Read kapsiki 1 Ka Tɛsalonike 5 Bible Online

1 Ka Tɛsalonike 5 - kapsiki bible

1 Ka Tɛsalonike 5

¹Ka kesaka ma, ma te nza ta və ba'a hɛ ne, kaleɓe ghəa n'yɛ n'yɛ karafe ŋayɛ ghena we, katemene geva wəshia shɛhɛ tsagha shɛ.

²Kwa nza ŋkɛ nahe yɛ keɗepe le ghəa ŋayɛ katese vecia Nde sleke ŋkwa kala ghərə heviɗi vəkə.

³Ma te veci nya geze mbeli: «Kwete ghena shɛ we, gwezlayɛ hɛɗi», a ke hɛ ne, vəa ŋkwa shɛ tesa yɛmə hɛ yitea wevɛa kaja, vəkə tedzeghəa hɛ yaka shɛ, kala male nya keheha va ya, katembele mbelia shɛhɛ tɛape we.

⁴Ma gheyɛ gɛ ka kesaka ma, kenza yɛ mbe ŋkwesle kezha tesave ŋayɛ se vəa shɛ vəkə kala ghərə we.

⁵Gheyɛ pɛtɛa ŋayɛ ne, mbeli nyi mbe waŋe yɛ, mbelia veci yɛ. Kenza gheɓəmə kambeli nyi mbe ŋkwesle, ya kambeli nyi mbe viɗi we.

⁶Ma kwa nza ŋkɛ kala nya ne, mba gheɓəmə kedzete hɛ ɓəmə kala kweci mbeli, ama nza ɓəmə le ntsə, mba gheɓəmə keghwəyi.

⁷Heviɗi hɛ mbeli nyi kehɛ, heviɗi ghwəyi mbeli nyi keghwəyi.

⁸Ma gheɓəmə nyi kaŋa veci ne, ghwəyima gheɓəmə ma. Kelete ɓəmə yɛ ba'a ɗe kala rəbəci, ve ghə te mbele kala kwenə.

⁹Kwa nza ŋkɛ ne, ketsehave ɓəmə Shala kezha hwepe wənəa ŋkɛ we, ama kezha mbele ɓəmə laka dzeve ta Nde sleke ɓəmə Yɛsə Kriste tsehave ɓəmə ŋkɛ.

¹⁰Gheŋkɛ nde mtenyɛ kezha gheɓəmə kezha nza gheɓəmə jikə le, ya gheɓəmə nza teghweme keɗema kempə mpə te veci nya tezhɛne geva ŋkɛ kase.

¹¹Ma tsetse ŋkɛ ne, gweɗakwe nda mə wənə ba'a ntsə nda mə berete ke ghəa ŋayɛ, kala nya mene nya yɛ tsetsenya.

¹²Kasəkwə ŋayɛ n'yɛ ka kesaka ma, hawe mə va mbeli nyi kemene slene ta Nde sleke ŋkwa hwa gheyɛ, nyi ntave ŋkɛ kezha nza te ghəa ŋayɛ ba'a kezha ncɛ ŋayɛ hweŋkwa.

¹³Hawe mə va hɛ kwele kwele, tewəmbəreke slene ta nci hwa gheyɛ, ncɛ nda mə ɗe ke hɛ. Nza mə kwelɛŋe kwelɛ ghəa ŋayɛ.

¹⁴Kasəkwə wəsə nya ghen'yɛ va gheyɛ ɓiyitsa ka kesaka ma: ŋele mə ka meɗəa kɛfi, mtsehe nda mə berete ke ka ghazlənəa kɛfi. Kemane mə ka dewə berete mbe yɛ, səwə mə ghena yitea mbeli pɛtɛ.

¹⁵Ntsehwele mə, yagha kwete wəndə tewa wəsə kwa ndiremi le wəsə kwa ndiremi. Ama ntsə mə geva kamene ganyɛ keveci keveci kwelɛ ghəa ŋayɛ ba'a ke mbeli pɛtɛ perə.

¹⁶Zlama mə keveci keveci.

¹⁷Leɓema yɛ va səkwə Shala ma.

¹⁸Tsa nda mə ŋ'wese ke Shala keveci keveci ya tsema tsemanyɛ ŋkɛ. Gheŋkɛ yaɗe Shala kamene yɛ, gheyɛ mbeli nyi jikə le Yɛsə Kriste.

¹⁹Mba yɛ kefɛa Sefəa Shala kemene slene.

²⁰Mba yɛ keɓelama ghena kelɛŋə nyi kegeze geva hwa gheyɛ.

²¹Neweve mə nza ta yayata wəsə, nda kele nya ganyɛ yɛ.

²²Ya mə ghəa ŋayɛ va yayata wəsə kwa ndiremi.

²³Pa Shala nya keve nda kwelɛŋe ke mbeli le ghəa ŋkɛ veyi ŋayɛ tekeleke fəyitekeghə. Pa ŋkɛ yate ŋayɛ, mehele ta ŋayɛ, mpia ŋayɛ ba'a geva ta ŋayɛ, kezha ɗema ŋele kanza te gheyɛ vəa ŋkwa nya tese Nde sleke ɓəmə Yɛsə Kriste.

²⁴Kateyipə wəsəa shɛ Nde hekakɛ ŋayɛ kadzawa, kwa nza ŋkɛ nahe ŋkɛ kenza dɛŋe dɛŋe te ghena ta ŋkɛ.

²⁵Ka kesaka ma, səkwə mə Shala kezha ghen'yɛ perə.

²⁶Njiŋwe mə ka kesaka ma pɛtɛ le zlama kala ka mama.

²⁷Təhwə təhwə ŋayɛ 'ya te sləa Nde sleke ŋkwa, jaŋgate mə palepa nya kwa kema ta pɛtɛa ka Kriste.

²⁸Pa zlaɓa ta Nde sleke ɓəmə Yɛsə Kriste nza le gheyɛ pɛtɛ.