Read kapsiki Ka Kolose 4 Bible Online

Ka Kolose 4 - kapsiki bible

Ka Kolose 4

¹Gheyɛ nyi kaka sleke ka mavashi, mene nda mə wəsə nya kehi ba'a nya tiɗiɗi ke hɛ, va nya ɗepe yɛ Nde sleke ŋayɛ ya shɛ pelɛ ghweme perə.

²Ntsə mə geva kasəkwə Shala shanda, tsagha ne, katenza yɛ ɗeke ɗeke katsa nda ŋ'wese ke Shala.

³Səkwə mə ghə kezha ghen'yɛ perə, kezha baŋe Shala kandeke n'yɛ hweŋkwa kezlape ghena ta ŋkɛ, kezha geze ghena ta Yɛsə nya tewəfərə. Tewəmbəreke ghena shɛ nza 'ya tsetsenya kwa daŋgayɛ.

⁴Səkwə mə Shala kezha geze ghena ta ŋkɛ 'ya darahwe rahwe kala nya hi 'ya kageze.

⁵Nza mə le ntsehwele laka mbeli nyi keɗema kaka Kriste. Mene mə slene ganyɛ mbe və nya ndeke ŋayɛ Shala.

⁶Nza ghena ta ŋayɛ ganyɛke ba'a zeɗehwe nda ke mbeli. Ɗepe mə zhɛne nda ghena ke yayata wəndə le mehele ganyɛ.

⁷Wəza meyɛ ɓəmə Tishike, mava nya dɛŋe dɛŋe te slene ta ŋkɛ, nya kekemanakɛ ɗa megela, nya nza 'ya le mbe slene ta Nde sleke ŋkwa, nde tegeze ŋayɛ ghena te ghəa nza ta ɗa teke.

⁸'Ya kaghwene ŋkɛ kalə sha gheyɛ kezha geze ŋayɛ ghena ta nza ta n'yɛ teke ba'a kezha gweɗakwe wənəa ŋayɛ.

⁹Zlaɓe hɛ le Onɛzime, wəza meyɛ ɓəmə ganyɛ, nya dɛŋe dɛŋe te slene ta ŋkɛ, wəndə nya mbe meleme ta ŋayɛ ŋkɛ perə. Pɛtɛ tegeze ŋayɛ wəshi nyi kemenete geva teke hɛ.

¹⁰Kanjiŋwe ŋayɛ Aristarke nya teke kwa daŋgayɛ le 'ya, kanjiŋwe ŋayɛ Mark, menənyɛa Barnabas perə. Nahe yɛ kefate ghena te ghəa Mark, ma kese ŋkɛ sha gheyɛ, kemaneve mə ŋkɛ megela.

¹¹Kanjiŋwe ŋayɛ Yɛsə nya heka mbeli kaYəstəs perə. Deke ghenci ya kaka Zhəwif nyi kemene slene kezha Meghea Shala le 'ya, nahe hɛ kese kagweɗakwe ta wənəa ɗa.

¹²Kanjiŋwe ŋayɛ Ɛpafras, nya kakwete nde meleme ta ŋayɛ, nde mene nda slene ke Yɛsə Kriste. Keveci keveci səkwə Shala ŋkɛ kezha gheyɛ le hwepe ghə, kezha nza yɛ tiɗiɗi, kambelia jama nyi kentsə ntsə kaɗema kabeze ghena, kehi hi kezha mene slene ta Shala kala nya ɗe ŋkɛ kamene yɛ.

¹³Wərə 'ya kagezete ghena kala nya te ghəa ŋkɛ: kasa yaka ŋkɛ kwele kwele kezha gheyɛ ka Lawodisɛ ba'a ka Hiyɛrapolis.

¹⁴Kanjiŋwe ŋayɛ Ləwke, dakwəterə nya kamcɛ ɓəmə ba'a Dɛmas.

¹⁵Njiŋwe mə ka kesaka meyɛ ɓəmə nyi mbe Lawodisɛ, tsagha Nimfa ba'a Jikə ta ka Kriste nya ketsene ki ghɛa ŋkɛ.

¹⁶Ma kejaŋgate palepa nya yɛ ne, ve nda mə ke Jikə ta ka Kriste nya mbe Lawodisɛ kezha jaŋgate mbeli perə. Gheyɛ ɓiyitsa, jaŋga mə palepa nya ghweneke ŋayɛ mbeli se mbe Lawodisɛ.

¹⁷Geze nda mə ke Arshipe kezha ya slene ta ŋkɛ nya kelete ŋkɛ va Nde sleke ŋkwa ŋkɛ.

¹⁸Le dzeve ta ɗa rafete ŋayɛ ghena nyi 'ya, 'ya Pol kezha njiŋwe ŋayɛ. Mba ghəa ŋayɛ keza yitea nza ta ɗa kwa daŋgayɛ. Pa zlaɓa ta Shala nza le gheyɛ.