Read kapsiki Ka Galate 2 Bible Online

Ka Galate 2 - kapsiki bible

Ka Galate 2

¹Kwetere wəmbəa va meŋe wəfaɗeghəmbe ne, cape 'ya kadzeme Zhɛrəzalɛm le Barnabas, pa 'ya hekate Tite kwa sebe ta ɗa perə.

²Ma nda se 'ya kadzeme Zhɛrəzalɛm ne, va nya gezete ɗa Shala kadzeme. Ma kwa tsenete geva ghen'yɛ le mbelia jama ta ka Kriste nyi pelɛagha ne, pa 'ya ncɛte nda Ghena kwatenca nya ganyɛ nya gezete nda 'ya ke kweci hwelefefi ke hɛ, halama ke mbeli nyi te ghəa Jikə ta ka Kriste, yagha slene ganyɛ nya se 'ya kamene ba'a nya mene 'ya tsetsenya kanza gəmə.

³Ya Tite kwa nza ŋkɛ kande Grɛk ne, kese mbeli kaŋka ŋkɛ le berete yitea sla mɓɛta,

⁴ya kweci ka kesaka ma nyi kaka tseŋwə ɗe kasla nda mɓɛta we. Kala ghərə senji hɛ kadzembe mbeli kezha zhɛremte nza ta ɓəmə kaka mamzashi laka jikə ta ɓəmə le Yɛsə Kriste yitea zhɛre ɓəmə kaka mavashi.

⁵Kese ghen'yɛ kayɛ nda ke hɛ ya ci'a, yitea nza Ghena kwatenca nya ganyɛ kaghena nya kaganda we.

⁶Ma mbeli nyi kezəzə ghəa nci kambelia jama ne, katsakɛ ɗa hɛ we, kwa nza ŋkɛ kanta ghala Shala we. Ma mbelia jama shɛhɛ ne, kese hɛ kaŋka ɗa kadzeyitea kwete wəsə le berete we.

⁷Ama nahe hɛ kenakɛ nahe Shala kedapave ɗa Ghena kwatenca nya ganyɛa ŋkɛ kezha geze nda ke kweci hwelefefi, kala nya dapave nda ŋkɛ ke Piyɛre kezha ka Zhəwif.

⁸Kwa nza ŋkɛ nahe Shala keveyi ɗa kawəndə nya ghwenakɛ ŋkɛ kezha kweci hwelefefi, kala nya veyi Piyɛre ŋkɛ kezha ka Zhəwif.

⁹Ama nahe Zhake, Piyɛre ba'a Zhaŋe nyi ɗepe mbeli kala yɛ seləa Jikə ta ka Kriste kegezete nahe Shala kendeke ɗa zlaɓa ta ŋkɛ kezha slenea shɛ. Pa hɛ səkwəte dzeve le 'ya ba'a Barnabas nda ɗepe mbeli pɛtɛ kanya kwetɛŋe ghena ta n'yɛ le ŋa nci. Nahe ŋkɛ kehi kalə n'yɛ sha kweci hwelefefi. Ama ghenci ne, kalə hɛ sha ka Zhəwif.

¹⁰Nahe hɛ kegezete n'yɛ kezha zəzə n'yɛ deke te ka titikwəa kɛfi. Gheŋkɛa shɛ yantsəte geva 'ya kamene.

¹¹Ma kwa ntsehe Piyɛre mbe Antiyoshe ne, nahe 'ya keɗema ghena ta ŋkɛ te tepe ta mbeli va nya nza fete ve.

¹²Kwa nza ŋkɛ ma nda tese kweci mbeli nyi yitea Zhake ne, kazeme wəsə ŋkɛ le kweci hwelefefi. Ama kwa se mbelia shɛhɛ ne, hɛreɗɛ ŋkɛ ɗema zeme wəshi kezeme le mbelia shɛhɛ va ghazlənə va mbeli nyi kesla sla mɓɛta.

¹³Ma kweci ka Zhəwif nyi tagha kwa nakɛ Piyɛre hɛ ne, ntake hɛ kamene kala gheŋkɛ, pa le Barnabas keghwetame ghəa ŋkɛ mbe mbəɗəkwəa nci.

¹⁴Ma kwa nakɛ 'ya kaɗema hɛ kwa hweŋkwa nya kaganda ta Ghena kwatenca nya ganyɛ ne, ma 'ya sha Piyɛre kwa kema ta mbeli pɛtɛ: «Ma gha nya kande Zhəwif ne, hwa kweci hwelefefi nzahwe nza na, kala hɛ hi na kamene, yitea wa ŋka hɛ na kezha mene kala ka Zhəwif wa?»

¹⁵Kaka Zhəwif yake geva gheɓəmə kaganda, kenza gheɓəmə kaka jaɗafa kala kweci hwelefefi we.

¹⁶Ma tsagha ne, na gheɓəmə keɗepe kaɗema wəndə shɛ kanzate nza tiɗiɗi kwa kema ta Shala le wəsə mahalegə, ama deke le yɛ ghena ta Yɛsə Kriste. Nahe ghen'yɛ keyɛte Yɛsə Kriste kezha nza kambeli ganji kwa kema ta Kriste laka yɛ, ama kenza laka wəsə mahalegəa Shala we. Ma le wəsə mahalegə ne, wəndə shɛ kakemave nza tiɗiɗi kwa kema ta Shala we.

¹⁷Kwa nza gheɓəmə kazele nza tiɗiɗi kwa kema ta Shala mbe Kriste ne, kaka jaɗafa sləyi ghəa ɓəmə gheɓəmə kala kweci hwelefefi perə, Kriste nde veyi ɓəmə kaka jaɗafa na? Ewə, gheŋkɛ we.

¹⁸Ma kezhɛne 'ya kamene wəsə nya sərəakɛ 'ya va nya nza ŋkɛ kawəsə jaɗafa ne, wəsə mahalegə yazlakemte 'ya tsagha.

¹⁹Nahe wəsə mahalegə kepeslekɛ ɗa kwa ɗe 'ya kazele ŋkɛ, vatse nza 'ya kala wəsə kemte mte sha wəsə mahalegəa shɛ, yitea nza kaŋa Shala. Nahe 'ya kemte ɗa te sheghwə kwa zleŋkwa zlaɓe le Kriste.

²⁰Nza nya nza 'ya teghweme tsetsenya ne, 'ya nde nza we, Yɛsə nde nza mbe 'ya, vatse nza 'ya teghweme. Ma mpi nya nza wəndə ŋelɛ le teghweme ne, mbe nza 'ya teghweme laka yɛ nya yɛte Wəzege ta Shala 'ya nya keɗehwe ɗa ba'a nya kezamte mpia ŋkɛ kezha 'ya.

²¹Kazhɛne 'ya kaneghamte zlaɓa ta Shala we. Ma nda laka zele wəsə mahalegə nza wəndə kanzate nza tiɗiɗi kwa kema ta Shala ne, gəmə mte ta Kriste tsagha.