Read kapsiki 2 Ka Korɛnte 11 Bible Online

2 Ka Korɛnte 11 - kapsiki bible

2 Ka Korɛnte 11

¹Ayaga! Kamawe 'ya kezha səwə gezhia ɗa yɛ kavə ɓɛhwɛ! Yawa, kaganda ne, səwə ɗa mə ga!

²Kazhɛ ɗa zlɛ te ghəa ŋayɛ, zlɛ nya kese va Shala. Kwa nza ŋkɛ nahe 'ya kenteyi nda ŋayɛ kwa ghwa ke za kwetɛŋe, gheŋkɛ Kriste. Kaɗe 'ya kakele ŋayɛ kase shɛ kala degheli nya keɗepema za.

³Ama kazhɛ ɗa ghazlənə yagha mehele ta ŋayɛ kabeze geva kaɗema yɛ ve nda ghəa ŋayɛ ke Kriste le wənə kwetɛŋe, kala Ɛve nya keyɛhwe ghwete ta shishi nya ghwetete ŋkɛ le tseŋwə.

⁴Kwa nza ŋkɛ katezereghe yɛ kezha se kwete wəndə kageze ŋayɛ ghena ta kwete Yɛsə tekeleke le nya gezete ŋayɛ ghen'yɛ. Kateyɛ ghena ta kwete sefə keɗema kwete ghena yɛ tekeleke le Sefəa Shala ba'a ghena kwatenca nya ganyɛ nya gezete ŋayɛ ghen'yɛ.

⁵Ma mbeli nyi kenewe ghəa nci kambeli jama ta ka ghwene ta Yɛsə Kriste ne, kenza hɛ za ma ke 'ya we.

⁶Nda kwete mezhizhi 'ya kezha geze ghena, ama kenza laka ɗepe wəshi we, kala nya ncɛte ŋayɛ 'ya keveci keveci ya tsema tsemanyɛ.

⁷Nahe 'ya keshifəmte ghəa ɗa kezha ve zləvə te gheyɛ laka Ghena kwatenca nya ganyɛ ta Shala nya se 'ya geze ŋayɛ gəmə. Fete ta ɗa ŋkɛ na?

⁸Kala wəsə nya fəhwe cɛdɛa yɛ Jikə ta ka Kriste 'ya, laka yɛ kaŋki ɗa wəsə hɛ kezha kemane ŋayɛ.

⁹Kwa keseve ɗa titikwə te veci nya nza 'ya hwa gheyɛ ne, kefəhwe wəshia kwete wəndə 'ya we. Ka kesaka ma nyi kese mbe Masɛdowane ka fəke ɗa wəshi nyi ɗe 'ya. Kwele kwele se 'ya kaya ghəa ɗa va gheyɛ yagha yɛ tebeze wəshia ŋayɛ yitea 'ya, tsagha shɛ se 'ya kamene.

¹⁰Le Kriste nya kegeze ghena ganyɛ mbe 'ya ne, wəndə shɛ te hɛɗia Akay pɛtɛ nya keteghwete ɗa yitea wəfərə wəsə nya mene fege 'ya le we.

¹¹Va wa gezete 'ya kala nya wa? Va nya ɗema ŋayɛ 'ya na? Nahe Shala keɗepe kaɗe ŋayɛ 'ya.

¹²Ma wəsə nya mene 'ya ne, katemene 'ya shanda, yitea fɛa mbeli nyi kemene fege kemene kala ghen'yɛ, katekemave wəsəa shɛ mbelia shɛhɛ we.

¹³Ma mbelia shɛhɛ ne, ka ghwene ta Yɛsə nyi kesla tseŋwə hɛ, ka ghwete ŋkwa nyi kezhɛrete ghəa nci kaka ghwene ta Kriste.

¹⁴Nzama yɛ heheɓake va wəsəa shɛ ma. Pa le Satan kazhɛre ghəa ŋkɛ kande ghwene ta Shala nya kewaŋe ŋkwa.

¹⁵Kenza ŋkɛ kawəsə meŋele sha mbeli nyi kemene nda slene kazhɛre ghəa nci kambeli nyi kemene nda slene ke nza tiɗiɗi we. Ama te kwa keɗaŋe ta slene ta nci ne, kakele pamə hɛ hwə tsə.

¹⁶Kazhɛne ghwelə 'ya yite: mba wəndə kenewe ɗa kala gezhi. Ma kenewe ɗa yɛ kala gezhi ne, newe ɗa mə tsagha shɛ kezha menakɛ fege 'ya ɓɛhwɛ.

¹⁷Fəyitekeghə ɗema ghena nya geze nya 'ya Nde sleke ŋkwa, ma kwa ghwete ɗa mbeli kezha mene fege ne, kala wəndə nya ɗema mehele ve tegeze ghena 'ya.

¹⁸Ma kwa nza nde kamene fege kweci mbeli le wəshi nyi mene deke wəndə ŋelɛ ne, vatse gɛ, 'ya katemene fege perə.

¹⁹Ma gheyɛ nyi nza mehele va gheyɛ ne, kasəwə ghena yɛ yitea ka gezhia kɛfi le ɗe ta ghəa ŋayɛ.

²⁰Kasəwə yɛ kazhɛre ŋayɛ mbeli kaka mavashi, kamene ghə mbeli le gheyɛ, kaghərə wəshi mbeli yitea gheyɛ, kaɓelama ŋayɛ mbeli, kampa ŋayɛ mbeli le balema.

²¹Kazhɛ ɗa hawe kegeze ghena nya kala nya, dewə se berete ta n'yɛ kamene le gheyɛ kala nya. Ama keɗema kweci mbeli keghazlənə va mene fege ne, kaghazlənə 'ya perə we. Tsetsenya ne, kala gezhi geze ghena 'ya.

²²Ma ka Ɛbrə hɛ ne, tsagha 'ya perə. Ma ka Israyɛl hɛ ne, tsagha 'ya perə. Hwelefefia Abraham hɛ ne, tsagha 'ya perə.

²³Nahe hɛ kenza kambeli nyi kemene nda slene ke Kriste na? Yawa, 'ya kageze ghena kala gezhi, za ma 'ya ke hɛ mbe slenea shɛ, za ma 'ya ntsə geva yitea slenea shɛ ke hɛ. Kwele ma ŋa ɗa zhigə kwa daŋgayɛ ke hɛ, kwele ma ɗate ɗa mbeli ke hɛ. Za ma 'ya se mbasa mbasa kemte ke hɛ.

²⁴Mcɛfe zhigəa ka Zhəwif kaɗa ɗa le kwərəpə mahekenemsə meslighəmbe.

²⁵Mahekene zhigə ɗate ɗa ka Rome le kwərəpə. Kwetɛŋe zhigəa mbeli kaŋkwape ɗa le pelɛ. Mahekene zhigəa kwambelə kateɗe le 'ya kadzawa ndərə, vəghwə ba'a viɗi kwetɛŋe menete 'ya kwa ndərə.

²⁶Kwele kwele dzeghwave dzeghwa 'ya, kwele kwele sahwe yaka 'ya kwa sawa ghwa. Nahe ka ŋwasle ŋkwa keɗate ɗa. Nahe ka kesaka meyɛ ɗa nyi kaka Zhəwif kese kaghweze mɛ hwa 'ya, tsagha shɛ menete ɗa kweci hwelefefi. Nahe 'ya kesahwe yaka dzeyi mbe yɛ meleme, dzeyi te yɛ ɓerama, kwa ndərə, pa hwa ka kesaka meyɛ ɗa nyi kaka tseŋwə.

²⁷Nahe 'ya kemenete kweci slene nyi 'yahe 'yahe le hwələ kwa ntsə, kwele kwele zhigə nya hɛvema hɛ 'ya, nahe 'ya kesəwəhwe yɛ ma le ndere, kwele kwele zhigəa menete səwəmayɛ 'ya le ɗema ta ɗa, kwele kwele sahwe yaka 'ya va ntasle ba'a va titikwə lekwesa.

²⁸Kaɗema kaɓela kweci wəshi ne, slene ta ɗa nya keveci keveci ya shɛ: zəzə nya zəzə yɛ Jikə ta ka Kriste 'ya.

²⁹Ma kenza titikwə te wəndə ne, kazhɛ ɗa nde kala wəndəa shɛ perə. Ma kemenete jaɗafa kwete wəndə ne, kwele kwele zhɛ ɗa wənəa ɗa.

³⁰Ma nda nahe ŋkɛ kehite geva kafege 'ya ne, nza le dewə berete ta ɗa fege 'ya.

³¹Ma Shala Yiteyɛa Nde sleke ɓəmə Yɛsə nya kewəpi wəpi kaghala ghala ne, nahe ŋkɛ keɗepe kaɗema 'ya kasla tseŋwə.

³²Kwa nza 'ya mbe Damas ne, pa ŋgwamna ta meghe nya veyi meghe Arɛtas[1] nteyi ka sewajɛ mɛa meleme yitea kese ɗa.

³³Ama nahe mbeli kekelakawa ɗa sawa te wəfela ta zli kwa kwaciga, tsetse mbele ɗa 'ya va meghea shɛ.