Read kapsiki 1 Ka Tɛsalonike 3 Bible Online

1 Ka Tɛsalonike 3 - kapsiki bible

1 Ka Tɛsalonike 3

¹Ma kwa shaŋe ghen'yɛ kazereghe nza kwa ɗema ghen'yɛ kenakɛ ŋayɛ ne, nahe ghen'yɛ ketarete kanza kaghəa n'yɛ mbe Atɛne.

²Vatse nda ghwenakɛ wəza meyɛ ɓəmə Timotɛ ghen'yɛ sha gheyɛ, kwete ŋkɛ wəndəa Shala nya geze Ghena kwatenca nya ganyɛ ta Yɛsə Kriste ghen'yɛ le. Nahe ghen'yɛ keghweneghe kalə sha gheyɛ kezha kemane ŋayɛ, kezha kemave berete kenza tiɗiɗi yɛ kwa hweŋkwa ta Shala,

³yitea ɗema kwete wəndə kahwɛ same kwa hweŋkwa ta Shala va yaka. Nahe yɛ keɗepe le ghəa ŋayɛ nahe Shala kemenete kala nya kezha sa yaka gheɓəmə mbeli nyi kezele ghena ta Yɛsə.

⁴Ma kwa nza ghen'yɛ hwa gheyɛ vəashi ne, nahe ghen'yɛ kegezete ŋayɛ katesa yaka gheɓəmə, gheŋkɛa shɛ nde menete ŋayɛ geva, kwa nza ŋkɛ nahe yɛ keɗepete.

⁵Vatse shaŋe 'ya kazereghe nda ghweneghe Timotɛ 'ya sha gheyɛ, yitea fa nza ta yɛ ta ŋayɛ. Nahe 'ya ghazlənə ɗa, nda kwete nahe gətəli keghwetehwe ŋayɛ ba'a nahe slene ta n'yɛ kenza gəmə.

⁶Ma kwa zhɛneke geva Timotɛ kase sha ghen'yɛ ne, nahe ŋkɛ kegezete ghena ganji te yɛ ta ŋayɛ ba'a ɗe ta ŋayɛ. Nahe ŋkɛ kegezete n'yɛ tsema tsema zəzə n'yɛ yɛ keveci keveci, kaɗe yɛ kanewe n'yɛ kala nya ɗe n'yɛ kanewe ŋayɛ perə.

⁷Kala nya gɛ ka kesaka ma, mbe taze ta mehele ba'a yaka nyi te ghen'yɛ ne, nahe yɛ ta ŋayɛ kemtsehete n'yɛ berete.

⁸Ma kwa nza ŋkɛ mba gheyɛ le berete kwa hweŋkwa ta Shala ne, lɛnɛake wənəa n'yɛ te ghena shɛ ɓiyitsa.

⁹Ma tewəmbəreke zlama ta n'yɛ yitea gheyɛ ne, tsema tsema nza n'yɛ katsate nda ŋ'wese ke Shala, va zlama nya ve n'yɛ yɛ kwa kema ta ŋkɛ wa?

¹⁰Kasəkwə Shala shɛ n'yɛ viɗi le veci kezha ndeke n'yɛ hweŋkwa kalə kanewe ŋayɛ ŋkɛ kezha teke ŋayɛ kweci wəshi nyi kedewə nda ke yɛ ta ŋayɛ.

¹¹Pa Shala Yita ba'a Nde sleke ɓəmə Yɛsə Kriste ndeke n'yɛ hweŋkwa kalə sha gheyɛ.

¹²Pa Nde sleke ŋkwa mtsehete ɗe ghəa ŋayɛ ba'a ɗe kweci mbeli, kala nya ɗe ŋayɛ ghen'yɛ.

¹³Ma tsagha gɛ, katemtsehe nda berete ŋkɛ ke wənəa ŋayɛ, kezha nza kambeli nyi keveyi geva tekeleke, yagha wəsə kwa ndiremi kanza mbe gheyɛ ya ɓɛhwɛ kwa kema ta Shala Yita, vəa ŋkwa nya tesawa Nde sleke ɓəmə Yɛsə le mbelia ŋkɛ. Amɛn.