Read kapsiki Ka Ɛfɛze 4 Bible Online

Ka Ɛfɛze 4 - kapsiki bible

Ka Ɛfɛze 4

¹Kasəkwə ŋayɛ 'ya, 'ya nya kwa dəŋwə va slene ta Nde sleke ŋkwa: dzeghwa mə tiɗiɗi kala nya ɗe Shala nya kehekakɛ ŋayɛ.

²Nza mə kaka shifə ghə, kaka gwedəa kɛfi ba'a kaka zereghe ghena. Səwə mə ghena yitea ghəa ŋayɛ mbe ɗe.

³Hwepe mə ghə yitea nza kanya kwetɛŋe laka Sefəa Shala, laka kwelɛŋe nya kwelɛ ghəa ŋayɛ.

⁴Deke kwetɛŋe geva, kwetɛŋe Sefəa Shala, kwetɛŋe zəzə nya neghe yɛ se va Shala nya hekakɛ ŋayɛ,

⁵kwetɛŋe Nde sleke ŋkwa, kwetɛŋe yɛ, kwetɛŋe batɛme,

⁶kwetɛŋe Shala nya kaYiteyɛa mbeli pɛtɛ, nya kemene slene ta ŋkɛ laka mbeli pɛtɛ ba'a mbe mbeli pɛtɛ.

⁷Nahe yayata wəndəa ɓəmə kekemave zlaɓa yipə yipə le berete nya ndeke nda Kriste.

⁸Ma ke Ghena ta Shala gezete: «Ma kwa dzeme ghweme ŋkɛ ne, pa kekeseve ka daŋgayɛ, pa fəave nda wəshi ke mbeli.»

⁹Wa yaɗe «nahe ŋkɛ kedzeme ghweme» kageze wa? Ma ghena nya ɗe ŋkɛ kageze ne, va nya sawa ŋkɛ kaba hwa'a kwa zeweve ta hɛɗi.

¹⁰Ma wəndə nya kesawa shɛ ne, gheŋkɛa shɛ nde dzemenyɛ pelɛ ghweme nya biya ma, kezha yipə wəshi pɛtɛ.

¹¹Gheŋkɛ nde ndeke nda zlaɓa ke mbeli kezha nza kaka ghwene ta Yɛsə Kriste, kaka mɛ ŋkwa, kaka geze Ghena kwatenca nya ganyɛ, kaka ya ŋkwa, kaka teke nda wəshi ke mbeli.

¹²Ma nda menete ŋkɛ kala nya ne, baŋe mbelia ŋkɛ kanza le slene keghə keghə kezha ŋa geva ta Kriste.

¹³Tsagha ne, katenza mə pɛtɛ jikə kanya kwetɛŋe mbe yɛ ba'a mbe ɗepe Wəzege ta Shala tsape. Katenza gheɓəmə kambeli nyi kentsə ntsə mbe Kriste fate fate.

¹⁴Tsagha gɛ ne, katezhɛne gheɓəmə kanza kaŋwalea fəshi we. Katezhɛne gheɓəmə kanza yipə yipə le kwambelə nya tsəkwə gaŋkeɓe ta ndərə laka yayata bela we. Katezhɛne sefəa yɛ zəzə tseŋwə kafə ɓəmə jive laka yayata bela we. Katezhɛne kweci mbeli kaghwete ɓəmə le yɛ caŋa tseŋwəa nci we.

¹⁵Ama laka geze kaganda le ɗe ne, katekele gheɓəmə mbe pɛtɛa wəshi hwa'a sha wəndə nya kenza kaghə, gheŋkɛ Kriste.

¹⁶Ve se ŋkɛ nda nza bela nyi te geva jikə pɛtɛ kwelɛ ghəa nci. Kanya kwetɛŋe nza geva laka wəshi nyi kejikə bela ta ŋkɛ pɛtɛ, mbe kemane ghəa nci bela ta geva pɛtɛ, keghə keghə slene ta nci, kele yakele ŋkɛ tsagha laka ɗe ŋkwa.

¹⁷Wa nya ghena ta ɗa nya geze ŋayɛ 'ya le sləa Nde sleke ŋkwa nya: mba yɛ kenza kala ka ɗepema Shala. Mehele kwa ndiremi ta nci yazele hɛ.

¹⁸Nahe mehele ta nci kenza mbe ŋkwesle. Ka mentiɓə hɛ laka mpi nya ve nda Shala ke mbeli, va nya ɗepema kwete wəsə hɛ, kwa nza wənəa nci ntɛaŋe ntɛaŋe.

¹⁹Nahe hɛ kepesahwe hawe tsape tsape, kezha mene pɛtɛa wəshi nyi wale wale nyi zləmə zləmə hɛ yite.

²⁰Ama tsagha ghena ta Kriste nya tekeve yɛ we.

²¹Ghəpə yite we, nahe yɛ kefate ghena nya geze mbeli te ghəa ŋkɛ, nahe mbeli ketekete ŋayɛ hweŋkwa kenza kambelia Kriste, kaganda nya mbe Yɛsə.

²²Zlenekɛ mə ghena nyi menete yɛ vəashi. Seɗemte mə meha wəndə nya mbe gheyɛ, neghakɛ mə mawe nyi keghwete ŋkwa nyi keza ŋkwa.

²³Nda yɛ kazhɛrete geva kambeli mɛnɛfɛ fəyitekeghə mbe wənəa ŋayɛ ba'a mehele ta ŋayɛ.

²⁴Seɗaghe mə wəndə mɛnɛfɛ nya pate Shala kala ghəa ŋkɛ. Kaɗepete wəndə mɛnɛfɛ mbeli va nya nza ŋkɛ tiɗiɗi ba'a nya veyi geva ŋkɛ kaŋa Shala se te ghena kaganda nya fave ŋkɛ.

²⁵Nda tsetse ŋkɛ ne, mba tseŋwə kenza hwa gheyɛ. Geze nda ghena nya kaganda yayata wəndə ke nde ghedəkwəa ŋkɛ, kwa nza gheɓəmə pɛtɛ kabela nyi te geva nya kwetɛŋe.

²⁶Ma kehwepete wənə yɛ ne, ya mə ghəa ŋayɛ va mene jaɗafa, mba yɛ kepəkwə veci le wənə tehwepe.

²⁷Mba yɛ keve nda hweŋkwa ke gətəli kasleke ŋayɛ.

²⁸Mba wəndə nya keghərə kezhɛne kaghərə. Mene slene ŋkɛ megela kezha kemave wəsə nya tekemane wəndə nya ɗema wəsə ve ŋkɛ.

²⁹Mba ghena kwa zhɛ ŋkwa te wənə kesame kwa mɛa ŋayɛ. Geze mə ghena ganyɛ nya kemtsehe nda berete ke kweci mbeli mbe yɛ, kezha kemane mbeli nyi ketefa ghena shɛ.

³⁰Mba yɛ kemene wəsə nya nza Sefəa Shala sheŋwe sheŋwe ve, gheŋkɛ yavate lamba Shala te gheyɛ le kezha mbeɗemte ɓəmə cəkwə cəkwə kambelia ŋkɛ te kwete hɛ.

³¹Kelemte mə ndiremia mehele, beze wənə, hwepe wənə, ŋgezle ba'a ŋele ŋkwa cakeɗake le gheyɛ, ya mə ghəa ŋayɛ va yayata 'yaghwa mehele.

³²Nza mə megela kwelɛ ghəa ŋayɛ, nza mə le ɗe ŋkwa. Kelemte mə ghena nya bezemte yɛ te wənə kwelɛ ghəa ŋayɛ, kala nya kelemte ŋayɛ Shala te wənə laka Kriste.