Read kapsiki Zhozəwɛ 24 Bible Online

Zhozəwɛ 24 - kapsiki bible

Zhozəwɛ 24

¹Pa Zhozəwɛ tsenete pɛtɛa hwelefefia ka Israyɛl mbe Sishɛm. Pa ŋkɛ hekakɛ mbelia jama, ka meha ghwə, mbeli nyi te ghə, ka rafe wəshia nci, pa ŋkɛ tsenete hɛ kwa kema ta Shala.

²Tagha gɛ, ma ke Zhozəwɛ sha hɛ pɛtɛ: «Ma ke Shala Mahwətə ta ka Israyɛl: Ma vəashi ne, pelɛ kema ta hələa Efrate, hələ nya wəba se ka shihɛ ŋayɛ, Tɛra yitenyɛa Abraham le Nahor, kahawe hɛ va kweci shala.

³Pa 'ya kelete shia ŋayɛ shave pelɛ kema ta hələa Efrate, pa 'ya dzeghwamte nda dzeghwa te hɛɗia Kanan. Pa 'ya yate hwelefe ta ŋkɛ kwele kwele, pa 'ya ndeke nda Izak.

⁴Pa 'ya ndeke nda yɛ Zhakob le Ɛzawə ke Izak. Pa 'ya ndeke nda ŋkwa nya pelɛ ghweme ta Sɛyir ke Ɛzawə. Ama yɛ Zhakob le ŋwalea ŋkɛ ne, pa hɛ dzawanji kwa Ɛzhipte.

⁵Ma kwa sebe ta ŋkɛ ne, pa 'ya ghwenakɛ yɛ Moyize le Aron, pa 'ya ɗate ka Ɛzhipte le ndiremi kwele kwele, pa 'ya fəakave ka shihɛ ŋayɛ shave mbe hɛɗia shɛ.

⁶Pa 'ya fəmte ka shihɛ ŋayɛ shave mbe Ɛzhipte, hwa'a hɛ mɛa ndərə kwa Ghɛmɛ. Katəkwə təkwə hɛ ka Ɛzhipte le yɛ wəmata gədəwə ba'a ka zleɗe gədəwə.

⁷Pa ka shihɛ ŋayɛ tsate ɗa lewela kezha kemane, pa 'ya veyi ŋkwesle kwelɛ ka shihɛ ŋayɛ le ka Ɛzhipte. Pa 'ya zhɛnaghe yɛmə kənəa ka Ɛzhipte, bətə hɛ kwa ndərə, nahe yɛ keɗepe wəsə nya menete nda 'ya ke ka Ɛzhipte megela. Kwa sebe ta ŋkɛ ne, kwele kwele temə mbelia ŋayɛ kwamte te ɓerama.

⁸Kwa sebe ta ŋkɛ, pa 'ya keleke hɛ kadzete hɛɗia ka Amor nya pelɛ kema ta Zhəwrdɛŋe. Pa hɛ ndeke ŋayɛ mpa, pa 'ya fəave ŋayɛ hɛ mbe dzeve ta ŋayɛ. Nahe yɛ kezehwe hɛɗia nci va nya zamte sebe 'ya te hɛ te kema ta ŋayɛ.

⁹Pa meghea ka Mowab Balak, wəzege ta Sipor have ŋayɛ mpa, pa ŋkɛ hekakɛ Balam, wəzege ta Bɛyor kezha bezla ŋayɛ.

¹⁰Ama kese 'ya kafa ghena ta Balam we. Pa ŋkɛ wəpikɛ ŋayɛ, pa 'ya mbeleke ŋayɛ va berete ta Balak.

¹¹Kwa sebe ta ŋkɛ, nahe yɛ kejive ŋayɛ te hələa Zhəwrdɛŋe hwa'a mbe Zhɛriko. Pa ka Zhɛriko ndeke ŋayɛ mpa, tsagha ka Amor, ka Pɛrɛs, ka Kanan, ka Hɛt, ka Girgash, ka Hava ba'a ka Zhɛbəs. Nahe 'ya kevame hɛ pɛtɛ mbe dzeve ta ŋayɛ.

¹²Pa 'ya ghwenakɛ mbelizhi nyi jama jama te kema ta ŋayɛ, nyi keŋkamte ka meghea kɛfia ka Amor bake. Kenza laka megha ta ŋa we, rəgia ŋa nde menete we!

¹³Pa 'ya ndeke ŋayɛ hɛɗi nya sahwema yaka yɛ yite. Pa 'ya ndeke ŋayɛ meleme nyi ɗema yɛ keŋate, ama ntishɛ gheyɛ mbe hɛ le nza ta ŋayɛ. Pa 'ya ndeke ŋayɛ yɛ rɛzɛŋe ba'a yɛ bekele nyi mɓetema yɛ, ama mbe zeme ya ta nci yɛ.»

¹⁴Ma ke Zhozəwɛ zhɛkwa: «Hawe mə va Mahwətə ba'a mene nda mə slene le wənə kwetɛŋe, laka nza dɛŋe dɛŋe. Ma kwa se ka shihɛ ŋayɛ pelɛ kema ta hələa Efrate keɗema kwa Ɛzhipte ne, kahawe hɛ va kweci shala. Betakɛ mə shala shɛhɛ, mene nda mə slene ke Mahwətə.

¹⁵Ma keɗema mene nda slene ke Mahwətə megela sha gheyɛ ne, ntave mə shala nyi ɗe yɛ kahawe va hɛ ɓeshi: Ntave mə nyi se ka shihɛ ŋayɛ kahawe va hɛ pelɛ kema ta hələa Efrate, keɗema yɛ shala ta ka Amor nyi nza yɛ te hɛɗia nci. Ama 'ya le ghɛa ɗa ne, Mahwətə yatemene nda slene ghen'yɛ.»

¹⁶Ma ke mbeli pɛtɛ zhɛnete nda: «Kawəfə Mahwətə ghen'yɛ kezha hawe va kweci shala tɛape we.

¹⁷Kwa nza ŋkɛ nahe Shala Mahwətə ta n'yɛ kezləgwəke n'yɛ, ghen'yɛ ba'a ka shihɛ n'yɛ shave mbe Ɛzhipte kwa se ghen'yɛ kamava. Nahe ŋkɛ kemenete wəshi meŋele, nahe gheɓəmə keɗepete hɛ. Pa ŋkɛ yate n'yɛ kwa hweŋkwa nya cakeɗake nya, kwa nza ghen'yɛ kadzeghwa ba'a va hwelefefi nyi se ghen'yɛ dzeyi hwa hɛ.

¹⁸Pɛtɛ ŋkɛ ŋkamte hwelefefi Mahwətə kwa kema ta n'yɛ, halama ka Amor nyi kese te hɛɗi nya. Vatse mene nda slene ghen'yɛ ke Mahwətə kwa nza ŋkɛ gheŋkɛ ya kaShala ta n'yɛ.»

¹⁹Ma ke Zhozəwɛ sha mbeli pɛtɛ: «Katepesle yɛ yitea mene nda slene ke Mahwətə we, kwa nza ŋkɛ Shala nya keveyi geva tekeleke ŋkɛ, kaɗe ŋkɛ kanza deke kaShala ta ŋayɛ. Katezereghe beze ghena ta ŋayɛ ba'a yɛ jaɗafa ta ŋayɛ ŋkɛ we, katekelemte ŋayɛ ŋkɛ te wənə we.

²⁰Ma keɗema Mahwətə yɛ kezha lə ŋayɛ yitea kweci shala ne, katezhɛre geva ŋkɛ kadzeghəa gheyɛ, katemene ŋayɛ wəsə kwa ndiremi ŋkɛ, pɛtɛ tezamte ŋayɛ ŋkɛ ya tsema tsema menete ŋayɛ ganyɛ ŋkɛ kaghate.»

²¹Ama ma ke mbeli pɛtɛ zhɛnete: «Ewə, Mahwətə yamene nda slene ghen'yɛ.»

²²Ma ke Zhozəwɛ sha mbeli pɛtɛ: «Gheyɛ le ghəa ŋayɛ ya kaka negha fete yitea ghəa ŋayɛ: Gheyɛ kantave mene nda slene ke Mahwətə.» Ma ke hɛ zhɛnete: «E'e, ghen'yɛ ya kaka negha fete.»

²³Ma ke Zhozəwɛ: «Ma tsetsenya gɛ, betakɛ mə wəshi nyi zhɛrete mbeli kala Shala nyi ki ghɛa ŋayɛ! Dɛŋe mə geva te Shala Mahwətə ta ka Israyɛl.»

²⁴Ma ke mbeli pɛtɛ zhɛnete: «Katemene nda slene ghen'yɛ ke Shala Mahwətə ta n'yɛ ba'a kateyɛ nda fete ghen'yɛ.»

²⁵Te vecia shɛ mbe Sishɛm ne, pa Zhozəwɛ menete jikə geva kezha mbeli pɛtɛ. Pa ŋkɛ ndeke nda wəshi mahalegə ke hɛ ba'a yɛ meɗe mɛ.

²⁶Pa Zhozəwɛ rafete ghena shɛ mbe palepa ta wəsə mahalegə. Pa ŋkɛ kelete pelɛ nya wəba ba'a mɓeyi ŋkɛ vare cɛana, te ŋkwa nya keveyi geva kaŋa Mahwətə.

²⁷Kwa sebe ta ŋkɛ, ma ke sha mbeli pɛtɛ: «Newema mə pelɛ nya, gheŋkɛ nde negha fete kwelɛ 'ya le gheyɛ, pɛtɛ pelɛa shɛ kefate ghena nyi gezete ɓəmə Mahwətə. Gheŋkɛ nde negha fete kwelɛ gheɓəmə, kezha ɗema yɛ kazhɛne nda ghə ke Shala.»

²⁸Pa Zhozəwɛ pelakɛ mbeli pɛtɛ, yayata wəndə kazhɛne geva kalə sha hɛɗia ŋkɛ.

²⁹Ma kwa sebe ta wəshia shɛhɛ ne, mtiwə Zhozəwɛ, wəzege ta Nəwn, nde mene slene ta Mahwətə, nya nza va ta ŋkɛ gwəmsə ba'a meŋe.

³⁰Pa mbeli lamte ŋkɛ te ŋkwa nya kaŋa ŋkɛ mbe Timnat-Sɛra, pelɛ ghweme ta Ɛfrayim, laka bela kwa gwela yitea ghweme ta Ga'ash.

³¹Nahe ka Israyɛl kemenete nda slene ke Mahwətə kwa nza Zhozəwɛ mba teghweme. Mba shɛ hɛ kamene nda kwa sebe ta mte ta Zhozəwɛ, pa te vəa mbelia jama nyi te ŋkwa Zhozəwɛ nyi kenakɛ wəshi nyi menete nda Mahwətə ke ka Israyɛl.

³²Pa ka Israyɛl lamte 'yɛ'yɛa Zhozɛf nyi fəke hɛ same kwa Ɛzhipte mbe Sishɛm. Nahe Zhakob kepave wəvea shɛ kadəɓərəa mze kwa tɛawetɛa gwəmsə va ŋwalea Hamor, wəndə nya keŋslete Sishɛm nya kezhɛrenyɛ kaŋa Zhozɛf.

³³Mtiwə Ɛlazar, wəzege ta Aron perə. Pa mbeli lamte ŋkɛ pelɛ wəmbə nya ndeke nda mbeli ke wəzege ta ŋkɛ Pinhas, hwa ghweme ta Ɛfrayim.