Read kapsiki Zhozəwɛ 11 Bible Online

Zhozəwɛ 11 - kapsiki bible

Zhozəwɛ 11

¹Ma kwa fate ghena nya Yabin, meghe nya mbe Hasor ne, pa ŋkɛ ghwenakɛ ŋkwa sha Yobab, meghea ka Madon, ke meghea ka Shimron ba'a ke meghea ka Akeshaf,

²tsagha ke ka meghe nyi hwa ghweme laka bela kwa gwela, kwa zlərəa Zhəwrdɛŋe laka bela kwa zeme yitea ndərəa Zhɛnɛzarɛt, te hɛɗi nya kwake kwake ba'a mɛa hələ nya takwa yitea Dor laka pəkwə ta veci,

³tsagha ke ka Kanan nyi laka same ta veci ba'a pəkwə ta ŋkɛ, ka Amor, ka Hɛt, ka Pɛrɛs, ka Zhɛbəs nyi pelɛ ghweme ba'a ka Hava nyi yitea seɗa ta Hɛrmon, te hɛɗia Mispa.

⁴Pa pɛtɛa ka meghea shɛhɛ shave le ka sewajɛ nyi kwele kwele kala ndaleghe nya kwa hələ, tsagha gədəwəa lɛmə kwele kwele ba'a wəmata gədəwə kwele kwele.

⁵Pa ka meghe nyi gezehwe ghena ta nci kase kamenete ghedəkwəa nci yitea Hɛrmon kezha mpa le ka Israyɛl.

⁶Ma ke Mahwətə sha Zhozəwɛ: «Ghazlənə ma na ma, kwa nza ŋkɛ tsetse ŋkwa hendɛ ne, 'ya teve ŋa hɛ pɛtɛ, keɗa ɗa va zhi, kempə mpə te kema ta ka Israyɛl. Katesla zewe ta gədəwəa nci na, katetere wəmata gədəwə nci na le ghwə.»

⁷Pa Zhozəwɛ le mbelia ŋkɛ lə kahave nda mpa vəkə ke hɛ mɛa yɛmə nyi mbe Mɛrom.

⁸Pa Mahwətə fəame hɛ mbe dzeve ta ka Israyɛl nyi keɗate hɛ ba'a nyi kekekate hɛ hwa'a mbe Sidon, meleme nya wəba, mbe Misrefot-Mayim ba'a hwa'a kwa zlərəa Mispa. Pa ŋkɛ hərəte hɛ, wəndə shɛ ketenakɛ ŋkɛ teghweme hwa hɛ we.

⁹Pa Zhozəwɛ menete nda ke hɛ kala nya gezete nda Mahwətə. Pa ŋkɛ slamte zewe ta gədəwəa lɛməa nci ba'a teremte yɛ wəmata ta gədəwə le ghwə.

¹⁰Vəa ŋkwa shɛ kazhɛne geva Zhozəwɛ kase ne, pa ŋkɛ ɗate Hasor ba'a peslekɛ meghea ŋkɛ le kafayɛ. Ma vəashi ne, Hasor nde se kameleme nya wəba te hɛɗia meghe nyi laka bela kwa gwela. Pa ŋkɛ peslekɛ meghea ŋkɛ

¹¹ba'a ghazlemte mbelia ŋkɛ le kafayɛ. Kesərəakɛ wəsə nya le mpi ŋkɛ we, pa ŋkɛ teremte meleme le ghwə.

¹²Pa Zhozəwɛ fəhwe pɛtɛa yɛ meleme ta ka meghe ba'a ka meghe nyi mbe hɛ. Pa ŋkɛ mpəmte ka meghe ba'a mbeli nyi mbe meleme le kafayɛ kala nya gezete nda Moyize, nde mene slene ta Mahwətə.

¹³Ama kese ka Israyɛl kandə meleme nyi pelɛ yɛ wəmbə we, deke Hasor yandəmte Zhozəwɛ.

¹⁴Pɛtɛ ka Israyɛl fəhwe wəshi ba'a wəshi keseɗa kaŋa nci, ama pa hɛ mpəmte mbeli le kafayɛ, kaɗema kesərəakɛ wəsə nya nza mpi hwe.

¹⁵Ma ghena nyi gezave nda Mahwətə ke Moyize, nde mene slene ta ŋkɛ, pa Moyize gezave nda hɛ ke Zhozəwɛ, pɛtɛ Zhozəwɛ yipəyi hɛ kwa. Kentamte kwete wəsə ŋkɛ hwa wəshi nyi gezave nda Mahwətə ke Moyize we.

¹⁶Pa Zhozəwɛ zehwe hɛɗi nyi hwa ghweme, pɛtɛa hɛɗia Goshɛn, hɛɗi nya kwake kwake, tsagha zlərəa Zhəwrdɛŋe, tsagha ŋkwa nyi hwa ghweme ba'a ŋwela nya laka bela kwa gwela.

¹⁷Pa ŋkɛ mpəmte ka meghe nyi kwelɛ ghweme nya dɛrɛŋe rɛŋe nya takwa yitea Sɛyir, mbe Ba'al-Gad kwa zlərə Liban, yitea seɗa ta ghweme ta Hɛrmon, laka bela kwa gwela.

¹⁸Kwele kwele temə Zhozəwɛ kampa le ka meghea shɛhɛ.

¹⁹Deke ka Hava nyi mbe Gabawon ka menete kwelɛŋe le ka Israyɛl. Pɛtɛ fəhwe kweci hɛɗia shɛhɛ ŋkɛ le mpa.

²⁰Kwa nza ŋkɛ va Mahwətə se ntɛaŋentɛa ta wənəa nci nda mpa hɛ le ka Israyɛl, kezha mpəmte hɛ ka Israyɛl kwa zhɛma heli yitea hɛ ba'a zamte sebe ŋkɛ te hɛ kala nya gezete nda Mahwətə ke Moyize.

²¹Te vəa shɛnyɛ, pa Zhozəwɛ lə kazamte ka Anak nyi pelɛ ghweme ta Hɛbron, Debir, Anab ba'a nyi pelɛ ghweme ta Zhəwda ba'a ghweme ta ka Israyɛl. Pɛtɛ Zhozəwɛ mpəmte hɛ ba'a bezemte yɛ meleme ta nci.

²²Ketene nde Anak te hɛɗia ka Israyɛl we. Deke kwa Gaza Gat ba'a Asdod tene ka Anak.

²³Pɛtɛ Zhozəwɛ kelehwe hɛɗi kala nya gezete nda Mahwətə ke Moyize. Pa Zhozəwɛ ndeke nda ke ka Israyɛl kawəsə kezeme ghɛ, kala nya nehave nda ŋkɛ ke hwelefefi. Pa mbeli zhɛnakɛ mpi va mpa.