Read kapsiki 2 Ka Korɛnte 5 Bible Online

2 Ka Korɛnte 5 - kapsiki bible

2 Ka Korɛnte 5

¹Nahe n'yɛ keɗepe, ya kwela kiɗinyɛ nza ta n'yɛ nya teke te hɛɗi nya kacɛ lekwesa, geze ta ŋkɛ, geva ta n'yɛ ne, nahe Shala kehite n'yɛ kwete ghɛ pelɛ ghweme. Gheŋkɛ nde ŋate ghɛa shɛ le ghəa ŋkɛ, kenza kawəndə we, kaghala ghala tenza ghɛa shɛ.

²Ma kwa nza n'yɛ te hɛɗi kaba ne, kaŋələvə ghen'yɛ, kazləmə zləmə n'yɛ yitea seɗe ghɛa n'yɛ nya pelɛ ghweme kadzeghəa nya tsetsenya,

³nda newe n'yɛ mbeli kala mbeli nyi nza wəsə kənə, kaɗema mederelaŋe.

⁴Ma kwa nza n'yɛ mbe cɛ lekwesa nya tsetsenya ne, kaŋələvə ghen'yɛ, kala wəsə nya nza wəsə ɗaŋe ɗaŋe kwa ghəa n'yɛ. Kaganda ne, kaɗe n'yɛ kaseɗemte geva ta n'yɛ nya tsetsenya we, ama kaɗe n'yɛ kaseɗe kwete geva nya pelɛ ghweme kadzeghə, yitea zamte geva sebe te geva nya ketemte laka mpi.

⁵Shala le ghəa ŋkɛ nde hite n'yɛ yitea seɗe geva shɛ, nahe ŋkɛ kendeke n'yɛ Sefəa ŋkɛ kala ka ghate ta wəshi nyi teve n'yɛ ŋkɛ.

⁶Vatse hwepe ghə ghen'yɛ yitea ghena shɛ. Nahe ghen'yɛ keɗepe ma kwa nza ghen'yɛ mbe geva nya teke nya te hɛɗi ne, cakeɗake nza ta n'yɛ le ŋkwa nya nza Nde sleke ŋkwa te.

⁷Mbe dzeghwa n'yɛ kalə sha Shala laka yɛ, kaɗema va nya nakɛ ghen'yɛ.

⁸Kaganda ne, fəyitekeghə hwepe ghə ghen'yɛ, kaɗe n'yɛ kashave ki ghɛa n'yɛ nya te hɛɗi, geze ta ŋkɛ, geva ta n'yɛ kezha lə kadzete ŋkwa nya nza Nde sleke ŋkwa.

⁹Ama zlama ta ŋkɛ te ghen'yɛ yasepa ghen'yɛ kwetɛŋe, ya ghen'yɛ nza mbe geva nya, ya ghen'yɛ shave n'yɛ mbe.

¹⁰Kwa nza ŋkɛ, pɛtɛ tenza mə mbe kema ta Kriste yitea ghwə, kezha kemave zhɛme ta ŋkɛ yayata wəndə yipə yipə le wəsə kwa ndiremi keɗema wəsə kwa ganyɛ nya menete ŋkɛ te hɛɗi.

¹¹Nahe n'yɛ keɗepe tsema tsema hawe wəndə va Shala, vatse ɗe n'yɛ kaheka mbeli yite. Pɛtɛ ɗepe zeweve ta n'yɛ Shala. Ma zəzə 'ya ne, nahe yɛ keɗepe zeweve ta n'yɛ mbe zəzə ta ŋayɛ perə.

¹²Kazhɛne ghen'yɛ kancɛ ŋayɛ ghəa n'yɛ zhɛkwa we, ama kaɗe n'yɛ kamene slene tiɗiɗi yitea zlama yɛ te ghen'yɛ, nda ɗepe zhɛne nda ghena yɛ ke mbeli nyi kezlama te wəshi gəmə nyi newe mbeli, kaɗema te wəsə nya kwa wənə.

¹³Ma kemenete wəsə ghen'yɛ kala gezhi ne, kezha Shala menete ghen'yɛ. Ama kenza nde le mehele ta n'yɛ ghen'yɛ ne, kezha gheyɛ.

¹⁴Kwele kwele kesehwe n'yɛ ɗe ta Kriste, kwa ɗepe ghen'yɛ deke wəndə kwetɛŋe nde mtenyɛ kezha mbeli pɛtɛ, geze ta ŋkɛ, pɛtɛ mbeli kempə le.

¹⁵Nahe ŋkɛ kemte kezha mbeli pɛtɛ, yitea ɗema mbeli nyi teghweme kanza kezha ghəa nci, ama kezha wəndə nya kemte, nya kesamenyɛ kwa kwele kaŋa nci.

¹⁶Ma tsetsenya gɛ ne, mba n'yɛ kanewe kwete wəndə kala wəndə ŋelɛ we. Ma nda nahe ghen'yɛ kese kanewe Kriste kala wəndə ŋelɛ ne, mba n'yɛ kanewe kala nyagha tsetsenya we.

¹⁷Yayata wəndə nya kejikəte geva le Kriste ne, kala wəndə nya kwateya ŋkɛ. Nahe nza ta ŋkɛ nya kameha kekiɗi, nya kamɛnɛfɛ ya shɛ tsetsenya.

¹⁸Shala nde menete slene nya kala nya, gheŋkɛ nde tseɓate ɓəmə le ghəa ŋkɛ laka Kriste, gheŋkɛ nde dapave n'yɛ slene ta ŋkɛ kezha heka mbeli kanza ketseɓa tseɓa le.

¹⁹Kwa nza ŋkɛ laka Kriste tseɓate geva Shala le mbeli pɛtɛ, kazhɛne ŋkɛ kaɓela beze ghena ta nci we. Nahe ŋkɛ keghwenakɛ n'yɛ kezha geze nda ghena ta tseɓa geva shɛ ke kweci mbeli.

²⁰Kriste nde ghwenakɛ n'yɛ kala ka wəze makwa ta ŋkɛ, laka ghen'yɛ ne, Shala le ghəa ŋkɛ nde heka ŋayɛ. Le sləa Kriste mpi ŋayɛ dzeve ghen'yɛ kezha tseɓa ghə yɛ le Shala.

²¹Kese Kriste kamene jaɗafa ya ci'a we, ama nahe Shala keveyi jaɗafa ta ɓəmə kənə. Ma tsagha ne, tiɗiɗi nza gheɓəmə kwa kema ta Shala laka gheŋkɛ.