Read kapsiki 1 Timotɛ 4 Bible Online

1 Timotɛ 4 - kapsiki bible

1 Timotɛ 4

¹Ma ke Sefəa Shala gezete dazhɛ dazhɛ: ma te ka keɗaŋe ta və ne, katesərə yɛ ta nci kweci mbeli kalə yitea yɛ zəzə tseŋwə ba'a wəshi nyi kese va 'yi'yɛghwə.

²Pa hɛ sərəakɛ nda ghəa nci ke mbəɗəkwəa ka tseŋwəa kɛfi, nahe lamba kemenate geva te mehele ta nci le lɛ nya kesame kwa ghwə.

³Ma mbelia shɛhɛ ne, kafɛa mbeli hɛ kewəme geva, kafɛa mbeli hɛ kezeme kweci wəshi, ama Shala nde pate wəshia shɛhɛ yitea zeme hɛ mbelia ŋkɛ nyi dɛŋe dɛŋe te, ghenci nyi keɗepe kaganda fate fate le tsa nda ŋ'wese ke Shala.

⁴Kwa nza ŋkɛ nahe wəshi nyi pate Shala pɛtɛ kenza megela, kwete wəsə shɛ kazemema mbeli, ɗa ma ta mbeli kekelete le tsa nda ŋ'wese we.

⁵Kwa nza ŋkɛ ghena ta Shala ba'a səkwə ghə ka zhɛre yayata wəsə zeɗehwe nda ke Shala.

⁶Ma kencɛte nda ghena nyi na ke ka kesaka ma ne, kande mene slene ganyɛ ta Yɛsə Kriste tenza na. Katencɛ nda na ke mbeli tsema tsema kelete geva na laka ghena ta yɛ ba'a wəsə nya kaganda nya tekeve na fate fate.

⁷Ama ghena heca ba'a ghena nyi kejikətema geva le yɛ nyi geze meha mi ne, sərəakɛ hɛ. Veyi ghəa ŋa kawəndə nya kenza jikə le Shala.

⁸Ma 'yɛ ta geva ne, megela ŋkɛ ɓɛhwɛ. Ama nza dɛŋe dɛŋe te Shala ne, megela ŋkɛ sha wəshi pɛtɛ, kwa nza ŋkɛ kave nda nza nya tsetsenya ba'a nya te kwete hɛ ŋkɛ ke wəndə nya dɛŋe dɛŋe te Shala.

⁹Ghena nya kaganda ghena nya, nya hi mbeli pɛtɛa kakemaneve.

¹⁰Ma nda sa yaka ba'a nda mpa n'yɛ ne, va nya veyi ghə n'yɛ te Shala nya teghweme, gheŋkɛ Nde mbele mbeli pɛtɛ, halama ka zele Yɛsə Kriste.

¹¹Nya ya kawəsə nya yahi na kageze ba'a kateke nda ke mbeli.

¹²Mba mbeli keɓelama ŋa va nya nza na kawəzege, ama nza kala wəndə keyipə pa sha ka zele Yɛsə laka ghena ta ŋa, dzeghwa ta ŋa, ɗe ŋkwa ta ŋa, yɛ ta ŋa ba'a nza ta ŋa wɛŋe.

¹³Ma nda telə 'ya sha gha ne, ndeke nda ghə ke jaŋga nda Ghena ta Shala ke mbeli darahwe rahwe, ke mtsehe nda berete ke hɛ ba'a ke teke nda wəshi ke hɛ.

¹⁴Mba na kepele se yitea wəsə nya kese va Sefəa Shala nya mbe gha, nya kemave na vəa ŋkwa nya gezete ghena ka mɛ ŋkwa ba'a nya vaghe dzeve mbelia jama kənəa gha.

¹⁵Mene slene le wənə kwetɛŋe, ndeke nda ghəa ŋa ke slenea shɛ fəyitekeghə yitea newe jive ta ŋa mbeli pɛtɛ mbe kema.

¹⁶Ntsehwele yitea ghəa ŋa ba'a yitea wəshi nyi teke nda na ke mbeli. Ntsə geva kanza dɛŋe dɛŋe te wəshia shɛhɛ. Ma kemenete na kala nya ne, katembele ghəa ŋa ba'a mbeli nyi kefate ghena ta ŋa na.