Read kapsiki 1 Timotɛ 2 Bible Online

1 Timotɛ 2 - kapsiki bible

1 Timotɛ 2

¹Ma kakwa ghate ta ghena ne, kageze ŋayɛ 'ya ka'yɛwe wəshi va Shala, kasəkwə ŋkɛ, kampi nda dzeve ba'a katsa nda ŋ'wese mbeli kezha pɛtɛa mbeli.

²Səkwə mə Shala kezha ka mazea kɛfi ba'a mbelia jama nyi kesleke ŋkwa, yitea gheɓəmə gwezlayɛ, kwelɛŋe, jikə le Shala tsape ba'a kala nya kehi.

³Nya ya kawəsə nya ganyɛ ba'a nya zeɗehwe nda ke Shala, Nde mbele ɓəmə,

⁴nya keɗe kambele mbeli pɛtɛ ba'a kaɗepe kaganda hɛ.

⁵Kwa nza ŋkɛ kwetɛŋe Shala, kwetɛŋe wəndə nya kwelɛ mbeli le Shala: gheŋkɛ wəndə nya kaYɛsə Kriste,

⁶nya kezamte mpia ŋkɛ kezha mbeɗe mbeli pɛtɛ. Nya ya kanegha fete nya kemenete geva te və nya sləyi Shala.

⁷Kezha gheŋkɛ veyi geva 'ya kande zlape ghena shɛ, kawəndə nya ghwenakɛ Yɛsə Kriste, kezha teke nda yɛ ba'a kaganda ke kweci hwelefefi. Kasla tseŋwə 'ya we, kaganda yageze 'ya.

⁸Kaɗe 'ya kasəkwə Shala zhili te yayata ŋkwa le dzeve nyi wɛŋe wɛŋe dzeme yitea ghweme, kaɗema le wənə tehwepe, ya le veraslə.

⁹Kaɗe 'ya ɓiyitsa kaseɗa lekwesa mi kala nya kehite geva, nahe kehi kaseɗe lekwesa nya kehi ba'a nya tiɗiɗi hɛ, kaɗema kandere ghə nyi dzawe dzawe. Kehi hɛ kaseɗe wəshi kepesa geva nyi le mze kwa tere tere, ya wəshi kepesa geva nyi ganji ganji keɗema lekwesa nyi jakeja jakeja we.

¹⁰Ama nahe ŋkɛ kehi kancɛ ndeɗea nci hɛ laka slene ganji, kala nya hi ŋkɛ sha mi nyi kegeze ɗe ta nci kezha Shala.

¹¹Ma vəa ŋkwa nya teke wəsə mbeli ne, nahe ŋkɛ kehi kanza mi tikə tikə laka fa ghena le hawe kwa ntsə.

¹²Kapele nda hweŋkwa 'ya ke mi kateke nda wəshi ke zhili keɗema kasleke hɛ we, nahe ŋkɛ kehi kanza hɛ divə.

¹³Kwa nza ŋkɛ ne, mpelɛa pate geva Adam, nda pate geva Ɛve kwa sebe.

¹⁴Adam nde pelakɛ ghəa ŋkɛ kaghwete geva we, ama male nya keghwetete geva nde bezemte nda ghena ke Shala.

¹⁵Ya tsagha shɛ ŋkɛ ne, laka ya ŋwale tekemave mbele male, kenza nde dɛŋe dɛŋe te yɛ, ɗe ba'a nza nya kehi nya zeɗehwe nda ke Shala.