Read kapsiki Zhozəwɛ 21 Bible Online

Zhozəwɛ 21 - kapsiki bible

Zhozəwɛ 21

¹Pa mbeli nyi te ghəa pelə nyi mbe hwelefe ta Lɛvi hendave nda geva ke nde dzeghe Shala Ɛlazar, Zhozəwɛ, wəzege ta Nəwn ba'a mbeli nyi te ghəa yɛ pelə nyi mbe kweci hwelefefia ka Israyɛl.

²Ma mbe Silo, te hɛɗia Kanan ne, ma ke hɛ shɛ: «Nahe Mahwətə kegezete laka Moyize nde mene slene ta ŋkɛ kave n'yɛ meleme nyi nza ghen'yɛ mbe hɛ, tsagha ŋkwa nyi dzeyi yitea hɛ kezha wəshi keseɗa ta n'yɛ.»

³Pa ka Israyɛl ntave kweci meleme nyi nza ŋkwa dzeyi yitea hɛ shave hwa bela nyi kaŋa nci kezha ve nda hɛ ke ka Lɛvi, kala nya gezete Mahwətə.

⁴Pa mbeli ntave peləa Kɛhat laka kwasheghediɗi. Hwa hɛ ne, pa hwelefefia Aron, nde dzeghe Shala kekemave meleme meŋe mahekeneghəmbe le kwasheghediɗi te hɛɗia Zhəwda, Simɛyon ba'a Bɛnjamɛn.

⁵Pa kweci hwelefefia Kɛhat kemave meleme meŋe laka kwasheghediɗi te yɛ hɛɗia Ɛfrayim, ŋa Dan ba'a kwa bake ta bela ta Manasɛ.

⁶Pa ŋwalea Gɛrshon kemave ŋa nci meleme meŋe mahekeneghəmbe te hɛɗia Isakar, Asɛr, Nɛftali ba'a kwa bake ta bela ta Manasɛ nya mbe Bashan.

⁷Pa ŋwalea Merari kemave meleme meŋe bakeghəmbe te hɛɗia Rəbɛn, Gad ba'a Zabəlon.

⁸Tsetse ntave nda yɛ meleme le yɛ ŋkwa keya wəshi ka Israyɛl ke hwelefe ta Lɛvi laka sla kwasheghediɗi kala nya gezave nda Mahwətə ke Moyize.

⁹Wa nyi sləa yɛ meleme ta Zhəwda ba'a Simɛyon nyi kendeke nda geva

¹⁰ke hwelefe ta Aron, ŋa peləa Kɛhat, wəzege ta Lɛvi, kwa nza ŋkɛ ghenci ya kaka ghate kantave geva laka Kwasheghediɗi nyi.

¹¹Kwa ghate ne, Kiriyat-Arba keɗema meleme ta Arba, sləa shia nci Anak, geze ta ŋkɛ, Hɛbron nya pelɛ ghweme ta Zhəwda, tsagha ŋkwa keya wəshia nci nyi dzeyi yite.

¹²Ama wəve nyi dzeyi yitea melemea shɛ ba'a meleme nyi ɓɛhwɛ ɓɛhwɛ ne, nahe hɛ kendeke nda geva ke Kalɛb, wəzege ta Yefəwnɛ.

¹³Pa hɛ ndeke nda yɛ meleme kentikə wəndə nya ketsave kelɛhe ke ŋwalea Aron, nde dzeghe Shala: Hɛbron ba'a ŋkwa nyi dzeyi yite, Libna ba'a ŋkwa nyi dzeyi yite,

¹⁴Yatir ba'a ŋkwa nyi dzeyi yite, Ɛshtemowa ba'a ŋkwa nyi dzeyi yite.

¹⁵Holon, Debir,

¹⁶Ashan, Yəwta, Bɛt-Shɛmɛsh, meleme mesli ba'a ŋkwa keya wəshi nyi dzeyi yitea hɛ, pɛtɛa nci te hɛɗia yɛ Zhəwda le Simɛyon.

¹⁷Te hɛɗia Bɛnjamɛn ne, pa hɛ kemave Gabawon ba'a ŋkwa nyi dzeyi yite, Gɛba ba'a ŋkwa nyi dzeyi yite,

¹⁸Anatot, Alɛmɛt, meleme nyi jama jama wəfaɗe ba'a ŋkwa keya wəshi nyi dzeyi yitea hɛ.

¹⁹Ma pɛtɛa meleme nyi kaŋa ŋwalea Aron, nde dzeghe Shala ne, meleme meŋe mahekeneghəmbe ba'a ŋkwa keya wəshi nyi dzeyi yitea hɛ.

²⁰Ma kweci ka Lɛvi nyi kwa yita ta Kɛhat ne, pa hɛ kemave ŋa nci meleme laka kwasheghediɗi te hɛɗia Ɛfrayim:

²¹Sishɛm, kwete hwa meleme kentikə ta wəndə nya ketsave kelɛhe pelɛ ghweme, Gɛzɛr ba'a ŋkwa nyi dzeyi yite,

²²Kibsayim ba'a Bɛt-Horon, meleme wəfaɗe ba'a ŋkwa keya wəshi nyi dzeyi yitea hɛ.

²³Te hɛɗia Dan, wəfaɗe kemave meleme hɛ ba'a ŋkwa keya wəshi nyi dzeyi yitea hɛ: Ɛltekɛ, Gibeton,

²⁴Ayalon ba'a Gat-Rimon.

²⁵Te ŋa kwete kwa bake ta bela ta Manasɛ nya laka ŋkwa kesame ta veci ne, pa hɛ kemave meleme bake: Ta'anak, Iblɛyam ba'a ŋkwa keya wəshi nyi dzeyi yitea hɛ.

²⁶Pɛtɛa meleme ta nci nyi kemave hɛ ne, meŋe ba'a ŋkwa keya wəshi nyi dzeyi yitea hɛ.

²⁷Pa yɛ peləa ka Lɛvi nyi mbe hwelefe ta Gɛrshon kemave meleme bake ba'a ŋkwa keya wəshi te hɛɗia kwete kwa bake ta bela ta Manasɛ nya pelɛ kema ta Zhəwrdɛŋe: Golan, pelɛ Bashan, kwete wəndəa meleme kentikə ba'a Bɛshetera.

²⁸Ma te hɛɗia Isakar ne, pa hɛ kemave meleme wəfaɗe ba'a ŋkwa keya wəshi nyi dzeyi yitea hɛ: Kishiyon, Dabrat,

²⁹Yarməwt ba'a Ɛn-Ganim.

³⁰Te hɛɗia Asɛr ne, nahe hɛ kekemave meleme wəfaɗe ba'a ŋkwa keya wəshi nyi dzeyi yitea hɛ: Mishal, Abdon,

³¹Hɛlkat ba'a Rehob, tsagha ŋkwa keya wəshi nyi dzeyi yitea hɛ.

³²Te hɛɗia Nɛftali ne, meleme mahekene kemave hɛ: Kɛdɛsh mbe Galilɛ, kwete meleme kentikə, Hamot-Dor ba'a Kartan.

³³Nahe yɛ peləa Gɛrshon kekemave meleme meŋe mahekeneghəmbe ba'a ŋkwa keya wəshi nyi dzeyi yitea hɛ.

³⁴Pa kweci peləa ka Lɛvi, nyi kahwelefefia Merari kemave meleme wəfaɗe ba'a ŋkwa nyi dzeyi yitea hɛ te hɛɗia Zabəlon: Yoknɛyam, Karta,

³⁵Dimna ba'a Nahalal.

³⁶Te hɛɗia Rəbɛn, laka ŋkwa kesame ta veci yitea Zhəwrdɛŋe, kwa ntsə kwa ntsə le Zhɛriko ne, pa hɛ kemave meleme wəfaɗe ba'a ŋkwa keya wəshi nyi dzeyi yitea hɛ perə: Bɛsɛr nya te ɓerama, kwete meleme kentikə, Yahas,

³⁷Kedɛmot ba'a Mɛfat.

³⁸Te hɛɗia Gad ne, pa hɛ kemave meleme wəfaɗe ba'a ŋkwa nyi dzeyi yitea hɛ: Ramot mbe Gala'ad, kwete wəndəa yɛ meleme kentikə, Mahanayim,

³⁹Hɛshebon ba'a Yazɛr.

⁴⁰Tsagha gɛ, nahe yɛ peləa ka Lɛvi nyi kahwelefefia Merari kekemave meleme meŋe bakeghəmbe laka sla kwasheghediɗi.

⁴¹Ma pɛtɛa meleme nyi kemave hwelefefia Lɛvi te hɛɗia kweci ka Israyɛl ne, meleme wəfaɗemsə degheseghəmbe ba'a ŋkwa keya wəshi nyi dzeyi yitea hɛ.

⁴²Nahe yayata meleme shɛ kendeke nda geva ke hɛ le ŋkwa keya wəshi nya yite.

⁴³Tsetse ndeke nda hɛɗi nya meɗeyi nda ŋkɛ ke ka shihɛ nci Mahwətə ke ka Israyɛl. Pa hɛ kelete kaŋa nci ba'a ntishɛnji mbe

⁴⁴Pa Mahwətə ndeke nda zhɛne mpi ke hɛ laka yayata bela, kala nya zemete nda fela ŋkɛ ke ka Shihɛ nci. Kwete wəndəa ka jaga ta nci shɛ kezhɛnete nda ghə ke hɛ le mpa we: Pa Mahwətə ndeke nda hərə ka jaga ta nci ke hɛ, kwete shɛ kezhɛnete nda ghə ke hɛ we.

⁴⁵Ma pɛtɛa ghena ganji nyi meɗeyi nda Mahwətə ke ka Israyɛl ne, nahe hɛ kemenete geva. Kwete shɛ kaɗema kemenete geva we.