Read kapsiki Zhozəwɛ 10 Bible Online

Zhozəwɛ 10 - kapsiki bible

Zhozəwɛ 10

¹Pa Adoni-Sɛdɛk, meghea ka Zhɛrəzalɛm fate nahe Zhozəwɛ kekelehwe meleme ta Ay, kendəmte ŋkɛ, kemenete nda kala nya menete nda ŋkɛ ke Zhɛriko ba'a meghea ŋkɛ, nahe ka Gabawon kemenete nza kwelɛŋe le ka Israyɛl ba'a kenzanji hwa hɛ.

²Pa ghena shɛhɛ ndeke nda ghazlənə kwele kwele ke Zhɛrəzalɛm. Kwa nza ŋkɛ ne, wəba ma Gabawon ke Ay, zləvə ma te ke yɛ meleme ta meghe ba'a ka katsala kɛfi ya mbe.

³Tagha gɛ, pa Adoni-Sɛdɛk, meghe nya mbe Zhɛrəzalɛm ghwenakɛ ŋkwa sha Hoham, meghea ka Hɛbron, Piram, meghea ka Yarməwt, Yafiya, meghea ka Lakish ba'a Debir, meghea Ɛglon. Ma ke 'yɛwete va hɛ:

⁴«Nde mə sha 'ya kakemane ɗa kezha mpə ka Gabawon, va nya menete nza kwelɛŋe hɛ le Zhozəwɛ ba'a ka Israyɛl.»

⁵Pa ka meghe nyi mcɛfe nyi mbe Amor, meghea ka Zhɛrəzalɛm, meghea ka Hɛbron, meghea ka Yarməwt, meghea ka Lakish ba'a meghea ka Ɛglon jikəte geva. Le ka sewajɛa nci pɛtɛ ne, pa hɛ menete ghedəkwəa nci yitea Gabawon ba'a have nda mpa.

⁶Ma ke ka Gabawon ghwenakɛ ŋkwa kageze nda ke Zhozəwɛ mbe ghedəkwə mbe Gilgal: «Sərəma kemane ka mavashia ŋa na ma, nde kahe kahe kambele n'yɛ, kemanakɛ n'yɛ. Kwa nza ŋkɛ pɛtɛa ka meghea ka Amor nyi hwa ghweme kejikəte geva yitea ghen'yɛ.»

⁷Cape Zhozəwɛ same kwa Gilgal le mbeli kempa ta ŋkɛ pɛtɛ, pɛtɛa megelɛgeshi kempa.

⁸Ma ke Mahwətə sha Zhozəwɛ: «Ghazlənəma na va hɛ ma, nahe 'ya kendeke ŋa hɛ mbe dzeve ta ŋa, kwete wəndəa nci shɛ kateghereŋe kwa kema ta ŋa we.»

⁹Vəkə Zhozəwɛ ntsehe hwa hɛ, kwa sebe ta nya hɛ ŋkɛ kadzeghwa hwencɛke ncɛke same kwa Gilgal le ka sewajɛa ŋkɛ.

¹⁰Pa Mahwətə tazemte mehele ta nci kwa nakɛ ka Israyɛl hɛ. Kwele kwele kemanakɛ ka Gabawon hɛ, pa hɛ kekate hɛ dzawa laka Bɛt-Horon ba'a ɗate hɛ hwa'a mbe Azɛka ba'a Makɛda.

¹¹Ma kwa hwɛ ka Amor va ka Israyɛl kadzawa laka kwete bela ta Bɛt-Horon ne, pa Mahwətə betakawa pelɛ sawa pelɛ ghweme kadzeghəa hɛ hwa'a mbe Azɛka ba'a pa hɛ mpənji. Kwele kwele ma mbeli nyi kempə va pelɛ ke nyi mpəmte ka Israyɛl le kafayɛ.

¹²Pa Zhozəwɛ gezete nda ghena ke Mahwətə te veci nya ndeke nda ka Amor Mahwətə ke ka Israyɛl. Ma ke tsate lewela kwa kema ta ka Israyɛl: «Veci, ghereŋe ŋa kənəa meleme Gabawon! Tere, ghereŋe kənəa zlərəa Ayalon!»

¹³Ghereŋe veci kaɗema kadzeghwa, ghereŋe tere, nda wate dewa ka Israyɛl te ka ghema ta nci. Pa ghena shɛ rafeyi geva mbe Palepa ta Wəndə nya tiɗiɗi, nahe veci keghereŋenyɛ te tepe ta ghweme, kese kawədə geva kezha pəkwə we, takwa yitea vəghwə temə ta ŋkɛ.

¹⁴Kegha veci kamenete geva kala nya ya heca, ya kwa sebe, nya menete Mahwətə kala nya gezete wəndə ŋelɛ we, kwa nza ŋkɛ ne, mpa yampa Mahwətə yitea ka Israyɛl.

¹⁵Kwa sebe ta ŋkɛ, pa yɛ Zhozəwɛ le pɛtɛa ka Israyɛl zhɛneghe geva kadzembe ghedəkwə nya mbe Gilgal.

¹⁶Pa ka meghea kɛfia shɛhɛ hwɛnji ba'a ntikənji kwa gezlɛŋəa Makɛda.

¹⁷Pa mbeli ɗepete mbe gezlɛŋəa shɛ ntikə nci hɛ, pa mbeli se kagezete nda ke Zhozəwɛ.

¹⁸Ma ke Zhozəwɛ: «Pəŋəyi mə pelɛ nyi jama jama mɛa gezlɛŋəa shɛ ba'a nteyi mə mbeli kezha ya.

¹⁹Ma gheyɛ nyi ketene ne, mba yɛ kesərəakɛ keka ka ghema ta ŋayɛ, mpəmte mə hɛ, ɗate mə ka sewajɛ nyi kwa sebe. Pelema hɛ yɛ kadzembe meleme ta nci ma, kwa nza ŋkɛ nahe Shala Mahwətə ta ŋayɛ kendeke ŋayɛ hɛ mbe dzeve ta ŋayɛ.»

²⁰Ma kwa sebe ta ŋkɛ, kwa mpəmte ka Amor yɛ Zhozəwɛ le ka Israyɛl ne, deke kweci ɓɛhwɛ ka mbelenji kadzembe meleme ta nci.

²¹Ma kwa sebe ta ŋkɛ, pa pɛtɛa ka Israyɛl zhɛneke geva kwelɛŋe kadzembe ghedəkwə mbe Makɛda sha Zhozəwɛ, wəndə shɛ te hɛɗia shɛ nya keɗe kageze nda ghena ke ka Israyɛl we.

²²Ma kwa sebe ta ŋkɛ, ma ke Zhozəwɛ sha mbeli: «Ghwenemte mə gezlɛŋə, fəakave ɗa mə ka meghe nyi mcɛfea shɛhɛ.»

²³Pa mbeli fəakave nda ka meghe nyi mcɛfea shɛ: meghea ka Zhɛrəzalɛm, ŋa ka Hɛbron, ŋa ka Yarməwt, ŋa ka Lakish ba'a ŋa ka Ɛglon.

²⁴Ma kwa fəakave hɛ mbeli sha Zhozəwɛ, pa Zhozəwɛ hekakɛ pɛtɛa ka Israyɛl, ma ke sha mbeli nyi te ghəa ka sewajɛ nyi kese kwamte mpa yite: «Hendeke mə geva kase, ŋkeɗeyite mə seɗa yitea ghə va ka meghea kɛfia shɛhɛ.» Pa hɛ se ba'a ŋkeŋkeɗeyi seɗa yitea ghə va hɛ.

²⁵Ma ke Zhozəwɛ: «Dakema yɛ ba'a ghazlənəma yɛ ma, ntsəte mə berete ba'a hwepe mə ghə, kwa nza ŋkɛ tsetse temene nda Mahwətə ke pɛtɛa ka ghema ta ŋayɛ nyi tempa yɛ le hɛ.»

²⁶Ma kwa sebe ta ŋkɛ ne, pa Zhozəwɛ mpəmte hɛ. Pa ŋkɛ hwepeyi hɛ ŋalawe hwa wəfe keghə keghə mcɛfe, mba hɛ hwa wəfea shɛhɛ pa va tɛhwɛɗi.

²⁷Ma kapəkwə veci ne, pa Zhozəwɛ gezete nda ke mbeli kezha fəakawa mbeli nyi kempə mpə sawa pelɛ wəfe. Pa mbeli beteyi hɛ mbe zlera nya se hɛ tewəfərə kwa ba'a zhɛneyi pelɛ nyi kese mɛ mɛ, mba pelɛa shɛhɛ mɛ pa ɓeshi.

²⁸Te vecia shɛnyɛ kelehwe meleme ta ka Makɛda Zhozəwɛ, mpəmte yɛ meghea ŋkɛ le pɛtɛa mbeli nyi mbe ŋkɛ le kafayɛ. Kepelakɛ wəndə ŋkɛ kambele we, pa ŋkɛ menete nda ke meghea ka Makɛda kala nya menete nda ŋkɛ ke meghe nya mbe Zhɛriko.

²⁹Pa yɛ Zhozəwɛ le pɛtɛa ka Israyɛl slə mbe Makɛda kadzembe Libna ba'a have nda mpa.

³⁰Pa Mahwətə ndeke nda melemea shɛ ba'a le meghea ŋkɛ ke hɛ perə, pa ka Israyɛl mpəmte hɛ le kafayɛ kaɗema kesərəakɛ wəndə teghweme mbe. Pa hɛ menete nda ke meghea ŋkɛ kala nya menete nda ŋkɛ ke meghea ka Zhɛriko.

³¹Pa Zhozəwɛ le pɛtɛa ka Israyɛl slə mbe Libna kadzembe Lakish: Pa hɛ menete ghedəkwəa nci vare meleme ba'a have nda mpa.

³²Pa Mahwətə ndeke nda Lakish mbe dzeve ke ka Israyɛl te kwa bake ta hɛa mpa. Pa hɛ mpəmte hɛ le kafayɛ kaɗema kesərəakɛ wəndə teghweme mbe, kala nya menete nda ŋkɛ ke Libna.

³³Pa Horam, meghea ka Gɛzɛr se kakemane meghea ka Lakish. Pa Zhozəwɛ ɗate ŋkɛ, gheŋkɛ le ka sewajɛa ŋkɛ, kesərəakɛ wəndə kambele ya kwetɛŋe we.

³⁴Cape yɛ Zhozəwɛ le ka Israyɛl slə mbe Lakish kadzembe Ɛglon, pa hɛ dzaslete ŋkɛ ba'a have nda mpa.

³⁵Pa hɛ kelehwe ŋkɛ te vecia shɛnyɛ. Kala nya menete nda ŋkɛ ke Lakish ne, pa hɛ mpəmte mbeli nyi mbe.

³⁶Slə mbe Ɛglon ne, pa yɛ Zhozəwɛ le ka Israyɛl dzeme Hɛbron ba'a have nda mpa.

³⁷Pa hɛ kelehwe ŋkɛ ba'a mpəmte meghe ba'a mbeli nyi mbe le kafayɛ. Pa hɛ fəhwe pɛtɛ meleme nyi dzeyi yitea melemea shɛ ba'a mpəmte mbeli nyi mbe hɛ. Pa ŋkɛ menete nda kala nya menete nda ŋkɛ ke Ɛglon. Ma Zhozəwɛ ne, kesərəakɛ yayata wəndə ŋkɛ kambele we, nahe ŋkɛ keteremte pɛtɛa melemea shɛ.

³⁸Kwa sebe ta ŋkɛ ne, pa Zhozəwɛ ba'a ka Israyɛl zhɛrete geva te sebe kalə kadzembe Debir nya have nda mpa hɛ.

³⁹Pa hɛ kelehwe meleme ba'a meghe nya mbe, tsagha pɛtɛa meleme nyi dzeyi yite. Pa hɛ mpəmte mbeli nyi mbe le kafayɛ, wəndə shɛ ketene teghweme we. Pa Zhozəwɛ menete nda ke Debir ba'a meghe nya mbe kala nya menete nda ŋkɛ ke Hɛbron, tsagha ke Libna ba'a meghe nya mbe.

⁴⁰Pɛtɛ Zhozəwɛ ɗate hɛɗi nyi hwa ghweme, Nɛgɛv, nyi kwake kwake ba'a ŋkwa nya dzawa vare ghweme. Kesərəakɛ yayata wəndə ŋkɛ kambele we, pɛtɛ teremte wəsə nya le mpi ŋkɛ, kala nya gezete Shala Mahwətə ta ka Israyɛl.

⁴¹Pa Zhozəwɛ ɗate hɛ se mbe Kadɛs-Barnɛya hwa'a mbe Gaza, laka bela kwa zeme, hwa'a kwa hɛɗia Goshɛn ba'a Gabawon nya laka bela kwa gwela.

⁴²Pa Zhozəwɛ fəhwe ka meghe ba'a hɛɗia nci, kwa nza ŋkɛ mpa yampa Shala Mahwətə ta ka Israyɛl yitea hɛ.

⁴³Kwa sebe ta ŋkɛ, pa Zhozəwɛ zhɛneke geva kadzembe ghedəkwə kwa Gilgal le ka Israyɛl nyi yite.