Read kapsiki 1 Ka Tɛsalonike 1 Bible Online

1 Ka Tɛsalonike 1 - kapsiki bible

1 Ka Tɛsalonike 1

¹Se va Pol, Silas ba'a Timotɛ, ke Jikə ta ka Kriste nya mbe Tɛsalonike, nya kaŋa Shala Yita ba'a ŋa Yɛsə Kriste Nde sleke ɓəmə. Pa Shala wəpikɛ ŋayɛ ba'a ndeke ŋayɛ kwelɛŋe.

²Katsa nda ŋ'wese ghen'yɛ ke Shala kezha gheyɛ keveci keveci ba'a kazəzə ŋayɛ n'yɛ kevə kevə mbe səkwə ghə ta n'yɛ.

³Kazaghəyite slene ganyɛ nya menete yɛ se laka yɛ, ɗe ta ŋayɛ nya kemene slene mbe gheyɛ ba'a ve ghə ta ŋayɛ nya fate fate nyi ndeke ɓəmə Yɛsə Kriste, Nde sleke ɓəmə, kwa kema ta Shala Yiteyɛ ɓəmə ghen'yɛ we.

⁴Ka kesaka ma, nahe ghen'yɛ keɗepe nahe Shala keɗehwe ŋayɛ nda ntave ŋayɛ ŋkɛ kaŋa ŋkɛ mbeli.

⁵Ma kwa gezete ŋayɛ Ghena kwatenca nya ganyɛ ghen'yɛ ne, kenza deke le mɛ we, ama le berete ba'a kemane ta Sefəa Shala. Nahe n'yɛ keɗepe wəsə nya geze ghen'yɛ. Nahe yɛ keɗepe wəsə nya menete ghen'yɛ kezha ganyɛa ŋayɛ kwa nza ghen'yɛ hwa gheyɛ.

⁶Nahe yɛ kezelete sebe ta n'yɛ ba'a ŋa Yɛsə Nde sleke ɓəmə. Ya gheyɛ nza te yaka kwele kwele ne, nahe yɛ kekemaneve ghena ta ŋkɛ le farefa ta wənə nya ndeke ŋayɛ Sefəa ŋkɛ.

⁷Nahe yɛ keveyi geva kawəsə keyipə pa sha mbelia Yɛsə Kriste nyi te hɛɗia Masɛdowane ba'a Akay.

⁸Ma tewəmbəreke ghena ta Shala nya geze yɛ ne, nahe kweci mbeli kwele kwele kefate ghena ta Nde sleke ŋkwa, deke ka Masɛdowane ba'a ka Akay we, nahe mbeli pɛtɛ kefate ghena ta ŋkɛ te yayata ŋkwa, tsema tsema yɛhwe Shala gheyɛ, kwete ghena va ghen'yɛ kamtsehe zhɛkwa we.

⁹Kərəpə mbelia shɛhɛ kageze ghena ta kemane nya kemaneve n'yɛ yɛ kwa lə ghen'yɛ sha gheyɛ, tsagha wəshi nyi zhɛrete mbeli kashala nyi sərəakɛ yɛ kezha zhɛre nda geva ke Shala nya teghweme ba'a nya kaganda.

¹⁰Tsetsenya ne, mbe neghe se ta Wəzege ta ŋkɛ yɛ sawa pelɛ ghweme, Yɛsə nya kelakame Shala same kwa kwele hwa mbelia kwahɛɗi le mpi, Yɛsəa shɛ nde mbelete ɓəmə va hwepe wənəa Shala nya ketese vəa ŋkwa nya temeha ghwə ŋkɛ te mbeli.