Read kapsiki Zhozəwɛ 23 Bible Online

Zhozəwɛ 23 - kapsiki bible

Zhozəwɛ 23

¹Kwele kwele jivenyɛ və ghala ndeke nda zhɛne mpi Mahwətə ke ka Israyɛl, kwa sebe ta nya mbelemte hɛ ŋkɛ va ka ghema ta nci nyi kentəsləte hɛ. Zhozəwɛ ɓiyitsa ne, nahe ŋkɛ kenza kehale kwele fate fate.

²Pa Zhozəwɛ hekakɛ pɛtɛa ka Israyɛl, mbelia jama ta nci, mbeli nyi te ghəa nci, ka meha ghwə ta nci, ka rafe wəshi mahalegə ta nci. Ma ke sha hɛ: «Wa nya 'ya nya kehale hale hwerejɛme jɛme.

³Nahe yɛ kenakɛ wəsə nya menete nda Shala Mahwətə ta ŋayɛ ke kweci hwelefefi tewəmbəreke gheyɛ: Shala Mahwətə ta ŋayɛ nde mpate mpa kezha gheyɛ te ŋkwa ŋayɛ.

⁴Nahe yɛ kenakɛ nda nehave ŋayɛ hɛɗi mbeli nyi hərəte 'ya 'ya le sla kwasheghediɗi ba'a ŋa mbeli nyi ketene, kanehe ŋayɛ vəa ŋkwa shɛ slə mɛa hələa Zhəwrdɛŋe, laka ŋkwa kesame ta veci hwa'a mɛa ndərəa Mɛditɛranɛ, laka ŋkwa kepəkwə ta veci.

⁵Kateŋka hɛ Shala Mahwətə ta ŋayɛ cakeɗake le gheyɛ. Gheyɛ ɓiyitsa ne, katekele hɛɗia nci yɛ, kala nya meɗeyi ŋayɛ Shala Mahwətə ta ŋayɛ.

⁶Ntsə mə geva, nza mə le berete kamene slene le ghena nyi keshave mbe palepa ta wəshi mahalegəa Moyize, kaɗema kaslə vare ya dzeyi te kwa zeme, ya dzeyi te kwa gwela.

⁷Mba yɛ kejikə geva le kweci hwelefefi nyi ketene nyi hwa gheyɛ. Hekama sləa shala ta nci yɛ ma, zemema fela yɛ le hɛ ma. Mene nda ma slene yɛ ke hɛ ma, gwəɗəŋəma yɛ kwa kema ta nci ma.

⁸Deke Shala Mahwətə ta ŋayɛ yadɛŋe geva yɛ kadzete kala nya menete nya yɛ pa ɓeshi nya.

⁹Nahe Mahwətə keŋkamte hwelefefi nyi nza zləvə te hɛ ba'a nyi berete berete kwa kema ta ŋayɛ. Wəndə shɛ keghereŋe kwa kema ta ŋayɛ pa ɓeshi nya we.

¹⁰Kwetɛŋe wəndəa ŋayɛ ne, mbeli slibə yaŋka ŋkɛ, kwa nza ŋkɛ Shala Mahwətə ta ŋayɛ nde mpate mpa kezha gheyɛ te ŋkwa ŋayɛ, kala nya meɗeyi ŋayɛ ŋkɛ.

¹¹Yate mə ghəa ŋayɛ megela, ɗete mə Shala Mahwətə ta ŋayɛ.

¹²Ma kezhɛrave nda wəmbə yɛ kezha jikə geva le hwelefefi nyi hwa gheyɛ, kejikəte geva yɛ le hɛ laka wəme geva ba'a kegweɗəte geva yɛ le hɛ ne,

¹³ɗepete mə katezhɛne Shala Mahwətə ta ŋayɛ kaŋka hwelefefi nyi te kema ta ŋayɛ we. Kala keleŋa nya yitea gheyɛ tenza hɛ, kala dagalawe, kala ghweɗa te wəmbə va gheyɛ, kala tigə nya mbe ntsə ta ŋayɛ, pɛtɛ teza yɛ te hɛɗi ganyɛ nya ndeke ŋayɛ nya Shala Mahwətə ta ŋayɛ.

¹⁴'Ya kateslə tsetsenya kadzete ŋkwa nya telə mbeli nyi te hɛɗi, nahe yɛ keɗepete kwa wənəa ŋayɛ, tsagha mbe mehele ta ŋayɛ, kwete ghena shɛ hwa ghena ganji nyi meɗeyi ŋayɛ Mahwətə kaɗema kemenete geva we.

¹⁵Kala ghena ta meɗe mɛ nyi gezeke ŋayɛ Shala Mahwətə ta ŋayɛ ne, pɛtɛ hɛ kemenete geva, tsagha shɛ teve ɗa Shala te gheyɛ perə, katezamte ŋayɛ ŋkɛ, katezamte ŋayɛ ŋkɛ te hɛɗi nya ganyɛ nya ndeke ŋayɛ nya Shala Mahwətə ta ŋayɛ.

¹⁶Ma keɗema yɛ kemenete kala jikə geva nya menete Shala Mahwətə ta ŋayɛ le gheyɛ, jikə geva nya gezete ŋayɛ ŋkɛ ba'a kehawe yɛ va wəshi nyi zhɛrete mbeli kala Shala ne, katehwepe wənəa Mahwətə va gheyɛ, kahe kahe teza ŋayɛ yɛ te hɛɗi ganyɛ nya ndeke ŋayɛ nya ŋkɛ.»