Read kapsiki Ka Kolose 2 Bible Online

Ka Kolose 2 - kapsiki bible

Ka Kolose 2

¹Kaɗe 'ya kaɗepe yɛ mpa yampa 'ya le slene kezha gheyɛ, kezha ka Lawodisɛ ba'a kweci mbeli nyi keghama nakɛ ɗa le ghəa ɗa.

²Kaɗe 'ya kezha nza wənəa nci viɗi va hwepe ghə, kezha nza hɛ jikə mbe ɗe ba'a kezha ɗepe wəsə hɛ fate fate. Tagha gɛ, kateɗepe ɗepe wəsə ta Shala nya tewəfərə hɛ, gheŋkɛ Kriste.

³Mbe gheŋkɛ wəfərənji mcɛləa ntsehwele ba'a ɗepe wəsə nya kese va Shala.

⁴Ma nda geze ŋayɛ ghena nyi 'ya ne, yagha kwete wəndə kateghwete ŋayɛ le ghena ntsehwele gəmə.

⁵Ya tsemanyɛ nza 'ya cakeɗake le gheyɛ le geva ta ɗa ne, dekwede 'ya le gheyɛ mbe mehele ta ɗa. Fare fare wənəa ɗa kwa newe 'ya yipə mehele ta ŋayɛ mbe yɛ ta ŋayɛ te Kriste.

⁶Ma kwa nza ŋkɛ nahe yɛ keyɛte Yɛsə Kriste kaNde sleke ŋayɛ, nza mə nza jikə le.

⁷Ha mə slərə megela mbe, ŋa mə nza ta ŋayɛ te, nza mə le berete mbe yɛ, ve mə ghə te wəsə nya tekave ŋayɛ mbeli. Nza mə fate fate kambeli nyi keɗepe wəshi yitea mtsehe berete yɛ mbe kema mbe kema le tsa nda ŋ'wese ke Shala.

⁸Ntsehwele mə yagha mbeli kaghwetehwe ŋayɛ laka ghena keghwete ŋkwa ba'a ntsehwelea wəndə ŋelɛ. Deke te wəshi keshia mbeli, te yɛ berete ta hɛɗi lema dɛŋe geva hɛ, kaɗema te Kriste.

⁹Kwa nza ŋkɛ mbe geva ta Kriste nza ta Shala fate fate,

¹⁰Nahe yɛ kemave wəshi laka gheŋkɛ, gheŋkɛ nya te ghəa pɛtɛa mbelia jama nyi kesleke ŋkwa ba'a pɛtɛa berete.

¹¹Ma mbe nza ta ŋayɛ jikə le, nahe yɛ keslamte mɓɛta, kenza kala nya slamte mbeli le dzeve we, ama sla mɓɛta nya kese va Kriste kezha mbeɗe ɓəmə va jaɗafa nya menete berete ta geva.

¹²Ma kwa menete ŋayɛ batɛme mbeli le sləa ŋkɛ ne, nahe yɛ kelamte ghəa ŋayɛ le Kriste, nahe yɛ kesame ŋayɛ kwa kwele le gheŋkɛ, va nya yɛte berete ta Shala nya kekelakame Yɛsə le mpi kwa kwele yɛ.

¹³Ma vəashi ne, kempə mpə se yɛ va jaɗafa ta ŋayɛ, va nya nza yɛ kaka mɓɛta laka geva. Ama tsetsenya ne, nahe Shala kezhɛname mpi mbe gheyɛ le Kriste. Nahe Shala kekelemte jaɗafa ta ɓəmə pɛtɛ te wənə.

¹⁴Nahe ŋkɛ kesheshamte palepa nya keve ɓəmə fete, nya kezhɛraghe geva kənəa gheɓəmə tewəmbəreke wəshi nyi kegezete geva. Nahe ŋkɛ kezamte ŋkɛ laka baŋe ŋkɛ te sheghwə kwa zleŋkwa.

¹⁵Ma laka mte ta Yɛsə te sheghwə ne, nahe Shala kekelehwe berete va mbelia jama nyi kesleke ŋkwa ba'a yɛ berete. Nahe ŋkɛ kencɛte hɛ mbe kema ta mbeli pɛtɛ kala ka mavashi, kwa hweŋkwa ta Yɛsə kwa hərəte mte ŋkɛ.

¹⁶Ma kala nya ŋkɛ, mba yɛ kesərəakɛ wəndə kageze ŋayɛ ghena yitea wəsə nya zeme yɛ ba'a nya sa yɛ, ya gəsəkə, ya dzemɛa ghweme ta tere, ya veci kezhɛne mpi ŋkɛ.

¹⁷Wəshi nyi kala nyi pɛtɛ ne, shenaŋkwe ta wəshi nyi ketese hɛ. Ama kaganda ta nci ne, Kriste.

¹⁸Mba gheyɛ kesərə nda ghəa ŋayɛ ke mbeli nyi kezhɛrete ghəa nci kala ŋwale kwa kema ta ka ghwene ta Shala kezha hawe va hɛ. Nahe hɛ kevate zləvə te wəshi nyi nakɛ hɛ. Kaka fege hɛ gəmə, laka ntsehwelea zəzə ta nci gəmə.

¹⁹Kanza hɛ dɛŋe dɛŋe te Kriste, gheŋkɛ nya kaghə we. Te zlaɓa ta Kriste nda se geva kakemave wəsə kezeme laka jikə ta bela nyi te geva ba'a membeɗe nyi te, nda kele ŋkɛ kala nya ɗe Shala.

²⁰Ma nda nahe yɛ kempə ŋayɛ zlaɓe le Kriste ne, pələsə yɛ va wəshi nyi ɗe berete nyi kesleke hɛɗi. Wa raberə nza yɛ kala mbeli nyi kaŋa ŋkwa nya te hɛɗi ɓiyitsa wa? Wa raberə nda se yɛ kayɛ fete yitea wəshi nyi hawe hɛ ve wa?

²¹Kelema wəshia nci nyi na ma, ndɛamema hɛ na ma, kwaɗema hɛ na ma.

²²Pɛtɛ teza wəshia shɛhɛ ɗema ta mbeli kemenehwe slene le hɛ. Wəshi nyi gezeke mbeli ba'a ghena nyi kese va mbeli yateke nda hɛ ke mbeli gəmə.

²³Kaganda ne, ma hawe va kweci wəshi, shifə kwa kema ta ka ghwene ta Shala, sa nda yaka ke geva ne, kantsehwele newe hɛ mbeli. Ndagwara zləvə te wəshia shɛhɛ we. Deke kele ghə yave nda hɛ ke mbeli.