Read kapsiki Ka Filipe 3 Bible Online

Ka Filipe 3 - kapsiki bible

Ka Filipe 3

¹Ma tsetsenya gɛ ka kesaka ma, zlama mə mbe Nde sleke ŋkwa. Kaleɓe 'ya va zhɛne ŋayɛ ghena nyi rafete ŋayɛ 'ya kaghate we, za ma kaganda shɛ sha gheyɛ.

²Ya mə ghəa ŋayɛ va mbeli nyi kakelɛketi, ya mə ghəa ŋayɛ va ka mene slene nyi ndiremi, ya mə ghəa ŋayɛ va mbeli nyi keghereŋe te ghena ta sla mɓɛta.

³Kwa nza ŋkɛ gheɓəmə ya kaka slamte mɓɛta ganji, kwa nza gheɓəmə kahawe va Shala laka Sefəa ŋkɛ, kwa nza nde mbe Yɛsə Kriste ŋa ɓəmə fege, keveyi zəzə ta ɓəmə te ghəa ɓəmə we.

⁴Ya 'ya ŋkɛ ne, wərə 'ya keveyi zəzə ta ɗa te ghəa ɗa. Ma kezəzə kwete wəndə kave ghə te ghəa ŋkɛ ne, za ma 'ya nza kamenete ke gheŋkɛ.

⁵Ma 'ya ne, nde Israyɛl 'ya, te kwa deghese ta hɛa ɗa slamte ɗa mɓɛta mbeli, hwelefe ta Bɛnjamɛn 'ya, nde Ɛbrə 'ya fate fate. Ma laka mene slene le wəsə mahalegəa ka Zhəwif ne, nde Fariziyɛn 'ya,

⁶nahe 'ya kese kahwepete ghə yite, vatse nda se 'ya kaghweze mɛ hwa Jikə ta ka Kriste. Ma laka nza tiɗiɗia wəsə mahalegə ne, wəndə shɛ kandeke ɗa fete we.

⁷Ama wəshi nyi newe nyi 'ya kala meleɓe ghalanza ne, kawəshi nyi gəmə newe hɛ 'ya tsetsenya kezha Yɛsə Kriste.

⁸Kaganda ne, kanewe pɛtɛa wəshi 'ya kawəshi gəmə tsetsenya, kezha baŋe 'ya kaɗepe wəndə kesleke ɗa Yɛsə Kriste. Tewəmbəreke gheŋkɛ sərəakɛ pɛtɛa wəshi 'ya kezha kemave Kriste, kala kəsə newe hɛ 'ya kezha baŋe Kriste kanza kaŋa ɗa wəsə nya kwa kema ta ɗa nahe,

⁹kezha nza 'ya jikə le fate fate. Va nya fate nda ghena 'ya ke wəsə mahalegə nda nza 'ya tiɗiɗi we. Ama laka yɛ nya yɛte 'ya nda se 'ya kakemave zeɗe helia ŋkɛ, laka yɛa shɛ nza 'ya tiɗiɗi mbe Kriste, te zlaɓa ta hweŋkwa kenza tiɗiɗi nya ve nda Shala ke wəndə nya keyɛte Kriste.

¹⁰Yayata wəsə nya zəzə 'ya ne, kezha ɗepete Kriste ba'a berete ta same ta ŋkɛ kwa kwele. Ma wəsə ya ɗe 'ya ne, sa yaka kale gheŋkɛ ba'a yipə geva le laka mte ŋkɛ,

¹¹kezha baŋe 'ya kasame kwa kwele kala gheŋkɛ perə.

¹²Kegeze 'ya nahe 'ya kekekave ŋkwa we, kegeze 'ya ganyɛke 'ya 'ya we. Ama hwɛ yahwɛ 'ya kezha kemave meleɓe, kwa nza ŋkɛ nahe Yɛsə kekeseve ɗa perə.

¹³Ka kesaka ma, kezəzəte 'ya nahe 'ya kekeseve wəsəa shɛ 'ya we. Ama zəzə ta ɗa kwetɛŋe ne, zamte ghəa ɗa yitea wəshi nyi kwa sebe ba'a ntsə geva 'ya kakeka nyi te kema ta ɗa.

¹⁴Kantsə geva 'ya tsape kahwɛ yitea kemave wəsə nya heka ɓəmə Shala laka Yɛsə Kriste kakele pelɛ ghweme.

¹⁵Ma gheɓəmə ka Kriste nyi kentsə ntsə ne, zəzə ɓəmə ghena nya kanya kwetɛŋe. Ma kenza kwete wəndə kazəzə tekeleke hwa gheyɛ ne, Shala nde tencɛ ŋayɛ zəzə ta ŋkɛ.

¹⁶Ya tsema tsemanyɛ ŋkɛ ne, ntsə ɓəmə geva kajive mbe kema kazele hweŋkwa nya zelete gheɓəmə pa tsetsenya.

¹⁷Ka kesaka ma, mene mə kala nya mene 'ya. Nahe n'yɛ kencɛte ŋayɛ wəsə keyipə pa. Tagha gɛ, vate mə ntsə ta ŋayɛ te mbeli nyi kedzeghwa kala wəsə keyipə pa shɛ.

¹⁸Nahe 'ya kegezete ŋayɛ kaghate, gheŋkɛa shɛ yageze ŋayɛ 'ya tsetsenya le nehwene kwa ntsə: ma nza ta kweci mbeli kwele kwele ne, kaka ghema ta sheghwə kwa slekwa ta Kriste hɛ.

¹⁹Ma kwa keɗaŋe ta slene ta mbeli nyi kala nyighɛ ne, zamte ghəa nci yatekemave hɛ. Kwa nza ŋkɛ hwəa nci ya kashala ta nci, kahawe hɛ va mene wəsə nya kepəli nda hawe ke hɛ we, fare fare ghəa nci yitea mene wəshi nyi teke te hɛɗi.

²⁰Ma gheɓəmə ne, nahe meleme ta ɓəmə kenza pelɛ ghweme, nya neghe Nde sleke ŋkwa Yɛsə Kriste gheɓəmə kande mbele ŋkwa sawa pelɛagha.

²¹Gheŋkɛ nde tezhɛre geva ta ɓəmə nya nza gheɓəmə le teke te hɛɗi, kamɛnɛfɛ kezha yipə le ŋa ŋkɛ nya nza zləvə te, laka berete nya keve nda hweŋkwa kave pɛtɛa wəshi mbe dzeve ta ŋkɛ.