Read kapsiki 2 Ka Korɛnte 13 Bible Online

2 Ka Korɛnte 13 - kapsiki bible

2 Ka Korɛnte 13

¹Kakwa maheke ta zhigəa ɗa nya kalə sha gheyɛ. Katetseɓa geva yayata ghena te negha fete ta mbeli bake keɗema mahekene, kala nya gezete Ghena ta Shala.

²Vəashi gezete nda 'ya ke mbeli nyi kemenete jaɗafa ba'a ke kweci mbeli pɛtɛ. Kazhɛne 'ya kageze nda ke hɛ ɓeshi kala nya gezete 'ya te veci nya se 'ya hwa gheyɛ kakwa bake zhigə, ma kezhɛne 'ya kalə ne, katemeha ghwə 'ya te hɛ tsape tsape.

³Kaɗe yɛ kaɗepe Kriste nde geze ghena mbe 'ya, katencɛ ŋayɛ 'ya te vecia shɛ. Kenza Kriste kande dewə ŋeli laka gheyɛ we, ama katencɛ berete ta ŋkɛ ŋkɛ mbe gheyɛ.

⁴Kaganda ne, va nya nza ŋkɛ kande dewə ŋeli nda baŋete mbeli te sheghwə, ama laka berete ta Shala nza ŋkɛ le teghweme tsetsenya. Ma ghen'yɛ ne, kaka dewə ŋeli ghen'yɛ, kwa nza n'yɛ jikə le Yɛsə. Ama laka slene ta n'yɛ hwa gheyɛ ne, teghweme tenza n'yɛ le Yɛsə laka berete ta Shala.

⁵Newemte mə ghəa ŋayɛ kenza nde nahe yɛ keyɛhwe Yɛsə. Dzeghe mə berete ta ŋayɛ. Nahe yɛ keɗepe nza ta Yɛsə Kriste tsape mbe gheyɛ na? Nda kwete kaka mezhizhi yɛ yitea ncɛ nda ke mbeli nahe yɛ keyɛhwe Yɛsə.

⁶Ma ghen'yɛ ne, wərə n'yɛ kancɛte nda ke mbeli, kateɗepe yɛ zəzə 'ya.

⁷Kasəkwə Shala n'yɛ kezha ɗema wəsə ndiremi. Kenza kezha ncɛ nda berete ta n'yɛ ke mbeli we, ama kezha newe ŋayɛ kamene ganyɛ, ya ghen'yɛ nza kala ka dewə ŋeli.

⁸Kwa nza ŋkɛ berete va ghen'yɛ kafɛa ghena nya kaganda we. Deke yitea ghena nya kaganda kemave berete n'yɛ.

⁹Kazlama ghen'yɛ vəa ŋkwa nya nza n'yɛ kaka dewə ŋeli, te və nya nza gheyɛ kaka beretea kɛfi, vatse səkwə Shala ghen'yɛ yitea mbake geva ganyɛa ŋayɛ.

¹⁰Vatse rafe ŋayɛ ghena shɛ 'ya mba 'ya cakeɗake le gheyɛ kaba, yagha 'ya teŋele ŋayɛ le berete nya ndeke ɗa Nde sleke ŋkwa te veci nya tenza 'ya hwa gheyɛ. Kezha ŋzlamte ŋayɛ kemave berete 'ya we, ama kezha ŋa ŋayɛ.

¹¹Ma tsetse ŋkɛ ne, ka kesaka ma, nza mə le zlama. Hwepe mə ghə yitea nza le mehele, kemane mə ghəa ŋayɛ, zəzə mə ghena kanya kwetɛŋe ba'a nza mə le kwelɛŋe. Ma tsagha ne, hwa gheyɛ tenza Shala nya keɗe ŋkwa ba'a nya keve nda kwelɛŋe ke mbeli.

¹²Njiŋwe mə ghəa ŋayɛ le zlama kala ka mama. Pɛtɛ mbelia Shala nyi teke kanjiŋwe ŋayɛ.

¹³Pa zlaɓa ta Nde sleke ŋkwa Yɛsə Kriste, ɗe ta Shala ba'a Sefəa Shala nya kejikə ŋkwa nza le gheyɛ pɛtɛ.