Read kapsiki 1 Ka Tɛsalonike 4 Bible Online

1 Ka Tɛsalonike 4 - kapsiki bible

1 Ka Tɛsalonike 4

¹Ka kesaka ma, ma ghena nya tene ghen'yɛ kageze ŋayɛ ne, hite mə nza ta ŋayɛ kala nya ɗe Shala, kala nya tekave ŋayɛ ghen'yɛ, gheŋkɛa shɛ yamene yɛ kaganda tsetsenya, vatse səkwə ŋayɛ ghen'yɛ te sləa Yɛsə Nde sleke ɓəmə, mene mə za ma ke kwa ghate.

²Nahe yɛ keɗepe wəshi nyi tekave ŋayɛ ghen'yɛ se va Yɛsə Nde sleke ŋkwa.

³Wa nya wəsə nya ɗe Shala nya: nza mə tekeleke kaŋa ŋkɛ ba'a sərəakɛ mə vale tahe.

⁴Pa yayata wəndə ɗepe nza tiɗiɗi ba'a kala nya kehi le male ta ŋkɛ,

⁵kaɗema kasərə nda ghəa ŋkɛ kemawe ta geva kala nya mene kweci hwelefefi nyi keɗepema Shala.

⁶Ma te ghena nya ne, mba kwete wəndə kebeze nda ghena ke menənyɛ keɗema keghwete ŋkɛ. Kwa nza ŋkɛ nahe ghen'yɛ kegegezete ŋayɛ katesa nda yaka Nde sleke ŋkwa ke mbeli nyi kemene wəshi nyi kala nyighɛ.

⁷Kwa nza ŋkɛ ne, kehekake ɓəmə Shala kezha mene vale tahe we, ama kezha nza kambeli nyi tiɗiɗi.

⁸Ma kala nya gɛ, ma wəndə nya keɗema kayɛ ghena nya ne, ghena ta wəndə yaɗema ŋkɛ we, ama ŋa Shala nya keve ŋayɛ Sefəa ŋkɛ yaɗema ŋkɛ.

⁹Ka kesaka ma, kaleɓe ghəa nci mbeli karafe ŋayɛ palepa te ghena ta ɗe kwelɛ ghəa ŋayɛ we, kwa nza ŋkɛ nahe Shala le ghəa ŋkɛ kencɛte ŋayɛ ɗe ghəa ŋayɛ.

¹⁰Tsagha shɛ mene yɛ kaganda, kaɗe mbelia Shala nyi te hɛɗia Masɛdowane yɛ pɛtɛ. Ama kasəkwə ŋayɛ ghen'yɛ kezha mtsehe mene ta ŋkɛ jive mbe kema.

¹¹Ntsəte mə geva kezha nza kwelɛŋe le mbeli, mba yɛ kenegha geva kadzeghwa ghena ta mbeli, mene mə slene le dzeve ta ŋayɛ, kala nya gezete ŋayɛ ghen'yɛ.

¹²Ma tsagha ne, katenza zləvə te dzeghwa ta ŋayɛ kwa kema ta mbeli nyi keɗema kaka Kriste ba'a katenza yɛ te dzeve va yayata wəndə we.

¹³Ka kesaka ma, kaɗe ghen'yɛ kaɗepete kaganda yɛ te ghəa mbeli nyi kempə, yagha yɛ kanza le wənə kebeze beze kala mbeli nyi ɗema ve ghə va hɛ.

¹⁴Kaganda ke gheɓəmə sha mte ta Yɛsə ba'a sha same ta ŋkɛ kwa kwele le mpi. Tsagha shɛ ne, katefə mbeli nyi kempə mpə Shala same kwa kwele zlaɓe le Yɛsə.

¹⁵Ma ghena nya geze ŋayɛ ghen'yɛ tsetsenya ne, ghena nya tekave n'yɛ Nde sleke ŋkwa. Ma gheɓəmə mbeli nyi teghweme vəa ŋkwa nya tese Nde sleke ŋkwa ne, katenza gheɓəmə mpelɛa ke mbeli nyi kempə mpə we.

¹⁶Ma te vecia shɛ ne, katefa gaka mbeli, ŋwələa wəndə kwelea ka ghwene ta Shala, vɛ ta tereme ta Shala. Tagha gɛ, katesawa Nde sleke ŋkwa le ghəa ŋkɛ pelɛ ghweme. Katesame kaka Kriste nyi kempə kwa kwele le mpi mpelɛa.

¹⁷Ma gheɓəmə nyi mba teghweme vəa ŋkwa shɛ ne, katefə geva gheɓəmə kadzeme kadzembe ləmbə le hɛ kezha begeme le Nde sleke ŋkwa mbe sefə. Tagha gɛ, katenza gheɓəmə le Nde sleke ŋkwa kaghala ghala.

¹⁸Ma tsetse ŋkɛ gɛ ne, gweɗakwe nda mə wənə ke ghəa ŋayɛ le ghena shɛhɛ.