Read kapsiki Ka Filipe 4 Bible Online

Ka Filipe 4 - kapsiki bible

Ka Filipe 4

¹Kala nya ŋkɛ gɛ ka kesaka ma ba'a ka mcɛhɛ ɗa ganji, kwele kwele ɗe 'ya kanakɛ ŋayɛ, gwəfə ghəa ɗa yitea gheyɛ, zləvəa ɗa yɛ. Vatse gɛ ka mcɛhɛ ɗa, nza mə dɛŋe dɛŋe te nza ta ŋayɛ le Nde sleke ŋkwa.

²Yɛ Ɛvodi le Sɛntishe, kasəkwə ŋayɛ 'ya le berete, nza mə nza ta ŋayɛ jikə kala yɛ wəzha ta ma mbe Nde sleke ŋkwa.

³Gha nya nza kemene slene nya kwetɛŋe le 'ya, kemanakɛ mi nyi se ghen'yɛ kampa jikə le hɛ yitea Ghena kwatenca nya ganyɛ, tsagha Kelɛmaŋ perə ba'a pɛtɛ mbeli nyi kese kabeghe ɗa kamene slenea shɛ. Nahe sləa nci kerafete geva te palepa ta mpi.

⁴Zlama mə mbe Nde sleke ŋkwa keveci keveci. Ma 'ya zhɛkwa: zlama mə.

⁵Nza mə ka gwedəa kɛfi sha mbeli pɛtɛ. Takwa takwa Nde sleke ŋkwa katese.

⁶Mba yɛ keheha yitea yayata wəsə, səkwə mə Shala yitea yayata wəsə nya nza titikwəa ŋkɛ te gheyɛ, 'yɛwe mə le wənə nya ketsa nda hana ke Shala.

⁷Kateya wənəa ŋayɛ ba'a zəzə ta ŋayɛ mbe Yɛsə Kriste, kwelɛŋea Shala nya kendakɛ nda berete ke fa ta mbeli pɛtɛ.

⁸Ka kesaka ma, ve mə mehele ta ŋayɛ te wəsə nya ganyɛ, nya kehi, nya tiɗiɗi, nya wɛŋe, nya ɗe mbeli, nya tsahe mbeli, wəsə nya ganyɛ tsape ba'a nya fale mbeli.

⁹Ma pɛtɛa wəshi nyi tekeve yɛ, nyi kemave yɛ, nyi fate yɛ ba'a nyi nakɛ yɛ va 'ya ne, mene mə slene le hɛ. Tagha gɛ, katenza Shala nya keve nda kwelɛŋe ke mbeli le gheyɛ.

¹⁰Kazlama 'ya kwele kwele mbe Nde sleke ŋkwa. Ŋ'wese 'ya shɛ tewəmbəreke nya zhɛne yɛ kakemanakɛ ɗa, nahe yɛ kezəzəte ɗa tsetsenya. Ya vecagha ŋkɛ ne, mbe zəzə ɗa yɛ, ama hweŋkwa kemene yakemavema yɛ.

¹¹Va nya nza titikwə te 'ya nda geze 'ya we, kwa nza ŋkɛ nahe 'ya ketekeve zlama yitea ŋa ɗa wəsə nya ɗave ɗa Shala.

¹²Nahe 'ya keɗepe nza kande titikwə, nahe 'ya keɗepe nza kande mcɛlə. Nahe 'ya ketekeve nza le pɛtɛa wəshi, ya 'ya nza behe, ya 'ya nza le ma, ya wəshi nza va 'ya kwele kwele, ya wəshi ɗema va 'ya.

¹³Wərə 'ya kamenete pɛtɛa wəshi laka zlaɓa ta Kriste nya kemtsehe ɗa berete.

¹⁴Ama tsetsenya ne, megela menete yɛ kwa kemanakɛ ɗa yɛ mbe titikwəa ɗa.

¹⁵Nahe gheyɛ ka Filipe keɗepe pɛtɛ, ghala slə 'ya mbe Masɛdowane, te va nya ghate mbeli kageze Ghena kwatenca nya ganyɛ, deke gheyɛ mbeli nyi kekemanakɛ ɗa, gheyɛ mbeli nyi jikə le 'ya mbe wəshi nyi kemave 'ya ba'a nyi zamte 'ya.

¹⁶Ma kwa se 'ya mbe Tɛsalonike, za ma ke kwetɛŋe zhigə ghweneke ɗa wəshi yɛ kakemane ɗa kwa nza titikwəa nci te 'ya.

¹⁷Zəzəma yɛ wəshi yazele 'ya ma. Ma wəsə nya zele 'ya ne, kezha kemave zhɛme yɛ.

¹⁸Ma kaghate ne, wəshi ya va 'ya, ma kwa keleke ɗa nyi kese va gheyɛ Ɛpafrodite ne, kwele ma wəshi va 'ya ɓiyitsa. Nahe wəshia ŋayɛ shɛhɛ kenza kawəsə nya zeɗehwe nda ke Shala, kamelɛ nya yɛhwe ŋkɛ ba'a nya zeɗehwe nda.

¹⁹Pa Shala ta ɗa kiɗimte ŋayɛ ŋa ŋayɛ titikwə kala nza ta mcɛləa ŋkɛ nya nza zləvə te, mbe Yɛsə Kriste.

²⁰Ŋa Shala Yiteyɛ ɓəmə zləvə kaghala ghala. Amɛn.

²¹Njiŋwakɛ mə mbelia Shala nyi mbe Yɛsə Kriste pɛtɛ. Ma ka kesaka meyɛ ɓə nyi teke le 'ya ne, kanjiŋwe ŋayɛ hɛ perə.

²²Pɛtɛa mbelia Shala nyi teke kanjiŋwe ŋayɛ, halama mbeli nyi ki ghɛa Sɛzar.

²³Pa zlaɓa ta Nde sleke ŋkwa Yɛsə Kriste nza le gheyɛ pɛtɛ.