Read kapsiki 2 Ka Korɛnte 12 Bible Online

2 Ka Korɛnte 12 - kapsiki bible

2 Ka Korɛnte 12

¹Nda 'ya kamene fege ya kwela ɗema ŋkɛ ndeɗekə. Ghena ta wəshi nyi nakɛ 'ya ba'a nyi gezete ɗa Nde sleke ŋkwa laka kelɛŋə yategeze 'ya.

²Nahe 'ya keɗepe kwete nde Kriste[2] nya keleghe Shala kadzeme ghweme. Va meŋe wəfaɗeghəmbe ghala menete geva wəsəa shɛ. Keɗepe 'ya kenza ŋkɛ le slia geva ta ŋkɛ keleghe geva ŋkɛ kadzeme keɗema wəsə yanakɛ ŋkɛ laka kelɛŋə we, deke Shala nde ɗepe.

³Nahe 'ya keɗepe nahe wəndəa shɛ kekeleghe geva kadzeme ghweme. Le geva ta ŋkɛ keleghe geva ŋkɛ na, na kaɗema le geva ta ŋkɛ na? Keɗepe 'ya we, deke Shala nde ɗepe.

⁴Ma pelɛagha gɛ ne, pa ŋkɛ fate ghena nyi ɗema wəndə ŋelɛ kashɛ geze, nyi ɗema hweŋkwa va kwete wəndə kazhɛne ghwelə yite.

⁵Le wəndə nyagha tefege 'ya. Ama kaŋa ɗe ne, deke le yɛ dewə ŋelia tefege 'ya.

⁶Ma keɗe 'ya kamene fege ne, katenza 'ya kagezhi we, kaganda yategeze 'ya. Ama kamene 'ya, yagha mbeli tezəzə ɗa kwele ma ke wəsə nya nakɛ hɛ kamene 'ya ba'a nya fa hɛ kageze 'ya.

⁷Kezha ɗema 'ya kamene fege le wəshi meŋele nyi nakɛ 'ya ne, pa kwete wəsə kala mesleɗe veyi geva mbe geva ta ɗa, kala nde ghwene ta Satan nya keveyi geva kezha ɗa ɗa ba'a kezha fɛa ɗa kemene fege.

⁸Mahekene zhigəa ɗa kasəkwə Nde sleke ŋkwa kezha mbele ɗa va yaka shɛ.

⁹Ma ke zhɛnete ɗa: «Wərə ŋa zlaɓa ta ɗa, kwa nza ŋkɛ kancɛ geva berete ta ɗa mbe dewə ŋelia ŋa.» Vatse mene fege 'ya le dewə ŋelia ɗa, yitea nza berete ta Kriste kənəa 'ya.

¹⁰Vatse zlama 'ya te dewə berete ta ɗa, te ŋele nyi ŋele ɗa mbeli, te yaka nyi sa ɗa mbeli, te mɛ nya ghweze mbeli hwa 'ya ba'a yɛ taze ta mehele ta ɗa tewəmbəreke Kriste. Ma kwa nza 'ya kande dewə berete ne, vəa ŋkwa shɛ nza 'ya kande berete.

¹¹Kaganda kala nde gezhi gezete ghena 'ya deŋwa. Ama gheyɛ ka ŋkate ɗa yitea geze ghena kala nya. Gheyɛ ka hi kampa yitea 'ya. Ya kwela nza 'ya kawəndə gəmə ne, kenza 'ya ɓɛhwɛ ma 'ya ke mbeli nyi kenewe ghəa nci kambelia jama ta ka ghwene ta Yɛsə Kriste we.

¹²Ma slene nyi nza mbeli kaɗepe ɗa kande ghwene ta Yɛsə Kriste te hɛ ne, hwa gheyɛ menete geva hɛ le zereghe ghena, laka hwepe ghə pɛtɛ, wəshi kencɛ wəshi, wəshi meŋele ba'a slene nyi berete berete.

¹³Ɓɛhwɛ ma ke ŋa kweci Jikə ta ka Kriste menete ŋayɛ 'ya na? Wəsə kwetɛŋe ne, kese 'yɛ kaŋki ɗa zhɛme we. Kelemte ɗa mə te wənə va nta ghala shɛ.

¹⁴Nahe 'ya kehite geva kalə sha gheyɛ kakwa maheke zhigə. Katekele wəsə 'ya va gheyɛ we, va nya nza ŋkɛ gheyɛ yasepa 'ya, kenza kawəshia ŋayɛ we. Ŋwale ka hi nda wəshi kezeme ghɛ ke yɛ yita le ma we, yita nde hi nda wəshi ke hɛ.

¹⁵'Ya le ŋa ɗa ne, le ɗe ta ɗa teve ŋayɛ wəshia ɗa ba'a pɛtɛa ghəa ɗa 'ya. Ɓɛhwɛ ma teɗe ɗa yɛ va nya ɗe ŋayɛ 'ya kwele ma na?

¹⁶Kateyɛ yɛ kaɗema 'ya kese ka'yɛwe kwete wəsə va gheyɛ. Ama katezəzə kwete wəndə le ntsehwele ghwetehwe ŋayɛ 'ya, 'ya nya kagezhi nya.

¹⁷Nahe 'ya kemenete ghəa ɗa le gheyɛ laka kwete wəndəa mbeli nyi ghweneghe ŋayɛ 'ya na?

¹⁸Nahe 'ya kedeneve Tite kezha lə ŋkɛ sha gheyɛ, gheŋkɛ le kwete wəza ma nya gezete ŋayɛ 'ya. Tite nde menete ghə ke gheyɛ na? Ashɛ kanya kwetɛŋe zəzə ta n'yɛ, laka zele hweŋkwa nya kwetɛŋe wəka?

¹⁹Se ghala veci zəzə yɛ ghəa n'yɛ yampa n'yɛ yite kwa kema ta ŋayɛ na? Tsagha we, kala nya ɗe Kriste geze ghena ghen'yɛ kwa kema ta Shala, kezha jive yɛ mbe kema.

²⁰Kazhɛ ɗa ghazlənə yagha 'ya tesləyima ŋayɛ kala nya ɗe 'ya kese 'ya, yagha yɛ tesləyima ɗa kala nya ɗe yɛ, yagha yɛ tenza le mpa, le zlɛ kwelɛ ghəa ŋayɛ, hwepe wənə, ŋwashɛ ŋwashɛ, ŋele ŋkwa, ŋkele ntsə ba'a heɗe ŋkwa.

²¹Kazhɛ ɗa ghazlənə yagha Shala kandeke ɗa hawe kwa kema ta ŋayɛ vəa ŋkwa nya telə 'ya sha gheyɛ, yagha 'ya tenehwene va kweci mbeli kwele kwele nyi kemenete jaɗafa vəashi laka zhɛre nda ma wəmbə ke nza wale wale, vale tahe ba'a mefətekwə.