama deme te zeɗe nza. Kwa nza ŋkɛ katekiɗi hɛɗi nya newe nya yɛ tsetsenya.

³²Kaɗe 'ya kezha ɗema yɛ kanza keyirə yirə. Ma wəndə nya kewəmevema geva ne, wəshia Nde sleke ŋkwa yave nda ghə ŋkɛ, kazele ŋkɛ kanza zeɗehwe nda ke Nde sleke ŋkwa.

³³Ama wəndə nya kewəmeve geva ne, ghena ta wəshi nyi te hɛɗi yave nda ghə ŋkɛ, wəsə nya zeɗehwe nda ke male ta ŋkɛ yazele ŋkɛ,

³⁴bake mbe neheve geva mehele ta ŋkɛ. Ma male nya kewəmevema za keɗema degheli ne, deke wəshia Nde sleke ŋkwa yave nda ghə ŋkɛ. Kezha nza geva ta nci ba'a mehele ta nci pɛtɛ kawəsə nya keveyi geva tekeleke, ama nya kewəmeve za, wəshi nyi teke te hɛɗi yazəzə nde, wəsə nya zlama za nta te yazele nde.

³⁵Ma nda gezete 'ya kala nya ne, kezha kemane ŋayɛ, kenza kezha ŋa ŋayɛ keleŋa we. Kaɗe 'ya kezha ntave megela yɛ, laka nza dɛŋe dɛŋe te Nde sleke ŋkwa, mba ghəa ŋayɛ kenza bake bake.

³⁶Ma kezəzəte mempɛhweta fete yamene nda ŋkɛ ke meghwatenyɛ laka wəmema ŋkɛ, ma kenza ŋkɛ kamte va mawe ta nta ba'a keveyi ghə ŋkɛ wərə hɛ kawəmeve geva ne, wəmeve ghəa nci hɛ, kala nya ɗe ŋkɛ. Kemenete jaɗafa ŋkɛ we.

³⁷Ma ketarete mempɛhweta fate fate kwa wənəa ŋkɛ kezha ɗema kawəme male, ma kenza ŋkɛ kapesle ŋkɛ tsefe ɗe ta ŋkɛ ba'a ketarete ŋkɛ kezha ɗema kaɓelahe le meghwatenyɛ ne, megela menete ŋkɛ.

³⁸Tsagha gɛ, nahe wəndə nya kewəmeve meghwatenyɛ kemenete megela, ama wəndə nya kewəmevema ne, megela ma menete ŋkɛ.

³⁹Ma male nya kewəmeve za ne, tehwepe nde vare za nta vəa ŋkwa nya nza ŋkɛ teghweme, ama kemte za nta ne, hweŋkwa ya va malea shɛ kawəme kwete za nya ɗe nde, ama nda wəndəa shɛ kanza kande Kriste.

⁴⁰Ndagwara za ma tezlama nde kenza nda nde kala nya nza nde. Ma sha 'ya ne, zəzə ta Sefəa Shala ya va 'ya.