Read kapsiki Zhozəwɛ 14 Bible Online

Zhozəwɛ 14 - kapsiki bible

Zhozəwɛ 14

¹Wa nyi hɛɗi nyi kemave ka Israyɛl te hɛɗia kanan nya neheve nda nde dzeghe Shala Ɛlazar, Zhozəwɛ wəzege ta Nəwn ba'a mbeli nyi te ghəa hwelefe ke ka Israyɛl:

²pa mbeli slate kwasheghediɗi kenta ŋkwa kala nya gezave nda Mahwətə ke Moyize kanehe nda mbeli ke hwelefefi mesli ba'a kwete bela ta hwelefe.

³Kwa nza ŋkɛ nahe Moyize kendeke nda ŋa nci ŋkwa ke kweci hwelefefi bake ba'a kwa bake ta bela ta hwelefe laka kwete bela ta hələa Zhəwrdɛŋe. Ama kendeke nda ŋa nci ŋkwa ke ŋwalea Lɛvi we.

⁴Ŋwalea Zhozɛf ne, bake hwelefefia nci, Manasɛ ba'a Ɛfrayim: Kendeke nda ŋkwa mbeli ke hwelefe ta Lɛvi tɛape te hɛɗia shɛ we. Deke ŋkwa nya nza hɛ te mbe meleme ba'a ŋkwa nyi dzeyi yite kezha wəshi keseɗa ta nci ba'a kweci wəshia nci.

⁵Pa ka Israyɛl menete kala nya gezave nda Mahwətə ke Moyize, pa hɛ nehete hɛɗia shɛ.

⁶Pa ŋwalea Zhəwda se sha Zhozəwɛ pelɛ Gilgal. Ma ke Kalɛb, wəzege ta Yefəwnɛ, nde Kenaz shɛ: «Nahe gha le ghəa ŋa keɗepe ghena nya gezave nda Mahwətə ke Moyize, wəndəa Shala, ghena nya kaŋa ŋa ba'a kaŋa ɗa pelɛ Kadɛs-Barnɛya.

⁷Wəfaɗemsə va ta ɗa nda ghwenakɛ ɗa Moyize, nde mene slene ta Mahwətə slə pelɛ Kadɛs-Barnɛya kalə kanewe nza ta hɛɗi, tiɗiɗi gezave nda ghena shɛ 'ya kwa zhɛneke geva 'ya.

⁸Ma kweci ka kesaka ma nyi kese pelɛ yitea 'ya ne, nahe hɛ kedakemte mbeli, ama 'ya, nahe 'ya kezelete ghena ta Shala Mahwətə tiɗiɗi.

⁹Te vecia shɛ ne, ma ke Moyize meɗeyi: Ma hɛɗi nya ŋkeɗeve seɗa ta ŋa ne, kaŋa ŋa tenza ŋkɛ le ŋwalea ŋa kaghala ghala, kwa nza ŋkɛ tiɗiɗi zelete ghena ta Mahwətə, Shala ta ɗa na.

¹⁰Newema tsetsenya tse nahe Mahwətə kesərəakɛ ɗa le mpi kala nya gezete ŋkɛ. Va wəfaɗemsə mcɛfeghəmbe ghala gezete nda Mahwətə ke Moyize, vəa ŋkwa nya dzeghwa hɛ te ɓerama. Newema tsetsenya va deghesemsə mcɛfeghəmbe 'ya ɓeshi.

¹¹Mba berete mbe 'ya və nya ghwenakɛ ɗa Moyize, beretekea shɛ 'ya tsetsenya kala nya kese va 'ya shɛ, kezha lə yitea mpa ba'a kamene kweci slene.

¹²Ndeke ɗa ghweme nya kala nya gezete Mahwətə vəa ŋkwa shɛ. Kwa nza ŋkɛ nahe na kefate te vecia shɛ kwa gezete ŋayɛ 'ya ka Anak ya hwa hɛ mbe meleme nyi berete berete. Ɗa ma ta Mahwətə kanza le 'ya ne, kateŋka hɛ 'ya kala nya gezete ŋkɛ le ghəa ŋkɛ.»

¹³Pa Zhozəwɛ wəpikɛ Kalɛb, wəzege ta Yefəwnɛ ba'a ndeke nda Hɛbron kaŋa ŋkɛ.

¹⁴Kala nya menete geva ŋkɛ nda se Kalɛb, wəzege ta Yefəwnɛ, nde Kenaz kakemave Hɛbron kaŋa ŋkɛ, va nya zelete ghena ta Shala Mahwətə ta ka Israyɛl ŋkɛ tiɗiɗi.

¹⁵Ma sləa Hɛbron kaghate ne, Kiriyat-Arba, geze ta ŋkɛ, meleme ta Arba. Nahe Arba kese kawəndə nya kwele hwa ka Anak. Se te vəa shɛ ne, pa mbeli zhɛnakɛ mpi va mpa.