Read kapsiki Ka Ɛfɛze 6 Bible Online

Ka Ɛfɛze 6 - kapsiki bible

Ka Ɛfɛze 6

¹Gheyɛ ŋwale, fa nda mə ghena ke mbeli nyi keyake ŋayɛ mbe Nde sleke ŋkwa, kwa nza ŋkɛ tiɗiɗi ŋkɛ.

²Hawe va yɛ yiteyɛ ŋa le meyɛ ŋa, gheŋkɛ ya kakwa ghate ta wəsə mahalegə nya nza meɗe mɛ nya yite:

³kezha kemave zeɗe nza ba'a temə kwele kwele na te hɛɗi.

⁴Gheyɛ mbeli nyi keyake ŋwale, hwepete nda ma wənəa ŋwalea ŋayɛ yɛ gəmə gəmə ma, ama 'yɛte mə hɛ le mehele kala nya geze ŋayɛ Nde sleke ŋkwa.

⁵Ka mavashi, hawe mə fate fate va mbeli nyi kesleke ŋayɛ kwake te hɛɗi le ghazlənə, le bare bare ba'a le wənə kwetɛŋe kala nya hawe yɛ va Kriste.

⁶Mene nda ma slene ganyɛ ke hɛ deke vəa ŋkwa nya nza hɛ tagha kanewe ŋayɛ kezha gwəfə nda ghə ke hɛ ma, ama mene mə kala ka mavashia Kriste nyi kentsə geva kamene ɗe ta Shala.

⁷Mene mə slene le ɗe ta ŋayɛ kala wəsə nya mene nda slene yɛ ke Nde sleke ŋkwa, kaɗema ke mbeli.

⁸Zəzəte mə: ya mava keɗema mamza ne, kateŋki nda wəsə Nde sleke ŋkwa ke yayata wəndə kala ganyɛ nya menete ŋkɛ.

⁹Gheyɛ nyi kesleke ka mavashi, nza mə kala nya laka hɛ. Mba yɛ kembeɗe nda ntsə ke hɛ ba'a kantsehe nda ŋzle ke hɛ. Zəzəte mə: Nde sleke ŋkwa nya pelɛ ghweme nde sleke ŋayɛ ba'a ka mavashia ŋayɛ perə. Kanta ghala ŋkɛ kwelɛ mbeli we.

¹⁰Kakwa keɗaŋe ne, zele mə berete ta ŋayɛ mbe jikə geva le Nde sleke ŋkwa, mbe berete ta ŋkɛ nya wəba.

¹¹Seɗe mə pɛtɛa wəshi kempa ta Shala kezha nza yɛ bereteke kwa kema ta yɛ ntsehwelea gətəli.

¹²Kwa nza ŋkɛ ma mpa ta ɓəmə ne, kenza le mbeli we, ama le mbelia jama nyi kesleke ŋkwa, ka meghe nyi te hɛɗi nya hwa ŋkwesle ba'a 'yi'yɛghwə nyi pelɛ yitea ghweme.

¹³Vatse gɛ, seɗete mə wəshi kempa ta Shala tsetsenya. Ma tsagha te veci nyi ndiremi ndiremi ne, katenza yɛ le berete ba'a katenza yɛ meslete, kwa sebe ta nya mpamte mpa yɛ.

¹⁴Nza mə ɗeke ɗeke: nza kaganda kala hətə nya hwa hwə va gheyɛ, kelete mə nza tiɗiɗi kala rəbəci.

¹⁵Nza hwepe ghə ta ŋayɛ kezha zlape Ghena kwatenca nya ganyɛ ta kwelɛŋe kala tsahwa nyi mbe seɗa ta ŋayɛ.

¹⁶Kevə kevə ne, keseve mə yɛ ta ŋayɛ kala gelə, katepele ŋayɛ hweŋkwa ŋkɛ kawesle yɛ have nyi kaghwə ta Nde ndiremia mehele.

¹⁷Yɛte mə mbele kala kwenə nya mbe ghə ba'a ghena ta Shala kala kafayɛ nya kese va Sefəa Shala.

¹⁸Səkwə mə ghə kevə kevə, mene səkwə ghə ta ŋayɛ ba'a 'yɛwe ta ŋayɛ laka kemane ta sefəa Shala. Ma tsagha gɛ ne, nza mə kentsehwele ntsehwele ba'a nza dɛŋe dɛŋe te səkwə ghə kezha pɛtɛa ka Kriste.

¹⁹Səkwə mə ghə kezha 'ya perə, kezha ve ghena nya tiɗiɗi Shala kwa mɛa ɗa. Tagha gɛ, katezlape wəsə nya tewəfərə ta Ghena kwatenca nya ganyɛ 'ya le hwepe ghə.

²⁰Nahe 'ya kenza kawəze makwa yitea ghena shɛ, ya kwela nza 'ya kwa daŋgayɛ tsetsenya kezha gheŋkɛ. Səkwə mə ghə kezha geze ghena 'ya le hwepe ghə, kala nya hi 'ya kamene.

²¹Kaɗe 'ya kaɗepe nza ta ɗa ba'a wəsə nya mene 'ya teke yɛ. Ma Tishike, wəza meyɛ ɓəmə nya ɗe 'ya, wəndə nya dɛŋe dɛŋe te slene ta Nde sleke ŋkwa ne, pɛtɛ tegeze ŋayɛ ghena ta ɗa ŋkɛ.

²²Vatse ghwenakɛ ŋkɛ 'ya təhə kalə sha gheyɛ, kezha geze ŋayɛ nza ta ɗa teke ba'a kezha gweɗakwe ŋayɛ wənəa ŋayɛ.

²³Pa Shala Yita ba'a Nde sleke ŋkwa Yɛsə Kriste ndeke ŋayɛ kwelɛŋe, ɗe ba'a yɛ ka kesaka meyɛ ɗa.

²⁴Pa zlaɓa ta Shala nza le yayata wəndə nya keɗe Nde sleke ɓəmə Yɛsə Kriste le ɗe nya keɗema kakiɗi.