Read kapsiki 2 Ka Korɛnte 7 Bible Online

2 Ka Korɛnte 7 - kapsiki bible

2 Ka Korɛnte 7

¹Ma meɗe mɛ nyi pɛtɛ gɛ ka mcɛhɛ ɗa, kezha gheɓəmə veyi geva hɛ. Ma kala nya ŋkɛ ne, yaɓemte ɓəmə geva wɛŋe va wəshi nyi kebeze geva ta ɓəmə ba'a mehele ɓəmə. Keɗaŋe ɓəmə slene nya ghate gheɓəmə yitea nza gheɓəmə kambeli nyi keveyi geva tekeleke kaŋa Shala laka hawe ve.

²Ndeke n'yɛ mə ŋkwa nya kwa wənəa ŋayɛ. Kebezemte ghena n'yɛ le kwete wəndəa ŋayɛ we, kebezemte kwete ghen'yɛ wəndəa ŋayɛ we, kekelehwe wəsəa wəndə n'yɛ le mbəɗəkwə we.

³Yitea ve ŋayɛ fete nda geze 'ya kala nya we. Nahe 'ya kegezete ŋayɛ, kwa wənəa n'yɛ gheyɛ, jikə gheɓəmə ya gheɓəmə nza teghweme keɗema kempə mpə.

⁴Nahe 'ya kevate ghə kwele kwele te gheyɛ, nahe 'ya kenza fare fare yitea gheyɛ. Mbe yaka nyi sa gheɓəmə ne, kwele kwele gweɗakwete geva wənəa ɗa yitea səwə hɛ le zlama.

⁵Ghala ntsehe ta n'yɛ mbe Masɛdowane ne, kezhɛnakɛ mpi n'yɛ ya ci ci we. Kwele kwele sahwe yaka ghen'yɛ, nahe n'yɛ kempate mpa le kweci mbeli, tsekwe tseɗekwe wənəa n'yɛ.

⁶Ama Shala nya kegweɗakwe nda wənə ke mbeli nyi nza mehele ta nci ketaze taze nde gweɗakwete n'yɛ wənə laka se ta Tite.

⁷Deke se ta ŋkɛ nde gweɗakwete n'yɛ we, ama nahe ŋkɛ kegezete n'yɛ tsema tsema kemanakɛ ŋkɛ yɛ. Nahe ŋkɛ kegezete n'yɛ mawe ta ŋayɛ kezha zhɛne kanewe ɗa, yirə ta ŋayɛ ba'a hwepe ghə ta kezha ya ɗa. Vatse zlama 'ya kwele ma tsetsenya.

⁸Kaganda ne, nahe palepa ta ɗa nya rafave ŋayɛ 'ya kendeke ŋayɛ yirə, ama kese ŋkɛ kave ɗa zəzə we. Nahe 'ya keɗepe nahe palepa shɛ keyirəkɛ ŋayɛ kavə ɓɛhwɛ. Nahe ŋkɛ kendeke ɗa zəzə,

⁹ama zlama yazlama 'ya tsetsenya. Kenza va nza ta ŋayɛ keyirə yirə we, ama va zhɛrete wənəa ŋayɛ nza keyirə yirəa shɛ. Nahe Shala kezhɛrete ghena nya kezhɛ ŋayɛa shɛ kaghena ganyɛ, ma kala nya ŋkɛ gɛ ne, kebezemte ŋayɛ ghena 'ya we.

¹⁰Ma yirə nya mene Shala le ne, kezha zhɛre nza ta ŋkɛ wəndə. Ma kwa zhɛre nza ta ŋkɛ wəndə ne, kalə ŋkɛ sha mbele, kanehwene wəndəa shɛ ve zhɛkwa we. Ama yirə nya yitea wəshi nyi te hɛɗi ne, mte yaheka nda ŋkɛ ke wəndə.

¹¹Nahe yɛ kenakɛ wəsə nya menete Shala le yirə ta ŋayɛ: nahe yɛ kefeɗeghe, nahe yɛ kempiyi dzeve, kwele kwele hwepete wənə yɛ, nahe ghazlənə kezhɛte ŋayɛ, kwele kwele ɗehwe se ta ɗa yɛ, nahe yɛ kehwepete ghə, nahe yɛ kentsəte geva yitea ŋka jaɗafa hwa gheyɛ. Ya tsemanyɛ ŋkɛ ne, nahe yɛ kencɛte n'yɛ kaɗema fete va gheyɛ mbe ghena shɛ.

¹²Se te ghena ta wəndə nya kebezemte ghena ba'a wəndə nya menete nda beze ghena shɛ ŋkɛ nda rafete ŋayɛ palepa 'ya we. Nahe 'ya kerafete kezha ɗepe hwepe ghə ta ŋayɛ yitea ghen'yɛ kwa kema ta Shala.

¹³Nya ya kawəsə nya kegweɗakwete n'yɛ wənə. Ma kadzevare gweɗakwe ta n'yɛ ne, kwele kwele se n'yɛ kazlama kwa nakɛ zlama ta Tite ghen'yɛ, pɛtɛ yɛ kegweɗakwete nda wənəa ŋkɛ.

¹⁴Nahe 'ya ketsahekɛ ŋayɛ kwa kema ta Tite, kala nya gezete 'ya, tsagha menete yɛ. Keveci keveci se ghen'yɛ kageze ŋayɛ ghena nya kaganda. Ma ghena nya tsahekɛ ŋayɛ ghen'yɛ te kwa kema ta Tite ne, tsagha shɛnyɛ menete geva ŋkɛ.

¹⁵Tsagha ne, nahe ɗe ta ŋkɛ kezha gheyɛ kembakete geva, mba ŋkɛ kazəzə hawe nya hawete nda yɛ ba'a kemane nya kemaneve ŋkɛ yɛ megela le shifə ghə ba'a mehele.

¹⁶Kazlama 'ya kezha ve ghə te gheyɛ yitea pɛtɛa wəshi.