Read kapsiki Ka Ɛfɛze 3 Bible Online

Ka Ɛfɛze 3 - kapsiki bible

Ka Ɛfɛze 3

¹'Ya Pol nya kwa daŋgayɛ te ghena ta Yɛsə Kriste kezha gheyɛ kweci hwelefefi ne, kezha gheyɛ səkwə Shala 'ya.

²Nahe yɛ kefate slene ta ŋkɛ nya dapeyi ɗa Shala te dzeve kamene laka ɗe ta ŋkɛ kezha gheyɛ, yitea yipə zəzə ta ŋkɛ.

³Nahe Shala kencɛte ɗa ghena ta ŋkɛ nya tewəfərə. Nahe 'ya kegezete ŋayɛ ghena ɓɛhwɛ te ghəa ghena shɛ pelɛghə.

⁴Ma kenza yɛ kajaŋga wəsə nya rafete ŋayɛ 'ya ne, wərə yɛ kaɗepe nahe 'ya kefave ghena ta Kriste nya tewəfərə.

⁵Kese Shala kancɛ nda ghena nya tewəfərəa shɛ ke mbeli nyi ghalanza we, ama tsetsenya ncɛte nda Shala ke ka ghwene ta Yɛsə Kriste nyi ganji ba'a ka mɛ ŋkwa ta ŋkɛ laka Sefəa ŋkɛ.

⁶Wa nya ghena nya tewəfərəa shɛ nya: yipə yipə ka Zhəwif le kweci hwelefefi, yipə yipə tezeme ghɛ hɛ yitea Shala, kala geva nya kwetɛŋe nza hɛ, yipə yipə tekemave wəsə nya meɗeyi nda Shala ke hɛ mbe Yɛsə Kriste nya kencɛte nda Ghena kwatenca nya ganyɛ ke hɛ pɛtɛ.

⁷Nahe 'ya kezhɛre ɗa kande zlape ghena ta Shala laka zlaɓa ta ŋkɛ, va nya ncɛte ɗa berete ta ŋkɛ ŋkɛ.

⁸Ma 'ya ne, 'ya ya ɓɛhwɛ ma hwa mbelia Shala pɛtɛ. Ndagwara nahe Shala kendeke ɗa hweŋkwa kancɛ nda mcɛləa Kriste nya ɗema mbeli kadzeghete ke kweci hwelefefi.

⁹Berete ya va 'ya kancɛ nda ke hɛ tsema tsema temene geva zəzə ta ŋkɛ tsetsenya, wəshia ŋkɛ nyi tewəfərə nyi ɗe Shala kamene ghalanza, Shala nya kepate pɛtɛa wəshi nde wəfərəakɛ se te shinyɛ.

¹⁰Ma tsetse ŋkɛ ne, wərə mbelia jama nyi kesleke ŋkwa ba'a berete nyi pelɛ ghweme kaɗepe ntsehwelea Shala tsetsenya laka Jikə ta ka Kriste,

¹¹kala wəsə nya zəzəte Shala kamene ghalanza laka Yɛsə Kriste Nde sleke ɓəmə.

¹²Mbe nza ta ɓəmə jikə le Kriste ba'a laka yɛ ne, hweŋkwa ya va gheɓəmə waɗe kezha ntsehe kwa kema ta Shala kaɗema gezleŋe ghə shɛ.

¹³Vatse gɛ, ma 'ya sha gheyɛ: zamtema hwepe ghə yɛ mbe yaka nyi sa 'ya tewəmbəreke gheyɛ ma. Zləvə yave ŋayɛ ŋkɛ.

¹⁴Vatse gwəɗəŋə 'ya kwa kema ta Shala Yita,

¹⁵nya kesleke pɛtɛa mbeli nyi te hɛɗi ba'a pelɛ ghweme.

¹⁶Ka'yɛwe 'ya va Shala kala mcɛləa zləvəa ŋkɛ, kezha ndeke ŋayɛ berete ŋkɛ laka Sefəa ŋkɛ, yitea nza yɛ kaka Kriste nyi berete berete.

¹⁷Pa Shala veyi Kriste mbe wənəa ŋayɛ laka yɛ, pa yɛ hate slərə ba'a veyi shihəa ŋayɛ mbe ɗe.

¹⁸Ma tsagha ne, berete nde tenza va gheyɛ zlaɓe le mbelia Shala pɛtɛ yitea ɗepe ɗe ta Yɛsə, yɛ bezlea ŋkɛ le biya ta ŋkɛ, yɛ biya ta ŋkɛ kadzeme yitea ghweme le lɛamea ŋkɛ.

¹⁹Kaganda ne, kateɗepe ɗe ta Kriste nya kendakɛ pɛtɛa ɗepe wəshi yɛ, yitea nza yɛ behe behe va ganyɛa Shala.

²⁰Tsahe ɓəmə wəndə nya nza berete ve kamene slene mbe wənəa ɓəmə. Wəba ma slenea shɛ ke nya zəzə gheɓəmə ba'a nya 'yɛwe gheɓəmə kamene.

²¹Ŋa ŋkɛ nza zləvə mbe Jikə ta ka Kriste ba'a laka Yɛsə Kriste, keshi keshi ba'a kaghala ghala. Amɛn.